Գյումրի-Բավրա միջպետական մայրուղու մասնակի հիմնանորոգման աշխատանքները մոտենում են ավարտին

Այս տարի պետական բյուջեի միջոցներով Շիրակի մարզում  28.5 կմ երկարության միջպետական և հանրապետական նշանակության ճանապարհների հիմնանորոգումը կավարտվի։Գյումրի-Բավրա միջպետական մայրուղում շուրջ 12 կմ ճանապարհ է ասֆալտապատվում։ Նորոգումները մասնակի են , աշխատանքները ընդգրկում են, երթևեկության համար խիստ վտանգավոր  հատվածները։

Մանրաքարի, այսպես ասած, շարժական  արտադրամասը տեղակայված է Գյումրի- Բավրա ավտոճանապարհին։ Հաստոցը Հայաստանում միակն է, որն օգտագործվում է ճանապարհաշինության մեջ։ Տեղում շեբին են արտադրում։ Մարզի բազալտի հանքերից հանված քարը տեղում մանրացնելու հնարավորությունը  մի քանի անգամ հեշտացրել է շինարարների  գործը։

Հաշվի առնելով ճանապարհի գերծանրաբեռնվածությունը, վրացական ու թուրքական բեռնատարների մշտական անցուդարձը, նախատեսվել է  երկշերտ ասֆալտը  փոխարինել  եռաշերտով :

«Նախնական նախագծով ամբողջ ճանապարհը  երկու շերտով էր ասֆալտապատվելու:Քանի որ նախարարությունը թույլատրում է պրոյեկտի գնային մասի 15 տոկոսի փոփոխություն,մենք ինչքան կարողացել ենք  էդ պրոյեկտը փոփոխել ենք,երկշերտ ասֆալտը կլինի եռաշերտ»,-նշեց «ԱԱԲ Պրոեկտ» ՍՊԸ տեղամասի պետ Անդրանիկ  Մանուկյանը:

Հիմա նախագծային հաջորդ փոփոխության  հաստատմանն է սպասում շինարարը։ Առաջարկել են   ճանապարհի վտանգավոր շրջադարձերում ու հատվածներում մետաղական արգելափակոցներ տեղադրել ։ Նախագծային փաստաթղթում դրանք  ներառված չեն :

«Արգելափակոցներ պետք է ավելացվի,ճանապարհը հիմնականում շատ վտանգավոր հատվածներ ունի , սարերի միջով է անցնում:Մենք նամակ են ուղարկել  նախագծող ընկերությանը,հուսանք,որ  կավելացնեն և  բաց մնացած 3 կմ  հատվածներում կտեղադրվեն արգելափակոցներ»,-նշեց տեղամասի պետը:

Հիմնանորոգվող ճանապարհը բոլոր տեսակի մեքենաների համար փակ է ։Ցողամարգ -Ամասիա-Գյումրի  ճանապարհահատվածը   տրամադրված է որպես շրջանցիկ գոտի։Զգուշացնող ճանապարհային նշանները կան ,բայց դրանց չենթարկվող վարորդներ ևս ։ Այս ընթացքում  վթարներից խուսափել  չի եղել ։

Շինարարների  զգուշացումներն անօգուտ են , հիմնական   երթևեկողները շրջակա գյուղերի բնակիչներն  են:Մ1 միջպետական ճանապարհի   մասնակի   հիմնանորոգումը  այս տարվա ճանապարհաշինական   ծրագիր  ընդգրկվեց՝ հաշվի առնելով խիստ քայքայված վիճակը։Գյումրի-Բավրան ճանապարհաշինական   ծրագրերից դուրս էր ՝  պատճառաբանությամբ , որ  այն  Հյուսիս-Հարավ մայրուղու կառուցման  ծրագրում է ։

«Հյուսիս-Հարավը  , եթե նախատեսվի էլ,այս ճանապարհը կմնա,որովհետև Հյուսիս-Հարավը շրջանցում է  Փոքրաշեն և  Քեթի  համայնքները։ Փոքրաշենից մինչև Թորոսգյուղ ,որտեղ որ այս պահին  աշխատանքներ են  տարվում,685 գծամետր  երկարության  թունել է կառուցվելու,այս ճանապարհը Հյուսիս-Հարավի հիմնանորոգման տակ գտնվող ճանապարհ չէ»,-պարզաբանեց Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանը:

Այս պահին որպես շրջանցիկ ու  ժամանակավոր  գործող ճանապարհի՝ Ցողամարգ-Ամասիա 8 կմ երկարության հատվածի  հիմնային նորոգումները կսկսվեն  հաջորդ տարի ։ Իսկ բեռնատարների երթևեկությունից վնասված   Ամասիա-Կապս-Գյումրի  ճանապարհը աշնան կեսերին  կենթարկվի  մասնակի վերանորոգումների :