Պատրիարք Կիրիլը կոչ է արել չանտեսել կրոնական առաջնորդների դերը ԼՂ հակամարտության կարգավորման հարցում

Համայն Ռուսիո պատրիարք Կիրիլը «Ռոսիյա» հեռուստաընկերությանը տված հարցազրույցում անդրադարձել է Ղարաբաղյան հակամարտությանը: Նա խոսել է Հայաստանի, Ռուսաստանի և Ադրբեջանի հոգևոր առաջնորդների հանդիպումների և խաղաղության գործընթացում ունեցած ներդրման մասին:

«Ես հույս ունեմ, որ խաղաղություն կլինի, և ես հիմնվում եմ ինչպես Հայաստանի, Ղարաբաղի, այնպես էլ Ադրբեջանի եկեղեցական և կրոնական իշխանությունների դիրքորոշումների վրա: Դուք գիտեք, որ Ռուսաստանի եկեղեցին նախաձեռնել է ղարաբաղյան հիմնախնդրի քննարկումը` Ամենայն հայոց կաթողիկոսի և Գերագույն մուֆթիի` Ադրբեջանի գերագույն մուսուլմանական առաջնորդ Փաշա-զադեի մասնակցությամբ: Մենք նման բանակցությունների մի քանի փուլ ենք անցկացրել և պայմանավորվել ենք շատ հարցերի շուրջ: Եվ ես կարծում եմ, որ այս բանակցությունների հիմնական արդյունքն այն է, որ երկու հոգևոր առաջնորդները, որոնց թիկունքում կանգնած է ժողովրդի մեծամասնությունը, խոսեցին միմյանց հետ, և այդ զրույցը շատ հանգիստ էր այն իմաստով, որ չկային մեղադրանքներ, չկար լարվածություն` չնայած յուրաքանչյուրն ուներ իր փաստարկները, և այդ փաստարկները բացահայտ արտահայտվում էին: Սակայն դրանք չեն ուղեկցվում, այսպես ասած, ատամների կրճտոցով, երբ հույզերը գերակշռում են և երբ երկխոսությունն, ըստ էության, վերածվում է խոսքերի պատերազմի: Նման բան երբեք չի եղել, և դրա պատճառն այն է, որ հենց հոգևոր առաջնորդներն են լիակատար պատասխանատվություն կրում իրենց ժողովրդի հոգևոր վիճակի համար: Իսկ ի՞նչ է հոգևոր վիճակը: Ո՞ր ուժը կգերակշռի` խաղաղության, սիրո, հանգստության թե՞ չարիքի ուժը, դրանից էլ կախված կլինի մարդկանց վարքը: Ուստի, կրոնական առաջնորդների դերը կարևոր է, մենք այն չենք չափազանցնում, նաև չենք թերագնահատում»,- ասել է պատրիարք Կիրիլը:

Նա նաև խոսել է բանակցությունների ընթացքում ձեռք բերված արդյունքների մասին` շեշտելով, որ եկեղեցու դերը չի կարելի անտեսել:

«Այս բանակցությունների ընթացքում ձեռք են բերվել շատ հստակ արդյունքներ` գերիների փոխանակում, հակամարտող կողմերի ոգեշնչելու համար կրոնական խորհրդանիշների, կրոնական դարձվածքաբանության, կրոնական շարժառիթների չկիրառում: Հանելով կրոնական գործոնն այս առճակատումից` մենք, իհարկե, զգալիորեն իջեցրինք այս հակամարտության հնարավոր աստիճանը` դրանից բխող բոլոր հետևանքներով: Ուստի, առանց չափազանցնելու կրոնական առաջնորդների դերը, ոչ մի դեպքում չպետք է անտեսել այն», – ասել է Համայն Ռուսիո պատրիարքը:

Համայն Ռուսիո պատրիարք Կիրիլը ամփոփել է ԼՂ հակամարտության մասին իր խոսքը` պատրաստակամություն հայտնելով իր խաղաղապահ ներդրումն ունենալ «այս բարդ խնդրի լուծման գործում», որը հնարավոր եղավ կասեցնել միայն ռուս խաղաղապահների տեղակայմամբ: