Պատգամավորներն առաջարկել են, կառավարությունն ընդունել է. փոփոխություններ հարկային օրենսգրքում

Խորհրդարանում այսօր օրակարգային է նաև «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» օրենքի նախագիծը երկրորդ ընթերցմամբ և ամբողջությամբ ընդունելու հարցը: Հիմնական զեկուցող, ֆինանսների նախարարի տեղակալ Արման Պողոսյանը ներկայացրել է պատգամավորների ներկայացրած առաջարկները, որոնց մի մասն ընդունվել է:

Առաջարկներից մեկը վերաբերում է այն հնարավորությանը, երբ ֆիզիկական անձանց վաճառվող ապրանքները կարող են ուղեկցվել ՀԴՄ կտրոններով, սա, ըստ փոխնախարարի, ընդունելի առաջարկություն է, և նախագծում կատարվել է համապատասխան փոփոխություն:

Հաջորդ առաջարկը վերաբերել է արտահերթ ստուգումներ անցկացնելու հնարավորությանը: Գործող օրենսդրությամբ՝ արտահերթ ստուգումներ կարող են իրականացվել ինչպես վարչապետի գրավոր հանձնարարականով, այնպես էլ երրորդ անձանցից ստացված տեղեկությունների հիման վրա՝ հարկային մարմնի ղեկավարի որոշմամբ:

«Մենք վերանայում ենք այս կանոնը և ամրագրում ենք, որ այսուհետ արտահերթ ստուգումներ կարող են իրականացվել բացառապես ՀՀ վարչապետի գրավոր հանձնարարականով՝ իհարկե, հնարավորություն պահելով օգտվել նաև երրորդ անձանցից ստացվող տեղեկություններից»,- ասաց Պողոսյանը:

Հաջորդ առաջարկն, ըստ Պողոսյանի, դարձյալ հարկային հսկողության ընթացակարգերին է վերաբերում, այն է՝ ստուգման ընթացքում հսկողություն իրականացնող տնտեսվարող սուբյեկտները կարող են վերցնել նաև համակարգչային տեխնիկա:

«Կարծում ենք՝ սա այնքան էլ լավ լուծում չէ, եկել ենք համաձայնության, որ համակարգչային տեխնիկա վերցնելու հնարավորությունը փոխարինում ենք էլեկտրոնային կրիչով համապատասխան տեղեկատվություն վերցնելու հնարավորությամբ և հստակ ամրագրում ենք, որ այդ տեղեկատվությունը պետք է վերաբերի բացառապես այդ գործողության առարկային»,- ասաց նա:

Առաջարկ է եղել նաև այն մասին, որ հարկային հսկողության ժամանակ տեսահսկողություն իրականացնելուց առաջ համապատասխան պաշտոնատար անձինք պետք է գրավոր ծանուցեն տվյալ հարկ վճարողի ներկայացուցչին: Այս առաջարկը ևս ընդունվել է:

Հուլիսի 1-ից հանրային սննդի ոլորտում գործունեություն իրականացնող անձանց հարկային համակարգը նախատեսվում է վերանայել, և որպեսզի այդ անցումը լինի սահուն, և տվյալ ոլորտում գործող տնտեսվարողների համար խնդիրներ չստեղծվեն, հնարավորություն է ընձեռվել տարվա երկրորդ կիսամյակի համար, որ նրանք հարկը հաշվարկեն իրացման շրջանառության 6 տոկոսի և ծախսերի երեք տոկոսի տարբերության չափով: Որոշ պատգամավորներ առաջարկել են այս միջանկյալ ժամանակահատվածն ավելի երկար սահմանել, մասնավորապես` 1,5 տարի: Ֆինանսների փոխնախարարը նշեց, որ այս հարցը երկար քննարկումներ է անցել, եկել են փոխադարձ համաձայնության՝ պահպանել վեցամսյա ժամանակահատվածը, որը նաև ընդունելի է տնտեսավարող սուբյեկտների համար։

Առաջարկ է եղել նաև ապրանքների դրոշմավորման համակարգի մասին: Պողոսյանի խոսքով՝ կառավարությունն առաջարկել էր որոշակի խումբ ապրանքների համար, մասնավորապես՝շոկոլադե սալիկների, կարագի կամ կաթնամթերքի որոշ այլ տեսակների համար սահմանել չդրոշմավորման շեմ, մասնավորապես՝ նախնական առաջարկի համաձայն, մինչև 50 գրամ քաշով ապրանքները պետք է չդրոշմավորվեին: Պատգամավորների առաջարկն էր՝ շեմը սահմանել 150գրամ։ Համաձայնության են եկել շեմը սահմանել 100 գրամ՝ պահպանելով 10 տոկոսի շեղման հնարավորությունը:

Առաջարկ է ստացվել նաև ապրանքների հետագծելիության հետ կապված համակարգի վերանայման հետ, մասնավորապես՝ կառավարությանը վերապահվի որոշակի իրավասություն՝ սահմանելու այս համակարգի կիրառության շրջանակը և հսկողության գործիքակազմը, սա ևս ընդունելի է եղել Կառավարության համար:

Կառավարության առաջարկով մի շարք խմբագրական բնույթի փոփոխություններ են կատարվել մի քանի հոդվածներում:

Իբրև ներկայացված առաջարկների հեղինակների՝ հիմնական զեկուցողը թվարկեց Խոսրով Հարությունյանին, Վահան Հարութունյանին, Ալեն Սիմոնյանին և մի քանի այլ պատգամավորների: Ձայնի իրավունք խնդրեց ՀՀԿ-ական պատգամավոր Խոսրով Հարությունյանը, ով հավելեց, որ առաջարկների հեղինակների շարքում չի նշվել Հակոբ Հակոբյանի անունը, ով գրեթե բոլոր առաջարկների համահեղինակն է: ԱԺ ղեկավարությունը խոստացավ շտկել այդ տեխնիկական բացթողումը: