Արցախից Շիրակի մարզ տեղափոխված ընտանիքների բնակարանային պայմանները բարելավվում են բարեգործական ծրագրով

44 օրյա պատերազմից հետո Շիրակի մարզ վերադարձան հիմնականում այն ընտանիքները, որոնք տարիներ առաջ էին Արցախ տեղափոխվել։ Ռազմական գործողությունների օրերին լքել էին իրենց բնակավայրերը նորից վերադառնալու հույսով։ Բայց երբ պարզ դարձավ, որ բնակավայրերի մեծ մասն անցել է թշնամու վերահսկողության տակ, առաջնային դարձավ այս ընտանիքների բնակարանային խնդիրը։ Բնակարանների վերանորոգման և զբաղվածության ապահովման հարցում Շիրակի և Գեղարքունիքի մարզեր տեղափոխված ընտանիքներին աջակցում է  «Հայկական Կարիտաս»-ը։ Իրականացնում է Հայաստանում կեցության և կենսապահովման պայմանների բարելավում հակամարտությունից տուժած բնակիչների համար ծրագիրը։

Անուշ Հովոյանի ընտանիքը Մեծ Մանթաշից տասը տարի առաջ է ամուսնու և հինգ երեխաների հետ Քաշաթաղի շրջանի Հերիկ գյուղ տեղափոխվել։ Այնտեղ ևս երեք երեխա են ունեցել, տուն ու տեղ են դրել։ Պատերազմի օրերին վերադարձել են Մանթաշ։ Տարիներ առաջ Արցախում էին վերաբնակիչ, հիմա՝ հարազատ գյուղում։ Ընտանիքը երկու հորթ է որպես աջակցություն ստացել կենսապահովման պայմանները բարելավելու բարեգործական ծրագրով։

«10 տարի Արցախում ապրեցինք։ 2020-ի հոկտեմբերի 5-ին կլրանար 10 տարին։ Նույն օրը լքեցինք Քաշաթաղի շրջանի Հերիկ գյուղը։Վերադարձանք Մեծ Մանթաշ։ Հարազատներից մեկի տանն ենք բնակվում։ Ընդամենը երկու սենյակ էր։ Որեշեցինք ձևափոխել։ Բարեգործական ծրագիրը, հարազատներն ու բարեկամները օգնեցին, հարմարեցրինք։ Նաև անասուններ ենք ձեռք բերել, նորից տնտեսություն ենք հիմնում»,- shantnews-ին ասել է Անուշ Հովոյանը։

Մանկավարժ Նաթելա Սարոյանն էլ վերադարձել է իր երբեմնի սիրած գործին։ Նույն ծրագրի շահառուներից է, կարի մեքենա է որպես աջակցություն ստացել: Կար ու ձևով փոքրիկ եկամուտ է ստանում։ 1999-ին են Քաշաթաղի շրջանի Գետամեջ գյուղ տեղափոխվել։ Արցախում մանկավարժների կարիք կար։ Պատերազմի առաջին օրերին է Արթիկ տեղափոխվել։

Քաշաթաղում թողած տան բանալիները տիկին Նաթելան պահում է, դա նրա ընտանիքի համար Արցախում թողած հիշողությունների խորհրդանիշն է։ Նոր կյանք սկսել են Արթիկում 20 տարի առաջ թողած իրենց տանը, որը վերանորոգում են։

« Խոհանոցի, միջանցքի դռներն ու պատուհաններն ենք փոխել, տանիքն ենք վերանորոգել։ Մեզ տարբեր շինանյութեր են հատկացրել։ 20 տարի անխնամ թողած տունը վերանորոգում ենք։ Վերադարձել ենք Արթիկ՝ Արցախում թողնելով ամեն ինչ։ Դուռը փակել եմ, բանալիները՝ հետս բերել»,- ասել է Նաթելա Սարոյանը։

Բարեգործական ծրագիրը մի քանի ուղղություն ունի։ Առաջինը բնակարանային պայմանների բարելավումն է, հաջորդը՝ զբաղվածության ապահովումը։ Ծրագիրը Շիրակի և Գեղարքունիքի մարզեր տեղափոխված արցախցիների համար է։ Շահառու ընտանիքների թիվն էլ փոքր չէ։

«Կեցության պայմանների բարելավման բաղադրիչով շահառու է դառնալու 500 ընտանիք Շիրակի և Գեղարքունիքի մարզերում։ Կենսապահովման պայմանների բարելավման բաղադրիչով՝ 400 ընտանիք՝ կրկին նույն մարզերից։ Այս պահին արդեն իսկ աշխատում ենք կեցության բաղադրիչով՝ 340, իսկ կենսապահովման բաղադրիչով՝ 2902 ընտանիքի հետ։ Աշխատում ենք Արցախից տեղափոխված ընտանիքների, տեղահանվածներին հյուրընկալողների, ինչպես նաև տեղի բնակիչների հետ, որոնք տուժել են պատերազմի հետևանքով»,- shantnews-ին ասել է «Հայկական կարիտաս»-ի  ծրագրի ղեկավար Քրիստինե Մխիթարյանը։

Ծրագիրը մեկ տարի տևողությամբ է, գործելու է մինչև 2022-ի ապրիլ ամիսը։ Պատերազմի և դրան հաջորդած օրերին բարեգործական ծրագրերը հումանիտար ուղղություն ունեին։ Հիմա Արցախում բնակավայրերը կորցրած ընտանիքների համար աջակցությունը պետք է լինի նոր բնակավայրում նոր կյանք սկսելու համար։