Կառավարությունը տնտեսական քաղաքականության մեջ որևէ որոշում կայացնելիս 7 չափում է, 1 կտրում. Նիկոլ Փաշինյան

ՀՀ վարչապետ Նիկոլ Փաշինյանը օգոստոսի 9-ի նիստում անդրադարձավ բիզնես-ոլորտի ներկայացուցիչների շրջանում առկա որոշ մտահոգություններին և վարվող ներդրումային քաղաքականությանը:

«Վերջին շրջանում կան ահազանգեր, կարծիքներ, որ մեր որոշ շեշտադրումներից տնտեսվարողները որոշակիորեն լարվում են: Խոսքն այն մասին է, որ մենք այս որոշումները մանրամասնորեն քննարկում ենք, խոսում ենք մոնիթորինգից: Ես կարծում եմ՝ հակառակը, մենք այս քննարկումներով դրական ուղերձ ենք հղում բիզնեսին, տնտեսությանը, որ մենք կարող ենք ազնիվ, արդար ձևով այս բոլոր կարգավորումները աշխատեցնել: Կարևոր է, որ այս պրոցեսը տեղի ունենա հրապարակային, որ հանրության, ընկերությունների շրջանում կասկածներ չծագեն ստվերային գործարքների մասին»,- ասաց վարչապետը:

Փաշինյանի խոսքերով՝ կառավարությունը շահագրգիռ է, որ ներդրումները հոսեն Հայաստան: Վարչապետը գոհունակությամբ ընդգծեց, որ ԱՎԾ տվյալներով՝ տնտեսական ակտիվության բավական բարձր ցուցանիշ է գրանցվել: Փաշինյանը նշեց, որ դրական ցուցանիշների գրանցումը հետաքրքիր է հատկապես այն առումով, որ ընդունված է կարծել՝ քաղաքական այսպիսի փոփոխություններից հետո սովորաբար տնտեսությունը, տնտեսական ակտիվությունը կտրուկ անկում է ապրում:

«Մեր հեղափոխությունը այստեղ էլ կարևոր առանձնահատկություն գրանցեց: Պաշտոնական վիճակագրությամբ՝ մենք հունիսին ունեցել ենք 9․6 տոկոս տնտեսական ակտիվության ցուցանիշ, իսկ կիսամյակային տվյալով այն կազմել է 8․9 տոկոս, այսինքն՝ հեղափոխությունը, քաղաքական այս փոփոխությունները ոչ միայն տնտեսական անկման չեն բերել, չնայած սովորաբար այդպես էլ լինում է, այլև բերել են տնտեսական ակտիվության ավելացման»,- ասաց նա:

Դա, ըստ վարչապետի, կապված է օբվյեկտիվ և սուբյեկտիվ պատճառների հետ՝ լավ բերք կա գյուղատնտեսությունում, բայց նաև անշարժ գույքի ոլորտում, շինարարությունում ակտիվություն է նկատվում: Կառավարության կարևոր անելիքը, այստեղ, ըստ վարչապետի, առաջին հերթին տնտեսության բնականոն զարգացմանը չխանգարելն է, երկրորդը՝ օգնելը, նաև օգնելով չխանգարելը:

«Կառավարությունը տնտեսական քաղաքականության մեջ որևէ որոշում կայացնելիս յոթ չափում է, մեկ կտրում, որ խնդիրը լուծվի»,- նշեց Փաշինյանը:

Կառավարության ղեկավարի խոսքերով՝ տնտեսվարողների շրջանում առկա հաջորդ մտահոգությունը կապված է ՊԵԿ որոշակի ակտիվության հետ. շատ են լինում դժգոհություններ, որ վերահսկողությունը մեծացել է, ստուգվում է՝ ՀԴՄ կտրոն տրվո՞ւմ է, թե՞ ոչ:

«Ընդհանուր առմամբ՝ մեր ուղերձը եղել է հստակ՝ մեր կառավարությունը և բոլորս այսօրվա Հայաստանում կարող ենք ակնկալել, որ յուրաքանչյուր քաղաքացի իր համար ի սկզբանե որդեգրում է օրինապահ վարքագիծ, և եթե սահմանված է, որ ՀԴՄ կտրոնները պետք է տրվեն, ուրեմն պետք է տրվեն, և քաղաքացիները պետք է վստահ լինեն, որ այդ գումարները, որ վճարում են պետբյուջե, պետք է արդյունավետ ծախսվեն»,- նշեց գործադիրի ղեկավարը:

Փաշինյանն ընդգծեց՝ իրենց քննարկումները նվիրված են յուրաքանչյուր լումայի ծախսման արդյունավետությունը բարձրացնելուն: Նա նաև խնդրեց, որ ՊԵԿ-ն իր գործունեության մեջ առաջնորդվի այնպես, որ հանկարծ քաղաքացիների շրջանում անարդարության զգացողությունը, որը հաղթահարվել է, կրկին չառաջանա: Վարչապետն ընդգծեց՝ եթե մեկը կասկածի, հետո համոզվի, որ իր նկատմամբ այլ վերաբերմունք կա, կողքի աշխատողի նկատմամբ՝ այլ, լուրջ խնդիր կունենան, և ինքը կկիսի այդ քաղաքացու մտահոգությունները: Փաշինյանը կրկին հիշեցրեց՝ իրենք պետք է պատժող քաղաքականություն չվարեն, այլ պետք է շարունակեն քաղաքացիների հետ երկխոսությունը, որ բոլորն իրենց գործողություններում առաջնորդվեն օրինականության առաջնահերթությամբ:

«Ի վերջո օրինականությունը պահպանելը մեզնից յուրաքանչյուրի առաջնահերթությունն է, և ես հուսով եմ, որ մենք այս ճանապարհով առաջ կգնանք»,- ասաց նա:

ՀՀ տնտեսական զարգացման և ներդրումների նախարար Արծվիկ Մինասյանը, արձագանքելով վարչապետի խոսքին, նշեց, որ չափազանց կարևոր էր այդ ուղերձը, քանի որ իրենք էլ նախարարությունում հանդիպում են ներդրողների և պոտենցիալ ներդրողների, ուստի կարևոր էր, որ այս խոսքերը հենց վարչապետից լսեն:

«Շատ զգայուն է բիզնեսը, այս խոսքերը վստահություն են ներշնչում նաև իրենց, որ այս ամենը արվում է՝ օրենքի առջև բոլորի հավասարությունը ապահովելու համար: «Աչքով չտանք»՝ տնտեսական ցուցանիշները լավն են, բայց շատ կարևոր են հետագա բարեփոխումները»,- նշեց Մինասյանը: