Լեգենդար ֆուտբոլիստ Պելեն կյանքից հեռացել է

Ֆուտբոլի Բրազիլիայի հավաքականի կազմում աշխարհի եռակի չեմպիոն Պելեն մահացել է 82 տարեկանում: Այս մասին հինգշաբթի հայտնել է բրազիլացու դուստրը՝ Քելլի Նասիմենտուն, Instagram-ի իր էջում։

«Մենք քեզ անսահման սիրում ենք։ Հանգչիր խաղաղությամբ», – ասվում է հաղորդագրության մեջ։

2021 թվականի սեպտեմբերին Պելեի մոտ ախտորոշվել է հաստ աղիքի ուռուցք։ 2022 թվականին նա երկու անգամ հոսպիտալացվել է Ալբերտ Էյնշտեյնի անվան կլինիկա՝ երեք չարորակ ուռուցքների (աղիքներ, լյարդ և թոքեր) և միզուղիների ինֆեկցիաների բուժման հետ կապված միջոցառումներ անցկացնելու համար։ 2022 թվականի նոյեմբերի 30-ին Պելեն չնախատեսված հոսպիտալացվել է մարմնի ընդհանուր այտուցով, ներառյալ սրտի անբավարարությունը։ Ավելի ուշ հաղորդվել էր, որ Պելեի օրգանիզմը դադարել է արձագանքել քիմիաթերապիային, ինչի կապակցությամբ նրան պալիատիվ օգնություն է ցուցաբերվել: Նախկին ֆուտբոլիստի դուստրերի խոսքով՝ Պելեն հիվանդանոց է տեղափոխվել կորոնավիրուսով պայմանավորված թոքային վարակի պատճառով։

Պելեն (Էդսոն Արանտիս դու Նասիմենտո) պատմության մեջ միակ ֆուտբոլիստն է, ով երեք անգամ դարձել է աշխարհի չեմպիոն՝ որպես խաղացող (1958, 1962, 1970) ։ Նա Բրազիլիայի հավաքականի պատմության լավագույն ռմբարկուների ցուցակում Նեյմարի հետ կիսում է առաջին տեղը՝ 92 խաղում խփելով 77 գոլ։ Ակումբային մակարդակում Պելեն 18 տարի ներկայացրել է բրազիլական «Սանթոսը», ևս երեք տարի հանդես է եկել ամերիկյան «Նյու Յորք Կոսմոսում», որտեղ կարիերան ավարտել է 1977 թվականին: Պելեն Գինեսի ռեկորդների գրքում է մտնում պրոֆեսիոնալ կարիերայի ընթացքում ամենաշատ գոլերի համար. ըստ որոշ տվյալների ՝ բրազիլացին խփել է 1281 գոլ:

Աշխարհի առաջնություններում Պելեի առաջին հանդիպումը ԽՍՀՄ հավաքականի դեմ խաղն էր 1958-ին Շվեդիայում կայացած առաջնությունում: Բրազիլացիները հաղթել են 2:0 հաշվով, իսկ Պելեն դարձել է գոլային փոխանցման հեղինակ: 1965-ի հուլիսին Պելեի դուբլը և գոլային փոխանցումը օգնեցին բրազիլացիներին 3:0 հաշվով հաղթանակ տանել Մոսկվայի «Լուժնիկի» մարզադաշտում, նոյեմբերին թիմերը կրկին հանդիպեցին Բրազիլիայում և ոչ-ոքի խաղացին (2:2), իսկ Ֆուտբոլի արքան իր հաշվին գրանցեց մեկ գնդակ:

Կարիերան ավարտելուց հետո Պելեն նկարահանվել է մի շարք ֆիլմերում և սերիալներում, կազմակերպել բարեգործական ծրագրեր։ 1994 թվականին դարձել է ՅՈՒՆԵՍԿՕ-ի բարի կամքի դեսպան, 1995 թվականին՝ Բրազիլիայի սպորտի նախարար։ 1997 թվականին նա Մեծ Բրիտանիայի թագուհի Եղիսաբեթ II-ից ստացել է ասպետի կոչում։