Ռուսաստանից բացի, որևէ այլ սուբյեկտ Լաչինի միջանցքում վերահսկողություն պիտի չունենա. Փաշինյան

Վարչապետ Նիկոլ Փաշինյանը հանդես է գալիս  տարին ամփոփող մամուլի ասուլիսով, որին մասնակցում են Հայաստանում գործող 4 տասնյակից ավելի լրատվամիջոցներ:

Վարչապետին առաջին հարցն ուղղել է «Շանթ» ՀԸ-ի լրագրող-մեկնաբան Վահագն Հակոբյանը․

«Պարոն վարչապետ, շուրջ մեկ ամիս է՝ Արցախի Հանրապետությունը շրջափակված է, և այս ընթացքում տարբեր շրջանակներից հնչող քննադատությունները, այդ թվում՝ Արցախից, ուղղված են նաև ՀՀ-ին: Այդ քննադատություններն այն մասին են, որ Հայաստանը գործուն քայլեր չի ձեռնարկում Արցախը շրջափակումից հանելու համար: Գործուն քայլեր բառակապակցությունն ուղիղ մեջբերում է այդ հայտարարություններից: Հաշվի առնելով մեր հնարավորությունները՝ կարմիր գծերը, ինչպե՞ս է Հայաստանը պատկերացնում հարցի լուծումը և ի՞նչ է անում այդ հարցի լուծման համար: Ի դեպ, այս հարցի շրջանակներում, երեկ ռուսական տարբեր հարթակներում լուրեր տարածվեցին, թե Հայաստանը վերջնագիր է ներկայացրել Ռուսաստանին՝ ժամկետ նշելով հունվարի 10-ը: Այսինքն՝ եթե այսօր չբացվի Լաչինի միջանցքը, ապա Հայաստանը դուրս կգա ՀԱՊԿ-ից և ԱՊՀ-ից»:

Նիկոլ Փաշինյանն ի պատասխան ասել է․

«Նախ, ես չեմ կարծում, թե մենք մեր գործընկերների հետ պետք է վերջնագրի լեզվով խոսենք: Այն, ինչ մենք ունենք ասելու տվյալ իրադրության հետ կապված, արդեն հրապարակային ասվել է, և մեծ հաշվով, ավելացնելու ոչ մի բան չկա: Նաև հրապարակային գնահատականներ են տրվել Լաչինի միջանցքը փակելու փաստին, բայց նաև ես կուզենայի, որ ավելի ընդհանրական և խորը հասկանանք տվյալ իրավիճակի կոնտեքստը: Իմ գնահատմամբ՝ այն, ինչ տեղի է ունենում Լաչինի միջանցքում, առաջին հերթին ԼՂ-ի ժողովրդին, ԼՂ-ի հայությանը սեփական հայրենիքում ապրելու կամքը կոտրելու նպատակ ունի, և սա է ամենակարևոր կոնտեքստը խնդրի, և մենք պետք է սա հաշվի առնենք:

ՀՀ կառավարության դիրքորոշումներն արտահայտվել են, և մենք կարծում ենք, որ մեր գործիքակազմը պետք է լինի դիվանագիտական, այն է՝ միջազգային հնարավորինս մեծ ճնշում գործադրել Լաչինի միջանցքը բացելու հարցում:

2020թ.-ի նոյեմբերի 9-ի եռակողմ հայտարարության 6-րդ կետով, Լաչինի միջանցքի վերաբերյալ իրավական պարտավորություններ են դրված, ըստ էության, Ադրբեջանի Հանրապետության և ՌԴ-ի վրա: Այդ կետում, որը վերաբերում է Լաչինի միջանցքին,  եթե ուշադրություն եք դարձրել,  ՀՀ-ի վերաբերյալ որևէ ձևակերպում չկա: Եվ մենք կարծում ենք, որ այս առումով էլ մեր գործողությունները պետք է լինեն լիարժեք լեգիտիմ, և մենք այս գործընթացում, և ընդհանրապես, մեր բոլոր գործողություններում լեգիտիմությունը համարում ենք առանցքային նշանակություն ունեցող, ընդ որում, միջազգայնորեն լեգիտիմ դիրքորոշումները և մոտեցումները, և հարցին վերաբերվում ենք այս տրամաբանությամբ:

Այո՛, ՌԴ խաղաղապահ զորախումբը պիտի ապահովի Լաչինի միջանցքի բնականոն գործունեությունը: Եվ դա հստակ ձևակերպված է եռակողմ հայտարարության մեջ: Ճիշտ է՝ Ադրբեջանը 2020թ.-ի նոյեմբերի 9-ից հետո, ի հեճուկս պայմանավորվածությունների, ԼՂ-ում ռուսաստանցի խաղաղապահների մանդատը չի ստորագրել, բայց ես նաև ուզում եմ, որ տեղյակ լինեք, որ ՀՀ-ի և ՌԴ-ի պաշտպանության նախարարներն այդ մանդատը ստորագրել են, և եթե հիշողությունս ինձ չի դավաճանում, այդ փաստաթղթում չկա որևէ նշում, որ այն ուժի մեջ է մտնում միայն երեք կողմերի ստորագրումից հետո, բայց համենայն դեպս, ես համարում եմ, որ այդ փաստաթուղթը, որպես շարունակություն եռակողմ հայտարարության, գոյություն ունի, երկու երկրների ՊՆ նախարարները ստորագրել են, և մենք այդ հարաբերությունները պատկերացնում ենք հենց այդ շրջանակում, չնայած առանց այդ շրջանակի էլ՝ եռակողմ հայտարարությունն այդ հարցերի պատասխանը տալիս է. Լաչինի միջանցքը պետք է լինի ՌԴ խաղաղապահ ուժերի վերահսկողության ներքո: Ի՞նչ է դա նշանակում. դա նշանակում է, որ որևէ այլ սուբյեկտ Լաչինի միջանցքում վերահսկողություն պիտի չունենա: Մենք ակնկալում ենք, որ սա կկատարվի, և ինչպես կառավարության վերջին նիստում արտահայտվեցի, մեծ հաշվով, այստեղ խոսքը նաև Ադրբեջանի պայմանագրունակության մասին է, որովհետև, ի վերջո միջազգայնորեն ստանձնած պարտավորությունները պետք է կատարվեն:

Սրանից առաջ էլ Ադրբեջանը փորձ է արել պնդել, թե Հայաստանը եռակողմ հայտարարության ստանձնած ինչ-որ պարտավորություններ չի կատարել, դա բացարձակապես մտացածին է և իրականությանը չի համապատասխանում»,- ասաց Նիկոլ Փաշինյանը:

Մանրամասները՝ տեսանյութում։