ՌԴ Ֆինանսների փոխնախարարն այցելել է Կոտայքի մարզ․ ծանոթացել է ՄԱԿ-ի Պարենի համաշխարհային ծրագրի «Դպրոցական սնունդ» ծրագրին

Ռուսաստանի Դաշնության Ֆինանսների փոխնախարար Տիմուր Իգորևիչ Մաքսիմովն ու Միջազգային ֆինանսների վարչության պետ Պավել Վալերևիչ Սնիսորենկոն, ինչպես նաև միջազգային զարգացման աջակցության բաժնի ղեկավար Դարյա Կիրիլլովան և բաժնի ղեկավարի տեղակալ Ալինա Կրասիլնիկովան Հայաստան են այցելել՝ նպատակ ունենալով տեղում ծանոթանալու ՄԱԿ-ի Պարենի համաշխարհային ծրագրի կողմից բոլոր մարզերում ներդրված «Դպրոցական սնունդ» ծրագրին, որն աստիճանաբար փոխանցվում է Հայաստանի կառավարությանը:

Այցին միացել է նաև ՌԴ «Ճյուղային սննդի ինստիտուտ»-ի նախագահ Վլադիմիր Չերնիգովը։

Այցի գլխավոր նպատակն էր անձամբ տեսնել Ռուսաստանի Դաշնության կողմից Հայաստանի Հանրապետությանը տրամադրված պարենային ապահովության, մարդկային ռեսուրսների և համայնքների զարգացմանը միտված երկարաժամկետ ֆինանսական աջակցության արդյունքները: Այցի ընթացքում նրանք նաև ծանոթացել են, թե ինչպես է «Դպրոցական սնունդ» ծրագիրը դարձել ներառական մոդել, որի շնորհիվ Հայաստանի 10 մարզերի 1-4-րդ դասարանցիները ձեռք են բերել մաքրության/հիգիենայի, բնապահպանության, առողջ սննդակարգի և առողջության հետ կապված հմտություններ ու գիտելիքներ:

Այցի ընթացքում ՀՀ ԿԳՄՍ նախարարության հանրակրթության վարչության քաղաքականության մշակման և վերլուծության բաժնի պետ Անուշ Լալազարյանը ուղեկցել է ռուսաստանյան պատվիրակությանը՝ կիսվելու ծրագրի հաջող փորձով և ՀՀ կառավարության, Ռուսաստանի Դաշնության և Պարենի համաշխարհային ծրագրի միջև արժեքավոր համագործակցության ազդեցության արդյունքներով:

Ռուսաստանյան պատվիրակությունը ՄԱԿ-ի Պարենի համաշխարհային ծրագրի հետ միասին այցելել է Կոտայքի մարզի Չարենցավանի թիվ 6 հիմնական դպրոց, ուր տարրական դասարանների ավելի քան 400 դպրոցականներ ամեն օր սնվում են տաք և առողջարար կերակուրներով:

Չարենցավանի դպրոցում ՊՀԾ-ն ցուցադրել է դպրոցական սննդի և խոհանոցային ենթակառուցվածքներում կատարված ներդրումները, որոնց շնորհիվ հնարավոր է դարձել միջավայր փոխել և «թխվածքաբլիթներից» անցում կատարել երեխաներին պատշաճ սննդի տրամադրմանը, ինչպես նաև ցուցադրել տարիների նշանակալից նվաճումները:

ՊՀԾ-ն Ռուսաստանի Սննդի ճյուղային ինստիտուտի (SIFI) փորձագետների աջակցությամբ սկսել է մարզ առ մարզ և դպրոց առ դպրոց արդիականացնել դպրոցական ճաշարանների և խոհանոցների ենթակառուցվածքները՝ քանդված և ոչ պատշաճ տեսքով տարածքները վերածելով հարմարավետ, լուսավոր և ժամանակակից սարքավորումներով հագեցած ճաշարանների:

 «Դպրոցական սնունդ» ծրագրի կայունությունն ապահովելու նպատակով՝ ՊՀԾ-ն ՌԴ «Ճյուղային սննդի ինստիտուտի» փորձագետների հետ մշակել է տրանսֆորմատիվ մոտեցում, որը թույլ է տալիս դպրոցներին միրգ և բանջարեղեն աճեցնել՝ միաժամանակ ընդլայնելով դպրոցների կարողությունները և ծրագրում ներդնելով ժամանակակից, մաքուր և բնապահպանական տեխնոլոգիաներ, ինչպիսիք են՝ հիդրոպոնիկ և կաթիլային ոռոգման համակարգերը, հակակարկտային ցանցերն ու արևային կայանները:

ՊՀԾ-ն ինտեգրված մոտեցում է ցուցաբերում Հայաստանում «Դպրոցական սնունդ» ծրագրի նկատմամբ՝ նպաստելով առողջ սննդի հանրայնացմանն ու համայնքային զարգացմանը:

Հավելենք, որ «Դպրոցական սնունդ» ծրագիրը մեկնարկել է 2010 թվականին՝ Ռուսաստանի Դաշնության ֆինանսական աջակցությամբ և ՌԴ «Ճյուղային սննդի ինստիտուտի» հետ տեխնիկական համագործակցությամբ։