Գյումրիում առաջին կուրսեցիների համար նոր ուսումնական տարին մեկնարկեց դիմակներով ու ուսումնառության նոր պայմաններով

Նոր ուսումնական տարին սեպտեմբերի 1-ին մեկնարկեց միայն բուհերի առաջին կուրսի ուսանողների համար ու արտակարգ պայմաններում։ Կրճատվել են դասաժամերի և դասամիջոցների տևողությունները, իսկ բարձր կուրսեցիների համար ուսումնական գործընթացը կկազմակերպվի հիմնականում հեռավար։

Սահմանված կանոնների համաձայն՝ առաջին կուրսեցիների մուտքը Շիրակի պետական համալսարան, Հայաստանի տնտեսագիտական  համալսարանի և Ազգային պոլիտեխնիկական համալսարանի Գյումրիի մասնաճյուղեր թույլատրվեց միայն դիմակով ու ջերմաչափումներից հետո։

Հայաստանի ազգային պոլիտեխնիկական համալսարանի Գյումրիի մասնաճյուղի առաջին կուրսեցիները, դիմակներով ու հնարավորինս հեռավորություն պահելով, փորձում էին ծանոթանալ միմյանց հետ։

Հանդիպումից ու ծանոթությունից հետո հերթն հասավ պարտադիր ջերմաչափմանը․ բոլոր ուսանողների ու աշխատակիցների մուտքը մասնաշենք թույլատրվեց հակահամաճարակային կանոններին ենթարկվելուց հետո։

«Այնպես ենք արել, որ առաջին կուրսեցիները տարբեր հարկերում ու հնարավորինս նույն լսարանում մնան, և օրերը տեղաշարժել ենք այնպես, որ մի օր՝ առաջին, մի օր՝ երկրորդ, մի օր երրորդ կուրսեցիները լինեն, շեղումներ տրված է և՛ ժամային, և՛ տարածական առումով»,- նոր կարգն է պարզաբանում ՀԱՊՀ-ի Գյումրիի մասնաճյուղի տնօրեն Աշոտ Պապոյանը։

Պոլիտեխնիկական համալսարանի Գյումրիի մասնաճյուղի 76 առաջին կուրսեցիներից բացի, աշխատանքային նոր ռեժիմ է սահմանվել նաև  դասախոսական կազմի համար։ Հիբրիդային կամ հեռավար եղանակով ուսուցմամբ կառաջնորդվեն բոլոր բուհերը։

«Բուհը որոշում է կայացրել, որ 65-ից բարձր տարիք ունեցող բոլոր դասախոսներն իրավունք ունեն դասերն անցկացնել բացառապես առցանց եղանակով»,- նշում է ՀՊՏՀ-ի Գյումրիի մասնաճյուղի տնօրենի պաշտոնակատար Կարեն Պետրոսյանը։

Հայաստանի տնտեսագիտական համալսարանի Գյումրիի մասնաճյուղի բակում առաջին կուրսեցիների համար տոնական միջավայր էին ստեղծել։ 91 առաջին կուրսեցիներին հանդիսավոր հանձնեցին ուսանողական գրքույկները, որից հետո, ըստ մասնագիտությունների, բաժանվեցին խմբերի։

«Մենք գործարկել ենք համալսարանի երկու մուտքերը՝ դիմավորելով բակալավրի առաջին կուրսեցիներին, բայց հետո, երբ սկսեցին արդեն սեպտեմբերի 15-ից բուհ որոշ օրերի գալ նաև բարձր կուրսեցիները, ապա այդ ժամանակ մենք ևս մեկ մուտք կգործարկենք»,- նշել է ՇՊՀ պրոռեկտոր Նազելի Ավետիսյանը։

Առանց հատուկ տոնական  ձևավորումների, բայց  թաքնված ժպիտով Շիրակի պետական համալսարանի 320 առաջին կուրսեցիների դիմավորեցին։ 32 մասնագիտական բաժիններում այս տարի այսքան  ուսանող են ընդունել։

Անհրաժեշտ հեռավորությունը պահպանելով ուսման գորխընացը կազամկերպելու համար   բուհի բոլոր լսարանները կօգտագործվեն ։ Այն խմբերը որոնցում  սովորողների թիվը գերազանցում է 20-ը,բաժանվել են ենթախմբերի։Բուհերում նոր կարգով ուսումնական գործընթացը կշարունակվի մինչև  սեպտեմբերի 15-ը,դրանից հետո կմշակվեն ուսումնական պրոցեսի նոր կարգավորումներ։ Մինչ այդ համալսարաններում կավարտվեն նաև հեռակա և մագիստրատուրայի բաժինների ընդունելության քննությունները,որի արդյունքում ուսանողների քանակը  բուհերում կավելանա