Կցանկանայինք մեր հայ գործընկերներից կոնկրետ գաղափարներ լսել, թե ինչ ձևով ԵՄ-ն կարող է օգտակար լինել Հայաստանին. Սվիտալսկի

Հայաստանի բնակչության 70 տոկոսը վստահում է Եվրամիությանը: Այս թիվը 5 տոկոսով ավելին է 2017 թվականի ցուցանիշի համեմատությամբ: Վիճակագրական այս տվյալներն այսօր լրագրողների հետ հանդիպմանը ներկայացրել է Հայաստանում Եվրամիության պատվիրակության ղեկավարը:

Պյոտր Սվիտալսկին  անդրադարձել է նաև վարչապետ Փաշինյանի բրյուսելյան հանդիպումներին, Հայաստանի նոր կառավարության հետ համագործակցության հեռանկարներին, Արցախի շուրջ վերջին զարգացումներին:

Եվրամիության պատվիրակության ղեկավարը հերթական հանդիպումը լրագրողների հետ սկսեց սոցհարցման արդյունքների վերլուծությամբ: Ապրիլ-մայիս ամիսներին Հայաստանի հազար քաղաքացիների շրջանում արված հարցման գլխավոր արդյունքը՝ Եվրամիության հանդեպ վստահության 70 տոկոսը, 5 նիշով ավելին է նախորդ տարվա ցուցանիշից և շատ ավելի մեծ է Եվրասիական տնտեսական միության հանդեպ վստահության մակարդակից:

Այստեղ էլ նվազում է գրանցվել: Հայաստանում, ըստ Եվրամիության տվյալների, Եվրասիական տնտեսական միությանը վստահում է արդեն հարցվածների կեսից քիչը՝ 48 տոկոսը: Այնուամենայնիվ, ըստ որոշ գնահատականների, Եվրամիության կողմից փոփոխված իրողություններով Հայաստանի հանդեպ քաղաքականության էական փոփոխություն չի գրանցվել, ինչի մասին բրյուսելյան հանդիպումների ավարտին նշել էր նաև վարչապետը:  Եվրամիության պատվիրակության ղեկավարը այս կարծիքին չէ:

«Մենք իսկապես վճռական ենք շարունակել աջակցությունը Հայաստանին: Մենք կցանկանայինք լսել մեր հայ գործընկերներից  կոնկրետ գաղափարներ, թե ինչ կերպ, ինչ ձևով ԵՄ-ը կարող է օգտակար լինել Հայաստանին: Մի շարք նախարարություններից մենք ստացել ենք նախնական գաղափարներ, բայց կցանկանայինք ունենալ համապարփակ պատկեր: Երբ դա ունենանք, կքննարկենք նաև, թե ինչպես կարող ենք օգնել»,- նշել է Պյոտր Սվիտալսկին:  

Սվիտալսկու խոսքերով՝ Հայաստանը ԵՄ-ից ակնկալում է ինստիտուցիոնալ, տեխնիկական և ֆինանասկան աջակցություն: Միևնույն ժամանակ, պատվիրակության ղեկավարը ընդգծում է, որ Եվրամիությունը բարդ կառույց է և դժվար է հասկանալ, թե ինչպես է այն աշխատում, որոնք են օգնության հնարավորությունները:

Հայաստանի համար ֆինանսավորման ծրագրերը 2017-2020 թվականների կտրվածքով են ընդունել, սակայն հնարավորություն կա 25 տոկոսով ավելացնել ֆինանսավորման չափը: Իշխանությունների հետ համագործակցության հեռանկարներից խոսելով՝ Սվիտալսկին ակնարկում է կառավարության որոշ անդամների երիտասարդ լինելու և փորձառության պակասը: Հարց է հնչում  դեսպանին, թե արդյո՞ք դա նաև վստահության պակասի, կամ թերհավատության նշան է:

 «Նրանցից մի քանիսը իսկապես կառավարությունում աշխատելու փորձառություն չունեն: Ինչպես գիտենք կառավարությունում աշխատելը դա շատ լուրջ գործ է: Բայց պետք է նաև ասեմ, որ երկու ամիս   աշխատելուց հետո փոխոխություն կա: Նրանք հանձնառու են և էներգիայով լեցուն, ու ես թերհավատ չեմ, այլ ճիշտ հակառակը՝ լավատես եմ»,- ասել է նա:  

Եվրամիությունը պատրաստ է աջակցել նաև նոր Ընտրական օրենսգրքի հետ կապված հարցերում: Սվիտալսկու խոսքերով՝ սպասում են դրա շուրջ հանրային քննարկումների ավարտին և կոնկրետ ուղերձների: Եվրամիության դեսպանը անդրադառնում է նաև Շենգենյան վիզաների խնդրին: Արդյո՞ք վիզաների քաղաքականության խստացումը, որը պայմանավորված է միգրացիոն պրոցեսների աննախադեպ աճով, կազդի նաև Հայաստանի վրա:

 «Հայաստանի պարագայում աշխատակարգերում փոփոխություն չի լինի: Վիզաների դյուրացման պայմանավորվածությունները այստեղ կմնան ուժի մեջ, կարծում եմ՝ փոփոխություն չի լինի նաև վճարումների չափի մեջ»: 

Իսկ կփոխվի՞ արդյոք Եվրամիության վերաբերմունքն Արցախի հարցում, ամեն վայրկյան սադրանքի պատրաստ ադրբեջանական իշխանությունների ռազմատենչ հայտարարություններից հետո: Արդյո՞ք դա ճնշում չէ ժողովրդավարության հանդեպ հարցին, Սվիտալսկին տվեց հետևյալ պատասխանը.

 «Առաջին շփումը տեղի ունեցավ Հայաստանի նոր արտգործնախարարի և Ադրբեջանի արտգործնախարարի միջև: Ես կարող եմ ասել, որ ԼՂ հարցը շատ լուրջ էր երևում Բրյուսելում Եվրամիության հանդիպումների օրակարգում: Մենք լսեցինք մտահոգությունները և անելու ենք այն, ինչ կարող ենք անել: Մեզ նոր լարվածություն պետք չէ, հատկապես այս տարածաշրջանում»: