Ի՞նչ է պատասխանել Հայաստանի ՇՄ նախարարը ադրբեջանցի իր գործընկերոջ նամակին

Հայաստանի Շրջակա միջավայրի նախարարությունը ստացել է Ադրբեջանի նամակը՝ Երասխում կառուցվող մետաղաձուլարանի վերաբերյալ և պատասխանել դրան։ Հայաստանը պատասխան նամակում հերքել է Ադրբեջանի մեղադրանքները, թե գործարանը կառուցվում է բնապահպանական նորմերի խախտումներով և իր հերթին պահանջել, որպեսզի Ադրբեջանը դադարեցնի անօրինական ուժի կիրառումը Հայաստանի ինքնիշխան տարածքի վրա։

Ադրբեջանցի նախարարի նամակը հայ գործնկերոջը, կարծես, աննախադեպ երևույթ էր: Ի՞նչ բովանդակություն ուներ նամակը: Թեմային՝ «Հորիզոնի» տաղավարում անդրադարձել է Արտյոմ Երկանյանը։

«Իսկապես երբևէ նման բան չի արձանագրվել: Ադրբեջանական մամուլի տեղեկությունների համաձայն՝ Ադրբեջանի էկոլոգիայի և բնական ռեսուրսների նախարար Մուխտար Բաբաևը հուլիսի 7-ին պաշտոնական նամակով դիմել է իր հայ գործընկերոջը: Թե ինչ կերպով է այդ նամակը տեղ հասցվել, չի պարզաբանվում, բայց կարող եմ ենթադրել, որ նամակը շատ երկար ճանապարհ է անցել՝ հաշվի առնելով այն, որ հուլիսի 20-ին դեռ չէր հասել: Համենային դեպս Հայաստանի պաշտոնական աղբյուրները հերքել էին ամսի 20-ին այդպիսի նամակի գոյությունը: Այժմ արդեն հաստատում են նաև այն, որ Հայաստանի Շրջակա միջավայրի նախարար Հակոբ Սիմիդյանը պատասխանել է այդ նամակին:

Ադրբեջանի նախարարն իր նամակում պնդում էր, թե իբր միջազգային կոնվենցիաների համաձայն Հայաստանը նման հարցերում պարտավոր է համաձայնեցնել իր քայլերը Ադրբեջանի հետ, քանի որ այդ կառուցվող գործարանը սահմանից ոչ հեռու է և կարող է բացասական ազդեցություն ունենալ նաև Ադրբեջանի տարածքում, թե իբր նրանք մտահոգված են բնապահպանական վտանգներով և Հայաստանից պահանջում են անհապաղ դադարեցնել այդ գործարանի կառուցումը: Վկայակոչում են Էսպոյի միջազգային կոնվենցիան և պնդում են, որ եթե Հայաստանը չդադարեցնի այդ գործարանի կառուցման աշխատանքները, Ադրբեջանը իրավական համապատասխան գործընթացներ կսկսի: Հետաքրքիր է նաև այն, որ նամակում չեն թաքցրել Հայաստանի տարածքների նկատմամբ իրենց նկրտումները:

Պատասխան նամակում Հայաստանի շրջակա միջավայրի նախարարն Ադրբեջանից պահանջել է դադարեցնել այդ տարածքի հրետակոծումը, որի հետևանքով ոչ միայն գլխավոր ներդրողի՝ ամերիկյան ընկերության գույքն է տուժել, այլև ազգությամբ հնդիկ 2 բանվորներն են վիրավորում ստացել: Սիմիդյանը պարզաբանել է, որ Էսպոյի կոնվենցիան որևէ կերպ չի պարտադրում Հայաստանին ինչ-որ բան համաձայնեցնել Ադրբեջանի հետ:

Այդ կոնվենցիայում ասվում է այն մասին, որ երկիրը պարտավոր է հարևանին տեղեկացնել, եթե հարևանն այդ գործունեության ընթացքում կարող է բնապահպանական իրական վտանգներ ունենալ, այս դեպքում որևէ հիմք չկա կարծելու որ ինչ-որ բնապահպանական վտանգներ կարող են լինել. խոսքը գնում է ոչ թե լեռնահարստացուցիչ գործարան կառուցելու մասին, այլ՝  ընդամենը մետաղաձուլական, սովորական ամրաններ արտադրող գործարանի մասին, որի տեխնոլոգիան որևէ վտանգ ներկայացնել չի կարող»,-ասել է Արտյոմ Երկանյանը: