Արցախյան երկրորդ պատերազմի հետևանքով վիրավորում ստացած զինծառայողներին սայլակներ ու հենակներ տրամադրելու գործընթացը պարզեցվել է

Արցախյան պատերազմի հետևանքով վիրավորում ստացած զինծառայողներին և քաղաքացիական անձանց աջակցող միջոցներ տրամադրելու ընթացակարգը պարզեցվել է։ Անդամահատված և վիրավորում ստացած քաղաքացիներին ու զինվորներին պետական միջոցներով սայլակներ, հենակներ ու քայլակներ կտրամադրվեն առանց հաշմանդամության խմբի որոշման գործընթացն ավարտելու։ Նույն ընթացակարգով կիրականացվեն նաև պրոթեզավորումները։

Արմեն Միրզոյանը Մարտակերտի շրջանի Հաթերք գյուղից է, մի քանի շաբաթ է բուժում է ստանում Գյումրիի վերականգնողական կենտրոնում։ Հորաթաղի զորամասի ժամկետային զինծառայող է։ Պատերազմի առաջին օրերից եղել է առաջնագծում։ Թեժ մարտերից մեկի ժամանակ վիրավորվել է արկի պայթյունից, կորցրել աջ ոտքը։

Վիրահատությունից հետո Արմենը տեղաշարժվել է սայլակի օգնությամբ, հետո՝ հենակներով։ Մեկ շաբաթ առաջ ոտքի պրոթեզավորում է կատարվել, այժմ մասնագետների օգնությամբ սովորում է հարմարվել պրոթեզին ու քայլել։

Արմենի պրոթեզը բուժամարզական է, ծալվելու և այլ ֆունկցիաներ կատարելու հնարավորություն չունի։ Մասնագետների օգնությամբ փորձում է մարմնի հավասարակշռությունը կառավարել, որից հետո կանցնի նոր բազմաֆունկցիոնալ պրոթեզի։

«Մի քանի օրից կմեկնեմ մայրաքաղաք գրանցվելու, փետրվարին նոր պրոթեզները կլինեն  Հայաստանում, իմ պրոթեզը կփոխարինեն ավելի բազմաֆունկցիոնալով։ Դա, այսպես ասած, «խելացի» պրոթեզ է, աշխատում է ներվերի հետ, ինչ-որ այդ պահին թելադրեց իմ ուղեղը, այդպես էլ կաշխատի»,- նշում է Արմենը:

Վիրավորում ստացած զինծառայողներից շատերն արդեն վերականգնողական կենտրոն են գալիս քայլելու և տեղաշարժվելու համար նախատեսված աջակցող միջոցներով։

«Աջակցող միջոցները տրամադրվելու են ավելի պարզեցված ընթացակարգով: Բուժատեխնիկական հանձնաժողովը տեղում կգնահատի  քաղաքացու կարիքները և պետական հավաստագրով եռօրյա ժամկետում կտրամադրվեն անհրաժեշտ աջակցող միջոցները՝ սայլակներ, հենակներ ու քայլակներ: Անձը իր նախընտրությամբ, իրեն հարմար վայրից, իր կարիքին համապատասխան աջակցող միջոցները կստանա»,- SHANTNEWS.am-ին նոր պարզեցված կարգի վերաբերյալ պարզաբանումներ է տվել ՀՀ աշխատանքի և սոցիալական հարցերի նախարարության կառուցվածքային ստորաբաժանումների առանձին գործառույթները համակարգող խորհրդական Հայկ Մկրտչյանը:

Մինչ այս պետական հավաստագրով սայլակներ ու քայլակներ տրամադրում էր պետական գնումներով  ընտրված մեկ կազմակերպություն, այժմ՝ քաղաքացիներն իրենց ընտրությամբ, կարող են աջակցող միջոցներ ստանալ իրենց բնակավայրում գտնվող կազմակերպություններից։

«Եթե զինծառայողները կամ քաղաքացիական անձինք բուժում են ստանում հոսպիտալներում կամ մեկ այլ բուժհաստատությունում կամ առողջական վիճակով պայմանավորված չեն կարող ներկայանալ բուժատեխնիկական հանձնաժողովին, ապա նրանց հետ կապ հաստատելուց հետո հնգօրյա ժամկետում կազմակերպվում է այցելություն անձի գտնվելու վայր»,- նշել է Հայկ Մկրտչյանը:

Պետական հավաստագրերով տրամադրվող սայլակների, հենակների ու քայլակների դեպքում սահմանված է որոշակի արժեք, որը գերազանցելու դեպքում սարքը քաղաքացուն կտրամադրվի համավճարի տարբերակով։

Աջակցող սարքեր են համարվում նաև պրոթեզները։ Կախված անդամահատման աստիճանից՝ պետական միջոցներով պատրաստման և տրամադրման արժեքները տարբեր են։

Հունվարի 8-ից մինչ օրս ՀՀ աշխատանքի և սոցիալական հարցերի նախարարությունը պատերազմում վիրավորում ստացած 284  քաղաքացիների տրամադրել է աջակցող սարքեր, դրանցից 20-ը եղել են պրոթեզներ և օրթեզներ։