Լիակատար անտարբերության ֆոնին՝ Ադրբեջանն Արցախը վերածել է «գետտոյի» ու կփորձի դարձնել համակենտրոնացման ճամբար

«Ադրբեջանը խախտել է հրադադարի ռեժիմը». ՊԲ-ն  այս օրերին պարբերաբար է այս մասին հաղորդագրություններ տարածում. բարեբախտաբար հայկական կողմը կորուստներ չունի: Հրադադարի խախտումների մասին հաղորդվել է ՌԴ խաղաղապահ զորակազմի հրամանատարությանը:

Ադրբեջանն իր վարած քաղաքականությանը հավատարիմ, այս օրերին շարունակ նաև հանդես է գալիս ապատեղեկատվության տարածմամբ, թե իբր ՊԲ ստորաբաժանումները կրակ են բացում Արցախի օկուպացված տարածքներում տեղակայված ադրբեջանական դիրքերի ուղղությամբ:

Հայկական կողմն էլ թշնամու իրականության հետ աղերս չունեցող լուրերը պարբերաբար հերքում է՝ բերելով հիմնավորումներ և հակառակի մասին վկայող փաստարկներ:

Ի վերջո, այս քայլերով ինչի՞ է  ձգտում Ադրբեջանն այս անգամ. թեմայի շուրջ «Հորիզոնին» Արցախից տեսակապի միջոցով հարցազրույց է տվել ԱՀ նախագահի խորհրդական Դավիթ Բաբայանը:

«Կամ Ադրբեջանը փորձում է, ըստ երևույթի, ճնշում գործադրել հայկական կողմերի վրա, կամ ինչ-որ կերպ փորձում է ստիպել, որպեսզի իր համար դրական կրկին զիջումներ արվեն , թե ունի ինչ-որ ծրագեր որոշ տեղերում, չգիտեմ՝ ինչ-որ մի քանի մետր և այլն, առաջ գնալու… սա ցույց կտա ժամանակը, բայց, իհարկե, ի դեմս Ադրբեջանի, մենք ունենք մի երկիր, որտեղ հայատյացությունը պետական գաղափարախոսություն է և սա երբևիցե չպետք է մոռանանք:

Այն օբյեկտիվ և սուբյեկտիվ, բազմաթիվ ծանրակշիռ պատճառներով ադրբեջանական պետության մեջ լինելու է գերիշխող՝ ինչքան որ Ադրբեջանը լինի անկախ:

Դժվար թե այնտեղ որևէ մեկը՝ ի տարբերություն հայկական հասարակության, գեթ մեկ մարդ կանգնի և ասի «մեղք են էս ղարաբաղցիները , դե թողենք հանգիստ ապրեն», այդպիսի բան չի լինի:

Իսկ ինչ վերաբերում է  (Ստեփանակերտ-Բաքու) երկխոսությանը, մենք դեմ չենք բանակցությություններին, երբևիցե դեմ չենք եղել, բայց այդ բանակցությունները չպետք է վերածվեն ներադրբեջանական երկխոսության. Ադրբեջանի հիմնական նպատակը սա է:

Ադրբեջանի մի խումբ մարդիկ, «Ադրբեջանի քաղաքացիներ»՝ «հայկական ծագում» ունեցող կամ «անհայտ ծագում» ունեցող, ինչպես իրենք են հիմա ասում, 35 տարի առաջ մի մեծ սխալ են արել, ժողովրդական լեզվով ասած՝ «ղալլաթ» են արել, մտածել են, որ կարելի է վերականգնել արդարությունը, պատմական ճշմարտությունը, բայց ձախողվել են, որովհետև նույնիսկ իրենց Մայր Հայաստանն իրենց չի ընդունում… այդպիսի բան են խոսում իրենց լրատվական դաշտում և հիմա պետք է «զղջալով, խնդրելով, պաղատելով, ուրեմն Ադրբեջանին պետք է համոզեն, որ գոնե ֆիզիկական անվտանգությունն իրենց ապահովի». եթե սա է հիմնական բանակցությունների թեման, ապա ինչի՞ մասին պետք է մենք խոսենք»,- ասել է Դավիթ Բաբայանը:

Շուրջ 7 ամիս է Արցախը շրջափակված է,  միջազգային հանրությունն էլ  լիակատար անտարբեր է, չեն գործում նաև անվտանգության մեխանիզմները, բարձրագույն դատարանի որոշումները։

Այս և Ադրբեջանի ծավալապաշտական նպատակների մասին մանրամասները՝ ամբողջական հարցազրույցում: