Քաղաքագետը Մերկելի տարածաշրջանային այցը պատմական չի համարում

Գերմանիայի կանցլեր Անգելա Մերկելի՝ տարածաշրջան կատարած եռօրյա այցը քաղաքագետ Ալեքսանդր Իսկանդարյանը, ի տարբերություն իր շատ գործընկերների, պատմական չի համարում: Ըստ նրա՝ այցը պատմական կարող են բնութագրել քաղաքական գործիչները՝ ելնելով իրենց հռետորաբանությունից, իսկ ինքը՝ որպես քաղաքագետ, այդ ամենին նայում է մասնագետի աչքերով ու տրամաբանությամբ:

Իսկանդարյանի պնդմամբ՝ Մերկելի այցը վաղուց պլանավորված արարողակարգային միջոցառում էր ու առավելապես տարածաշրջանի երկրների հետ ծանոթանալու բնույթ ուներ: Քաղաքագետի համոզմամբ՝ այցի արդյունքում տարածաշրջանի երեք երկրներում էլ մեծ արդյունքներ չեն արձանագրվել:

Այդուհանդերձ, քաղաքագետը այցը հետաքրքիր է համարում այն տեսակետից, որ երեք երկրների նկատմամբ էլ Գերմանիայի ղեկավարությունը դրսևորեց բոլորովին տարբեր մոտեցումներ: Վրաստանի պարագայում, ըստ քաղաքագետի, Մերկելը հայտարարեց վարկային միջոց տրամադրելու մասին, Ադրբեջանի պարագայում Գերմանիան փորձում է հասկանալ իրավիճակը, թե ինչ զարգացումներ են ընթանում կասպյան նավթի և դրա հետ կապված խնդիրների շուրջ, իսկ Հայաստանի դեպքում ուղղակի ծանոթացում էր նոր իշխանությունների հետ:

«Եթե խոսենք Վրաստանից, ապա Վրաստանը գոյություն ունի Արևմուտք – Ռուսաստան հակամարտության ենթատեքստում, Վրաստանը իրեն դրսևորում է արևմտահաճո կեցվածքով, և այդ դիրքորոշման պատճառով մի կողմից ինչ-որ գումար ստացավ՝ մոտ 200 միլիոն, մյուս կողմից, սակայն, Վրաստանը երբ փորձեց խոսել ՆԱՏՕ-ից, սառը ցնցուղ ստացավ: Ադրբեջանում՝ չնայած գազամուղի վերաբերյալ լրագրողական ուռճացված փուչիկին, պետք է ասեմ, որ դա լուրջ չէ, ոչ մի գազի արտահանում եվրոպական երկրներ չի լինելու՝ առնվազն առաջիկա տարիներին: Նավթի հետ կապված բանակցությունները հնարավոր է, որ մի փոքր նշանակություն ունենային, սակայն դա էլ լուրջ չէ, քանի որ Ադրբեջանը չունի այնքան նավթ, որ հետաքրքրի Գերմանիային: Ավելին, Մերկելը Բաքվում անդրադարձավ նաև մարդու իրավունքներին, ինչը այդ երկրի համար սպեցիֆիկ խոսակցության թեմա է»,- նշել է քաղաքագետը՝ Մերկելի՝ Վրաստան և Ադրբեջան կատարած այցը վերլուծելիս:

Իսկանդարյանը փայլուն քայլ է համարում Հայաստանի նոր իշխանությունների մոտեցումը Անգելա Մերկելին դիմավորելու հարցում և այն, ինչ տեղի ունեցով հետո՝ երեկոյան, Երևանում: Վարչապետի մակարդակով Մերկելին դիմավորելն, ըստ քաղաքագետի, դիվանագիտական լեզվով նշանակում է, որ Հայաստանը կարևորում է Գերմանիայի տարածաշրջանային մուտքը: Քաղաքագետն առավել հետաքրքիր է համարում երեկոյան կատարվածը, երբ կոտրելով բոլոր արարողակարգային մոտեցումները՝ վարչապետ Փաշինյանը կանցլերի հետ շրջագայության դուրս եկավ մայրաքաղաքի փողոցներում, ու նրանք անմիջականորեն շփվեցին ու լուսանկարվեցին հասարակ քաղաքացիների հետ: Քաղաքագետի համոզմամբ՝ քաղաքականությունը նման քայլերով չի առաջնորդվում, սակայն իմիջային նման մոտեցումները, որոնք մարդու մոտ առաջացնում են հաճելի հիշողություններ, կարող են մեծ ազդեցություն ունենալ քաղաքականության վրա:

Անգելա Մերկելը, որը, ըստ Իսկանդարյանի, Եվրոպայում հայտնի է իր երկաթյա բնավորությամբ ու դասվում է աշխարհի լուրջ ու սառը դատող քաղաքական կոշտ գործիչների շարքին, Հայաստանում ամբողջովին փոխվել էր, ժպտում ու նկարվում էր հասարակ ժողովրդի հետ: Սա, Իսկանդարյանի համոզմամբ, կարևոր գործոն է, ու Հայաստանի իշխանությունները պետք է կարողանան օգտագործել այդ գործոնը դիվանագիտական հարաբերությունները Գերմանիայի հետ էլ առավել խորացնելու համար:

«Ի տարբերություն Վրաստանի՝ Հայաստանը, կոպիտ ասած, նյութական առումով ոչինչ չխնդրեց Գերմանիայից, վարկային միջոցներ չուզեց, ու այդ արժանապատիվ կեցվածքը նոր կառավարության կողմից կիրառված հաջողված քայլ էր: Վարչապետ Փաշինյանը ստացավ Գերմանիա պաշտոնական այց կատարելու հրավերք, համոզված եմ, որ այս այցից հետո Գերմանիան ավելի դրական վերաբերմունք կունենա Հայաստան – ԵՄ համաձայնագրի վավերացման հարցում, ինչպես նաև հնարավոր է, որ արագացվի Հայաստանի քաղաքացիներին առանց վիզայի Եվրոպա մուտք գործելու թույլտվության գործընթացը: Համոզված եմ, որ այդ բանակցությունները կսկսվեն առաջիկայում»,- նշել է քաղաքագետը: