Փոփոխություններ տրանսպորտային միջոցների տեխզննման կարգում․ օգոստոսի 16-ից պարտադիր է մեքենաների  տեխզննումը լիցենզավորված կայաններում

Փոխվել է ավտոմեքենաների տեխնիկական զննության կարգը։ Օգոստոսի 16-ից  բոլոր տեսակի տրանսպորտային միջոցները պարտադիր տեխզննում են անցնելու   լիցենզավորված կայաններում, որից հետո միայն վարորդներին կտրամադրվի համապատասխան քարտ։Այն  փոխարինելու է  մինչ այս գործածության մեջ եղած տեխզննության կտրոններին։ Առանց արատորոշման քարտի առկայության   տրանսպորտային միջոցների շահագործումն արգելվում է։

Մինչ այդ բանկային կազմակերպություններից տարեկան մեկ անգամ ձեռք բերված   տեխզննության կտրոնի առկայությունը մեքենաների դիմապակուն, առանց մասնագիտական զննության, բավարար էր, որպեսզի վարորդներն իրավունք ստանային  տրանսպորտային միջոցները շահագործել։ Այժմ բանկային կազմակերպությունները ազատվել են տեխզննության կտրոններ տրամադրելու պատասխանատվությունից ։

«Կտրոն հասկացությունն արդեն վերացել է, կտրոն չի լինելու, տրանսպորտային միջոցը մեզ մոտ մտավ՝ մենք զննություն ենք անցկացնում և զննության արդյունքում տալիս ենք արատորոշման քարտ։ Նախկինում 47 կետ էինք նայում՝ 67 ենթակետերով, իսկ հիմա նայելու ենք 27 կետ՝ 33 ենթակետերով»,- SHANTNEWS․am-ի եհտ զրույցում ասել է Արթիկի տեխզննման կայանի տնօրեն Յուրա Սահակյանը։

Մեքենայի տեխնիկական վիճակի բնութագիր քարտի տվյալները էլեկտրոնային շտեմարան են մուտքագրվում, որոնք հասանելի են դառնում ճանապարհային ոստիկանությանն ու ՀՀ ՏԿԵ նախարարությանը։ Անսարքություն հայտնաբերելու դեպքում համակարգը վարորդներին դիագնոստիկ  քարտ  տրամադրելու հնարավորություն չի տալիս։

Շիրակի մարզում շահագործվող տրանսպորտային միջոցների սպասարկման համար գործում է ընդամենը երկու լիցենզավորված տեխզննման կայան՝ մեկը Գյումրիում է, մյուսը՝ Արթիկում։ 4 օր է, որ նոր կարգն ուժի մեջ է, և արդեն կայաններն աշխատում են ծանրաբեռնված։

«Արատորոշման քարտը հնարավորություն է տալիս 20 օրվա ընթացքում թերությունը վերացնելուց հետո ներկայանալ նորից զննման։ 20 օրվա ընթացքում գալու դեպքում, մենք զննումն իրականացնում ենք անվճար, 20 օրից ուշացավ նորից պարտադիր պետք է վճարվի»,- նշել է Արթիկի տեխզննման կայանի տնօրեն Յուրա Սահակյանը։

Մարզի տեխզննման կայանները  կարող են միաժամանակ սպասարկել 2-3 ավտոմեքենաների։ Գործում է վճարման սակագին, որը նույնն է բոլոր տեխսպասարկման կայանների համար։

«Թեթև մարդատար մեքենաների տեխսպասարկման արժեքը կազմում է 5500 դրամ, մինչև 3,5 տոննա կշռող մեքենաներինը՝ 7500 դրամ, 3,5 տոննայից ավելի տրանսպորտային միջոցներինը՝10500 դրամ։ Բնապահպանական վճարը հաշվարկվում է ըստ մեքենայի տարեթվի և  ձիաուժի»,-SHANTNEWS.am-ի հետ զրույցում  նշել է Գյումրիի տեխզննման կայանի տնօրեն Գագիկ Կոստանյանը

Առաջիկայում բոլոր տեխզննման կայաններում, մինչ զննություն անցկացնելը, պարտադիր վարորդներից կպահանջվի նաև գազաբալոնների ճնշափորձարկման և գազաբալոնային համակարգերի շահագործման վկայագրեր, առանց լիցենզավորված կազմակերպությունների տրամադրած վկայագրերի, տեխզննություն անցկացնելն արգելվում է։ Կարգելվի նաև տվյալ ավտոմեքենաների սպասարկումը   գազալցակայաններում։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։