ՎԶԵԲ ծրագրով Գյումրիի որոշ փողոցների հիմնանորոգման ժամկետները խախտվել են

ՎԶԵԲ փողոցաշինական ծրագրով Գյումրիի կենտրոնի երկրորդական փողոցների անցած տարվանից կիսատ մնացած հիմնանորոգումներն ավարտվել են։ Այժմ այս տարվա ծրագրի երկրորդ տրանշի երրորդ փուլի շինարարությունն է ընթացքի մեջ, որում ներառված են Երկաթգծի բանավան թաղամասի Գարեգին Առաջինի և Մազմանյան փողոցները։ Երկուսն էլ համարվում են այս տարվա ծրագրով հիմնանորոգվող ամենաերկար փողոցները։ Մոտ 1․5 կիլոմետր երկարության փողոցներն ունեն  ներքին կոմունիկացիաների լուրջ խնդիրներ:

Երկաթգծի բանավան թաղամասի մի հատվածում փորված խրամուղիներով  խմելու ջրի նոր  խողովակներ են անցնելու։ 2700 մետր երկարության նոր ջրագիծն ունի տրանզիտ նշանակություն և նախատեսված է հարևան թաղամասերը խմելու ջրով ապահովելու համար:

«Այստեղ, քանի որ ճանապարհաշինություն պետք է իրականացվեր, որպեսզի ճանապարհի ասֆալտը չարվեր, հետո քանդվեր ու խրամուղիներ փորվեր, ծրագրի շրջանակներում  պատվերի փոփոխություն արվեց և դիտարկվեց որպես առաջնահերթություն։ Մենք այս հատվածը կավարտենք, նոր կսկսվի ճանապարհի բուն շինարարությունը։ Այս տրանզիտ ջրագիծը Թբիլիսյան խճուղին միացնում է Ախուրյանի Կուլակավան թաղամասի հետ»,- նշում է «Դորոժնիկ» ՍՊԸ ջրամատակարարման և ջրահեռացման համակարգերի վերականգնման ծրագրի ղեկավար  Գագիկ Կարապետյանը։

Նորոգվող մոտ 1․5 կմ երկարության փողոցում կառուցվում է նաև նոր անձրևաջրատար համակարգ, ինչը կլուծի այստեղ մշտապես կուտակվող սելավաջրերի հեռացման խնդիրը:

Նոր ջրահեռացման համակարգ է կառուցվում նաև ՎԶԵԲ ծրագրում ընդգրկված Մազմանյան փողոցի համար։ Տարիներով չկարգավորված խնդիրը՝ գոյություն ունեցող կոյուղաջրերի հոսքը, կանխելու համար անցկացնում են 300 մ երկարության նոր ջրահեռացման խողովակներ, որի համար ստիպված են եղել քանդել  կենտրոնական՝ Տերյան փողոցի ասֆալտը։

Արդեն երեք ամիս  է՝ շինարարները չեն կարողանում  կոյուղաջրի հոսքը կանխել,  խրամուղիներում միշտ  ջրեր են կուտակվում, ինչի հետևանքով էլ մասնակի փլուզումներ են:

«Ջուրը հոսում է հին  կոյուղատարներից և անձրևատարներից, որոնց դիտահորերը լրիվ փակված են ասֆալտի շերտի տակ։ Հատված-հատված վերանորոգում ենք, նոր խողովակներ տեղադրելով գալիս ենք առաջ, որոշվեց կուտակվող ջրերի հեռացման համար նոր ջրատար կառուցել ու ամբողջ  կոյուղաջրերը խողովակների միջոցով տեղափոխել մայր  ջրատար»,- նշում է «Բիլդր Քոնսթրաքշն» ընկերության աշխատակից Սպարտակ Մալխասյանը։

Ներքին կոմունիկացիաների կառուցումները խախտել են բուն փողոցաշինական աշխատանքների ժամկետները։ Փողոցների գրունտային շերտի  ամրացման ու  խճապատման աշխատանքները, որոնք պետք է սկսված լինեին, կավարտվեն այլ ժամկետներում:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։