Մենք հետևել ենք Հայաստանում տեղի ունեցող իրադարձություններին. Անգելա Մերկել

Գերմանիայի կանցլեր Անգելա Մերկելը ՀՀ վարչապետ Նիկոլ Փաշինյանի հետ համատեղ ասուլիսի ժամանակ խոսեց երկկողմ հանդիպման արդյունքների մասին:

«Ուրախ եմ առաջին անգամ որպես դաշնային կանցլեր հյուրընկալվել ձեր երկրում: Շնորհակալ եմ ջերմ և հյուրընկալ վերաբերմունքի համար, որ ցուցաբերվեց ինձ: Ուրախ եմ ձեր երկրում գտնվել ոչ միայն 100-ամյա ժողովրդավարությունը՝ Առաջին հանրապետությունը տոնելու շրջանակներում, այլև նոր փոփոխությունների ժամանակ»,- ասաց նա:

Մերկելը տեղեկացրեց, որ այցելել է Ծիծեռնակաբերդի հուշահամալիր: Նա ընդգծեց՝ գիտակցում են, թե 1915թ. ինչ սարսափելի իրադարձություն է տեղի ունեցել հայերի, հայ ժողովրդի նկատմամբ:

«Այս փաստը պետք է չմոռացվի, և մենք մեր ներդրումն ունենք այս հիշողության մշակույթի մեջ»,- նշեց Մերկելը:

Գերմանիայի կանցլերը շեշտեց այն հանգամանքը, որ Երևանում հյուրընկալվել են քաղաքի 2800-ամյա հոբելյանի շրջանակում, հյուրընկալվել են մի երկրում, որն ունի բարձր մշակութային և պատմական ավանդույթներ ու բաց է նոր ապագայի առջև:

«Մենք անցյալ ամիսներին հետևել ենք ձեր երկրում տեղի ունեցող իրադարձություններին՝ խաղաղ ցույցերին և, ինչպես ընդունված է ասել, թավշյա հեղափոխությանը: Մենք խոսեցինք այն մասին՝ ինչպիսին պետք է լինեն մեր հարաբերություններն առաջիկայում, ոչ միայն երկկողմ, այլև ԵՄ հետ: Մեր հարաբերությունները շատ լավն են, բայց կարող են ավելի ընդլայնվել: Մենք ունենք լավ օրակարգ ինչպես մշակութային, այնպես էլ տնտեսական հարցերի շուրջ: Ինձ ուղեկցում է տնտեսական պատվիրակություն, որն առիթ կունենա շփվել տեղի գործընկերների հետ»,- ասաց նա:

Մերկելը նշեց, որ իրենք կցանկանան համագործակցել թվայնացման, նաև ռեսուրսների՝ պաշարների ոլորտում, նա կարևորեց նաև համագործակցությունը կրթական ոլորտում: Կանցլերն ընդգծեց՝ Հայաստանում գործում են դպրոցներ, որտեղ գերմաներենի խորացված ուսուցում է իրականացվում և նշեց, որ այն կարելի է ընդլայնել, նա նաև նշեց, որ համագործակցության լավ օրինակներ կան գիտության ոլորտում, ասաց՝  այդ հարաբերությունները կարելի է էլ ավելի խորացնել:

«Մենք քննարկեցինք նաև Գերմանիայում ապաստան խնդրողների հարցը: Այս ոլորտում բավական լավ ենք համագործակցում, բայց կարելի է ավելին անել, որ հայ քաղաքացիները կարողանան բուժօգնություն ստանալ Գերմանիայում: Ուրախ եմ, որ Հայաստանին հաջողվել է կնքել ԵՄ հետ Համապարփակ և ընդլայնված գործընկերության համաձայնագիրը և ցանկություն ունի խորացնել իր հարաբերությունները ԵՄ հետ»,- նշեց Մերկելը:

Գերմանիայի կանցլերն ասաց, որ Գերմանիան իր հերթին ներդրում կունենա համաձայնագրի իրականացման մեջ hայկական կողմին օգնելու հարցում:

«Մենք պատրաստ ենք պատասխանատվություն ստանձնել ԼՂ հակամարտության խաղաղ կարգավորման շրջանակում: Գերմանիան Մինսկի խմբի անդամ է: Մենք խոսել ենք այն մասին, որ լավ կլինի, իհարկե, լուծել հակամարտությունները, բայց կարևոր է լուծել այդ հակամարտությունը լավ մթնոլորտում, և Գերմանիան պատրաստ է նաև այս առումով աջակցել Հայաստանին»,- ասաց նա:

Մերկելը նշեց, որ այսօր այցելել են նաև Թումո կենտրոն, որը, նրա գնահատմամբ, հրաշալի օրինակ է այն կրթական փիլիսոփայության, որ որդեգրել է Հայաստանի Հանրապետությունը՝ հնարավորություն տալով երեխաներին նորարար տեխնոլոգիաների ոլորտում դրսևորել իրենց:

«Մենք, իհարկե, քննարկեցինք նաև ներքաղաքական հարցեր՝ կոռուպցիայի դեմ պայքարի ուղղությամբ: Հայկական կողմին հաջողություն եմ մաղթում»,- ասաց Մերկելը: