«Իրանի նոր իշխանությունները պետք է խիզախ և ուժեղ որոշումներ ընդունեն». Բլինկենը և Լե Դրիանը քննարկել են Իրանի հարցը

ԱՄՆ պետքարտուղար Էնթոնի Բլինկենն իր եվրոպական այցի շրջանակներում եղել է Ֆրանսիայում: Փարիզում նա բանակցություններ է վարել իր ֆրանսիացի գործընկեր Ժան-Իվ Լե Դրիանի հետ, հանդիպել է Ֆրանսիայի նախագահ Էմանուել Մակրոնին: Կողմերի քննարկման հիմնական թեմաներից մեկը եղել է Իրանը և վերադարձն այդ երկրի հետ միջուկային համաձայնագրին: Մինչև Փարիզ այցելելը Բլինկենը եղել է Գերմանիայում, այնուհետև նա կմեկնի Իտալիա:

ԱՄՆ պետքարտուղարի այցը Փարիզ տեղի է ունեցել Մեծ Յոթնյակի երկրների և ՆԱՏՕ-ի գագաթնաժողովներից 2 շաբաթ անց, երբ Եվրոպայում էր գտնվում Սպիտակ տան ղեկավար Ջո Բայդենը՝ հստակ ուղերձով, որ Միացյալ Նահանգները վերադարձել է:

Reuters գործակալության փոխանցմամբ՝ Էնթոնի Բլինկենին Ֆրանսիայում դիմավորել են, ինչպես տանը. նա իր դպրոցական տարիներին ապրել և սովորել է Փարիզում:

Կողմերի բանակցությունների գլխավոր թեմաներից մեկը եղել է Իրանը: ԱՄՆ-ն և Ֆրանսիան Իրանին հորդորել են վերադառնալ միջուկային համաձայնագրին, որից Վաշինգտոնը դուրս էր եկել նախկին նախագահ Դոնալդ Թրամփի օրոք: Իրանն էլ իր հերթին, պատժամիջոցների վերականգնումից հետո սկսել էր չպահպանել միջուկային համաձայնագրով նախատեսված պահանջները: Շուտով Վիեննայում տեղի կունենա Համատեղ գործողությունների համապարփակ ծրագրին վերադառնալու շուրջ բանակցությունների 7-րդ փուլը:

Ըստ Էնթոնի Բլինկենի՝ այդ բանակցությունների ընթացքում կողմերը պետք է փորձեն հարթել առկա շատ լուրջ տարաձայնությունները:

«Եթե Իրանը շարունակի գործարկել իր ժամանակակից ցենտրիֆուգները, եթե այն հետապնդի իր ծրագրի մյուս ասպեկտները, որոնք արգելված էին Համատեղ գործողությունների համապարփակ ծրագրով, ապա կգա մի կետ, որտեղից դժվար կլինի վերադառնալ համաձայնագրով սահմանված չափանիշներին», – ասել է ԱՄՆ պետքարտուղարն իր ֆրանսիացի գործընկերոջ հետ համատեղ մամուլի ասուլիսի ժամանակ:

ԱՄՆ պետքարտուղարի խոսքով՝ եթե Իրանն ունենա միջուկային զենք, ապա այն ավելի վտանգավոր կդառնա և կգործի ավելի անպատիժ կերպով: Բլինկենը նաև շեշտել է, որ միջուկային համաձայնագրին վերադարձը բխում է ԱՄՆ-ի ազգային անվտանգության շահերից:

Ֆրանսիայի արտգործնախարար Ժան-Իվ Լե Դրիանն իր հերթին շեշտել է միջուկային համաձայնագրին վերադառնալու կարևորությունը:

«Իրանի հարցում մեր դիրքորոշումը պարզ է: Մենք սպասում ենք, որ Իրանի իշխանությունները վերջնական դժվարին որոշումներ ընդունեն, որպեսզի արագ վերադառնանք 2015 թվականի միջուկային համաձայնագրին: Մենք հասել ենք ամենաբարդ փուլին: Իրանի նոր իշխանությունները պետք է խիզախ և ուժեղ որոշումներ ընդունեն», – նշել է Ժան-Իվ Լե Դրիանը:

Իրանի հարցը քննարկվել է նաև Էնթոնի Բլինկենի և Էմանուել Մակրոնի հանդիպման ընթացքում:

Արևմտյան երկրների հայտարարություներին արձագանքել է Իրանի արտգործնախարարության խոսնակ Սայիդ Խաթիբզադեն՝ նշելով, որ «դիմացի կողմերը պետք է վերջնական որոշումներ ընդունեն»:

Միջուկային համաձայնագրին վերադարձի շուրջ բանակցությունները ձգձգվում էին, քանի որ Իրանը պնդում էր բոլոր պատժամիջոցների վերացում: Ջո Բայդենի վարչակազմը հայտնել է, որ պատրաստ է չեղարկել տնտեսական պատժամիջոցները, սակայն կպահպանի մարդու իրավունքներին վերաբերող պատժամիջոցները, ինչպես նաև այն սահմանափակումները, որոնք առնչվում են արաբական աշխարհում ռազմական շարժումներին Իրանի աջակցությանը: