Տեղական բյուջեից քաղաքացիներին դրամական օգնություն հատկացնելու նախագիծը թեժ քննարկումների պատճառ Գյումրիի ավագանու նիստում

Այսօր Գյումրիի ավագանու հերթական նիստն է տեղի ունեցել։ Օրակարգային  հարցերից թեժ բանավեճի պատճառ են դարձել  հատկապես ֆինանսական հատկացումներին վերաբերող զեկույցները։ Քաղաքապետի ֆինանսական գծով խորհրդական Լենա Ջիլավյանը նախ ավագանու հաստատմանն է ներկայացրել 2021 թվականի  բյուջեի կատարողականը, ըստ որի եկամուտների պլանը կատարվել է 99,3 տոկոսով, իսկ սեփական եկամուտները հավաքագրվել են մոտ 91 տոկոսով։

Օրակարգային հարցերի շարքում անհամաձայնություն առաջ եկավ, երբ հաստատման ներկայացվեց  տեղական բյուջեից քաղաքացիներին դրամական օգնություն տրամադրելու նախագիծը։ Գումարը կազմում էր մեկ միլիոն 385 հազար դրամ։ Ավագանու «Զարթոնք» խմբակցության անդամ  Վարդևան Հակոբյանը պարզաբանում պահանջեց՝ ինչ սկզբունքով է կատարվում շահառուների ընտրությունը։

«Մենք ինչքան դիմումներ ենք ստացել և ինչքանն է ուսումնասիրվել, նախորդ ամիս ինչքան է եղել, ինչի մնացածին չի տրվել գումար, ինչպես է կատարվել ուսումնասիրությունները»,- հարցրեց ավագանու անդամ Վարդևան Հակոբյանը:

Հանձնաժողովի նախագահն ու ֆինանսական բաժնի պատասխանատուները ընդիմադիր ավագանու անդամներին հավաստիացրին, որ շահառու ընտանիքների ընտրությունը կատարվում է  կարիքի գնահատումից ելնելով, հանձնաժողովն առաջնորդվում է մի քանի չափորոշիչներով։

« Հանձնաժողովի նախագահը ես եմ, տնայցեր չեն կատարվել: Նախնական քննարկում է տեղի ունեցել, որի ժամանակ բանավոր՝ ոչ գրավոր կերպով, հստակ չափորոշիչներ են սահմանվել՝ երեխաների անչափահասություն, տնակում բնակվելու փաստը, ինչպես նաև տանը հաշմանդամություն ունեցող կամ  թոշակառու լինելու հանգամանքը: Մի խոսքով՝ չափորոշիչները սահմանված են և ըստ այդմ էլ կատարվել է գումարների բաշխումը»,-նիստում հայտարարեց ավագանու «ՔՊ»  խմբակցության անդամ Լիլիթ Մուրադյանը:

«Նոյեմբեր ամսից մենք անընդհատ բանավիճում ենք էս հարցի շուրջ, ինդիրը որն է: Մենք էստեղ մի դեպքում ասում ենք, որ կա սահմանված չափորոշիչ, աշխատել է հանձնաժողովը, բայց համոզված եմ, որ չկա չափորոշիչ սահմանված, հանձնաժողովը չի աշխատել: Ա՛յ երբ որ էդ հարցերը կարգավորվի, ուրիշ հարցեր էլ չի լինի»,- հայտարարել է  ավագանու «Ապրելու երկիր» խմբակցության անդամ Կարեն Մալխասյանը:

Ավագանու ըդդիմադիր խմբակցությունները պահանջեցին ընտանիքների կարիքները գնահատել տնայցերով, ինչը պնդեցին , որ հանձանաժողովը չի անում։ Թեժ քննարկումն այս դեպքում էլ  ավարտվեց 124 ընտանիքներին դրամական օգնություն տրամադրելու նախագծի հաստատումով։ Ավագանու անդամները շարունակեցին պահանջել հաջորդ նիստին ներկայացնել  չափորոշիչների հստակ մեխանիզմ։

Այսօրվա ավագանու նիստի օրակարգում էր  66 միկրոավտոբուսների շահագործման համար քաղաքապետարանին կից  ՓԲԸ ստեղծելու, ընկերության կանոնադրությունն ու հաստիքացուցակը հաստատելու հարցը։Բայց երբվանից նոր տրանսպորտը դուրս կգա երթուղի, այդ մասին ոչինչ հայտնի չդարձավ։

Եվ վերջում՝ Գյումրիի ավագանու նիստի մշակութային մասը․ որոշվեց նկարչուհի Մարիամ Ասլամազյանի «Կյանքի դավթարը» ինքնակենսագրական  անգլալեզու գրքի տպագրման համար գումար հատկացնել,  իսկ մեկ այլ որոշմամբ Գյումրիի ավագանին  Գյումրիի Պատվավոր քաղաքացու կոչում շնորհեց ՀՀ մշակույթի վաստակավոր գործիչ Սուսաննա Մկրտչյանին։