Գյումրիի երաժշտական դպրոցների աշխատակիցները պահանջում են վճարել օգոստոսի աշխատանքային օրերի դիմաց

Գյումրիի քաղաքապետարանի ենթակայության գործող բոլոր վեց երաժշտական դպրոցների աշխատակիցները բողոքում են օգոստոս ամսվա աշխատավարձերի թերի վճարումներից։ Օգոստոսի 19-ից բոլոր աշխատակիցները վերադարձել են աշխատանքի, բայց տնօրինությունը փոխանցել է, որ մինչև նոր ուսումնական տարվա մեկնարկը աշխատանքային օրերի համար երաժիշտ-մանկավարժները չեն վարձատրվելու։

Այս մասին աշխատակիցներին տեղյակ են պահել ու պահանջել են, որ  իրենց   հաշվից արձակուրդ գնալու դիմումներ ներկայացնեն: Խնդիրը բարձրաձայնելու և հստակ պատասխաններ ստանալու ակնկալիքով այսօր երաժշտական դպրոցների աշխատակիցները հավաքվել էին Գյումրիի քաղաքապետարանում, պարզաբանումներ էին  պահանջում քաղաքապետարանի մշակույթի և ֆինանսատնտեսագիտական բաժինների ղեկավարներից։

«Մենք օգոստոսի 17-18-ից արդեն աշխատանքի ենք, արձակուրդից վերադարձել ենք, բայց մեզ ասում են, որ չենք վարձատրվելու, գաք-չգաք դպրոց միևնույնն է՝ չեք վարձատրվելու, որովհետև քաղաքը չունի բյուջե, քաղաքը չունի հնարավորություն»,- ասում է Գյումրիի թիվ 3 երաժշտական դպրոցի աշխատակից Լիանա Սեֆերյանը։

«Ըստ պայմանագրի՝ մենք 34 կամ 42 օր արձակուրդի մեջ ենք։ Եկանք աշխատանքի և մեզ հայտարարեցին, որ դուք չեք ստանալու աշխատավարձ։ Ձեզ խորհուրդ ենք տալիս՝ առայժմ հաշվից վերցնեք։ Դուք ի՞նչ եք պատկերացնում, մոտ 300 հոգի միանգամից հաշվից կարող են գնալ  արձակուրդ»,- ասում է Գյումրիի թիվ 4 երաժշտական դպրոցի վոկալիստ Գայանե Ղուկասյանը։

Երաժշտական դպրոցներում ֆինանսական խնդիրներ կային դեռ նախորդ տարի՝  համավարակի ընթացքում։ Բոլոր աշխատակիցներին ուղարկել էին հարկադիր պարապուրդի, բայց նրանց հասանելիք արձակուրդային գումարները չէին վճարվել։ Հետո  խնդիրը կարգավորվեց: Հիմա էլ պարզվում է, որ երաժշտական դպրոցներում  ծագած ֆինանսական նոր խնդիրների պատճառը ժողգործիքների բաժինների ֆինանսավորման դադարեցումն է:

Այս բաժինները մինչև 2020-ի մարտ ամիսը 100 %-ով ֆինանսավորվել են պետբյուջեից: Հետո պետության մասնաբաժինը նվազեցվել է մինչև 50 տոկոս, իսկ 2020-ի մայիսից՝ ընդհանրապես դադարեցվել: Համաձայն որոշման, ժողգործիքների բաժինների դասատուներին աշխատավարձ պետք է վճարվի աշակերտների վարձավճարների հաշվին: Բայց երաժշտական  դպրոցների տնօրենները կրճատել են բոլոր աշխատակիցների աշխատավարձերը:

Երաժշտական դպրոցների մանկավարժների հետ հանդիպմանը քաղաքապետարանի ֆինանսատնտեսագիտական բաժնի պետ Լենա Ջիլավյանը հայտարարել է, որ համայնքային բյուջեից 6 երաժշտական դպրոցների համար տարեկան հատկացվում է 340 միլիոն դրամ: Վարձավճարների հաշվին աշխատավարձ ստանալու որոշումը վերաբերում է միայն ժողովրդական նվագարաններ դասավանդող մանկավարժներին: Ըստ Լենա Ջիլավյանի, մյուս բոլոր աշխատակիցները պետք է վճարվեն ըստ կնքված պայմանագրերի  և ունեցած դասաժամերի։

«Ձեր աշխատավարձը կստանաք ժամանակին, նորմալ, ինչքան որ ներկայացվում է, ժող գործիքները չեմ կարող ասել, որովհետև իրավունք չունեմ։ Մնացած ձեր ներքին խնդիրները, ժամաքանակը կխնդրեմ ձեր տնօրենների հետ պարզեք։ Ես իրավունք չունեմ ձեր տնօրեններին ասեմ, որ դուք ձեր հաշվից արձակուրդ վերցնեք»,- նշել է Լենա Ջիլավյանը։

Իսկ  մշակույթի բաժնի պետին ուղղված հարցերը վերաբերում էին երաժշտական դպրոցներում դասաբաշխումներին, որոնք, ըստ աշխատակիցների, կատարվում են   կամայականորեն: Մշակույթի բաժնի պետԼիլիթ Թովմասյանը նշել է, որ այս գործընթացում իրենք վերահսկողական գործառույթ չունեն:

«Բոլոր այն պարագաներում, երբ տնօրենը որոշում է իրեն ավելի հարմար է չտալ այս ուսուցչին դասաժամը կամ տալ մեկ ուրիշ ուսուցչի, որևէ մարմին միջնորդել տնօրենի այդ գործողությունները իրավասու չէ։ Խախտվել է աշխատանքային ձեր իրավունքները, խախտվել է ձեր աշխատանքային պայմանագիրը՝  դիմեք համապատասխան մարմինների և ստացեք ձեր հարցերի իրավական լուծումը։ Համայնքապետարանի մշակույթի բաժինը  երբեք, որևէ կերպ չի միջամտում դպրոցների տնօրենների աշխատանքին»,-նշել է մշակույթի բաժնի պետը։

Քաղաքապետարանում ունեցած հանդիպման ելքը դրական էր միայն աշխատավարձերի մասով: Երաժշտական դպրոցների ուսուցիչները, բացի ժողգործիքներ դասավանդող մասնագետներից, ստացան հավաստիացումներ, որ անպայման կվճարվեն օգոստոս ամսվա աշխատանքային օրերի համար: