Դժվար կլինի, բայց իրար հետ կաշխատենք, որ արդյունքի հասնենք. վարչապետը՝ «Գումի շուկայի» վաճառողներին

«Կառավարությունը բարձր է գնահատում աշխատող մարդկանց, իմ գնահատանքը ձեզ: Աշխատանքը միշտ արդյունք է բերում, ճիշտ է՝ դժվար կլինի, բայց իրար հետ կաշխատենք, որ ձեր աշխատանքն արդյունք տա»,- «Գումի շուկա» կատարած շրջայցի ժամանակ, դիմելով գյուղմթերք վաճառողներին, ասաց ՀՀ վարչապետ Նիկոլ Փաշինյանը:

Վարչապետի խոսքին արձագանքելով՝ վաճառողները նշեցին, որ իրենք դժվարություններից չեն վախենում:

Փաշինյանը մոտենում էր վաճառակետերին, գյուղմթերքի գները ճշտում, ապա հարցնում՝ ինչն է գների թանկացման պատճառը: Գյուղացիները պարզաբանեցին՝ բադրիջանը թանկացել է, քանի որ մշակողները քիչ են, բադրիջանը քիչ է, բացի դրանից՝ նրանք նշում էին, որ ամեն տարի այս շրջանում առևտուրը նվազում է, իսկ այն, որ լոլիկը քիչ է, պատճառը, ըստ վաճառողների, եղանակն է:

Լրագրողների հետ զրույցում Փաշինյանը նշեց, որ շրջայցի ընթացքում գնաճի վերաբերյալ տարբեր բացատրություններ լսեց:

«Ահազանգեր կային, եկա, ցանկացա համոզվել ու պատճառներն իմանալ: Ես համոզվեցի, որ լոլիկի, վարունգի, սմբուկի գներն իսկապես բարձր են: Տարօրինակ է, որ այս սեզոնին ջերմոցային լոլիկ և վարունգ է հայտնվել»,- ասաց նա:

Դիտարկմանը, թե 67 տոկոսով ավելացել է արտահանումը, վարչապետը նշեց, թե արտահանման ծավալի ավելացումը դրական է:

«Պաշտոնական տվյալներն էլ են ցույց տալիս, որ, օրինակ՝ խնձորը կայուն վարքագիծ է ցույց տալիս, քանի որ վերջին տարիներին խնձորի արտադրության մեխանիզմ է ձևավորվել»,- ասաց նա:

Վարչապետին հրավիրեցին շուկայի անկյուններից մեկը, որտեղ օղի թորելու սարք կար: Փաշինյանին ասացին՝ ցանկալի կլիներ՝ կարողանային Հայաստանում թիթեղի արտադրություն կազմակերպել, մեկ-երկու ձուլարան ստեղծել:

«Նման նախագծեր կան: Ես համաձայն եմ ավելի լավ է՝ այստեղ արտադրություն անել, քան հանքաքարը վաճառել, որովհետև դրա արդյունքում ավելի մեծ եկամուտ ենք ստանում»,- նշեց Փաշինյանը:

Գյուղացիները նրան տեղեկացրին նաև, որ այդ սարքը մեծ պահանջարկ ունի՝ շատ է սպառվում, քանի որ, երբ կարկտահարության հետևանքով միրգը թափվում է, մարդիկ գերադասում են օղի թորել: