«Բաքուն այլևս չի դիտարկում Փարիզը որպես միջնորդ Մակրոնի սադրիչ հայտարարություններից հետո»․ Ալիև

Ադրբեջանի նախագահ Իլհամ Ալիևը հայտարարել է, որ Ֆրանսիայի նախագահ Էմանուել Մակրոնի անհարկի և սադրիչ հայտարարություններից հետո Բաքուն ոչ մի հնարավորություն չի տեսնում Փարիզի համար՝ որպես միջնորդ մասնակցելու հայ-ադրբեջանական հարաբերությունների կարգավորմանը:

Ալիևն ընդգծել է, որ Մակրոնն իր հայտարարության մեջ ասել է, որ «Ֆրանսիան երբեք Հայաստանին չի թողնի»:

«Դա, ինչպես ասում են, երկկողմ հարաբերությունների հարց է», – նշել է Ադրբեջանի նախագահը:

Նրա խոսքով ՝ Ֆրանսիայի նախագահը նաեւ միտումնավոր հայտարարություններ է արել Ռուսաստանի Դաշնության հասցեին, այն է ՝ «Ռուսաստանն ադրբեջանական խաղ է խաղացել»:

«Մենք մեր կողմից նման հայտարարությունները կտրականապես դատապարտում ենք, մերժում և հետագայում ոչ մի հնարավորություն չենք տեսնում Ֆրանսիայի կառավարության նման վերաբերմունքի դեպքում որեւէ դեր խաղալ հայ-ադրբեջանական հարաբերությունների կարգավորման գործում»,-հավելել է նա ։

Նախագահը նշել է, որ Ադրբեջանը բարի կամք է դրսևորել և համաձայնություն է տվել Պրահայում քառակողմ հանդիպմանը Ֆրանսիայի նախագահի մասնակցությանը:

«Թեև Ֆրանսիան որևէ առնչություն չունի Ադրբեջանի և Հայաստանի միջև հարաբերությունների հետ, Ֆրանսիան, որպես Մինսկի խմբի համանախագահ, այո, միջնորդական առաքելության մանդատ ուներ, բայց քանի որ ղարաբաղյան հակամարտությունը կարգավորվել է, և Մինսկի խմբի ծառայությունների կարիք չկա, առավել ևս, որ այդ ծառայությունները, եթե կարելի է այդպես արտահայտվել, «արջի» ծառայություն էին, ինչպես ասացի, Մինսկի խումբը ոչինչ չի արել, մեր տարածքի ոչ մի սանտիմետր չի ազատագրվել, Ադրբեջանը, բարի կամք դրսևորելով, թույլ է տվել Ֆրանսիայի նախագահին մասնակցել այդ հանդիպմանը», – ասել է Ալիևը։

Նրա խոսքով՝ հակաադրբեջանական կեղծ արտահայտություններ է թույլ են տվել ոչ միայն Ֆրանսիայի նախագահը, այլև այդ երկրի ԱԳ նախարարը։

Ադրբեջանի ԱԳՆ-ն կողմնակալ և անընդունելի է համարում Ֆրանսիայի նախագահ Էմանուել Մակրոնի հայտարարությունները Հարավային Կովկասում և հայ-ադրբեջանական հարաբերությունների կարգավորման վերաբերյալ:

Ավելի վաղ Ֆրանսիայի նախագահ Էմանուել Մակրոնը Ռուսաստանին մեղադրել է Հայաստանի և Ադրբեջանի միջև վերջին բախումները սադրելու համար:

«Ի՞նչ է տեղի ունեցել սահմանին վերջին երկու տարում։ 5000 ռուս զինվորներ գտնվում են այնտեղ՝ իբր թե սահմանների պահպանությունը երաշխավորելու համար, սակայն ռուսներն օգտվեցին այս հակամարտությունից, ադրբեջանական խաղը խաղացին՝ թուրքական մասնակցությամբ, որպեսզի թուլացնեն Հայաստանը, մի երկիր, որի հետ նախկինում մտերիմ էին»,- ասել է Մակրոնը՝ հավելելով՝ «պարզ ասած, Ֆրանսիան այստեղ է, ներկա է և միջնորդ ուժ է, իսկ հայերին չենք լքի»։

Ռուսաստանի ԱԳՆ պաշտոնական ներկայացուցիչ Մարիա Զախարովան աղաղակող և բացարձակապես անընդունելի է համարել Մակրոնի հայտարարություններն այն մասին, թե իբր Ռուսաստանը օգտագործում է Լեռնային Ղարաբաղի հակամարտությունը Հարավային Կովկասն ապակայունացնելու համար։

Պուտինը հայտարարել է, որ զարմանքով կարդացել է Մակրոնի հայտարարությունները Ղարաբաղի հարցում ՌԴ դերի մասին։