Վենետիկի 75-րդ կինոփառատոն. «Ոսկե առյուծ»-ի հավակնորդները

Իտալիայի Լիդո կղզում մեկնարկել է աշխարհի ամենահին՝ Վենետիկի 75-րդ կինոփառատոնը: Երեկ տեղի է ունեցել կինոփառատոնի բացման հանդիսավոր արարողությունը: Առաջիկա մի քանի օրերի ընթացքում փառատոնի շրջանակներում նոր պրեմիերաներ են սպասվում:

ShantNews.am-ը ներկայացնում է փառատոնին ներկայացված խոստումնալից մի քանի ֆիլմեր, որոնք չի բացառվում` առաջիկայում մյուս փառատոններին ու մրցանակաբաշխություններին կլինեն ֆավորիտների ցանկում:

Հիմնական մրցութային ծրագրի ֆավորիտ ֆիլմերը

«Մարդը լուսնի վրա» (First Man)

Հայտնի «Լա-Լա Լենդ»-ի ռեժիսոր Դեմիեն Շազելը երաժշտական դրամաներից ու մյուզիքլից հետո իր ուժերն է փորձում տիեզերական թեմատիկայի ասպարեզում: Նրա նոր ֆիլմը պատմում է ամերիկացի տիեզերագնաց և Լուսնի վրա առաջինը ոտք դրած մարդու՝ Նիլ Արմսթրոնգի մասին:

Գլխավոր դերում Ռայան Գոսլինգն է: Ֆիլմում նրա կնոջը մարմնավորում է Քլեր Ֆոյը, որը հայտնի է դարձել «Թագը» սերիալից, որում մարմնավորել է Եղիսաբեթ 2-րդ թագուհուն:

Հատկանշական է, որ Վենետիկի միջազգային կինոփառատոնի բացմանը ցուցադրել են  հենց «Մարդը լուսնի վրա» ֆիլմը:

«Լեռը» (The Mountain)

Ռիք Ալվերսոնի ֆիլմը պատմում է Էնդի անունով երիտասարդի մասին, որը մոր մահից հետո դեպրեսիայի մեջ է և որոշում է բուժման կուրսերի հաճախել լոբոտոմիայի մասնագետի մոտ:

Ֆիլմում բժշկի կերպարն իրական է, և ռեժիսորը ոգեշնչվել է հայտնի բժիշկ Ուոլթեր Ֆրիմանից: Ֆիլմում երիտասարդ տղային մարմնավորում է Թայ Շերիդանը, իսկ բժշկին` Ջեֆ Գոլդբլյումը:

«Դեպի լույսը» (Vox Lux)

Նատալի Պորտմանը վերջին շրջանում հանկարծակի զարմացրել է  բոլորին իր նոր կերպարներով: Ուղիղ մեկ տարի առաջ նրան տեսանք Ջեքի Քենեդիի դերում, ավելի ուշ նա նոր ֆիլմում մարմնավորել է տիեզերագնաց Լիզա Նովակին, իսկ «Դեպի լույսը» ֆիլմում նա հանդես է գալիս երգչուհի Սելեստայի կերպարում:

Ըստ սյուժեի` հերոսուհին կարողանում է հաղթահարել իր կյանքը փոխած ծանր անձնական դժբախտությունը և կարողանում է հասնել համաշխարհային ճանաչման ու փառքի: Ֆիլմում Նատալի Պորտմանը երգելու է ավստրալացի երգչուհի Սիայի (Sia) գրած երգերը:

Ֆիլմում խաղալու են նաև Ջուդ Լոուն և Սթեյսի Մարտինը:

«Սուսպիրիա» (Suspiria)

Իտալացի ռեժիսոր Լուկա Գուադանինոն այս անգամ որոշել է նկարել 70-ականներին հայտնի համանուն սարսափ ֆիլմի «ռիմեյքը»:

Ֆիլմը պատմում է Սյուզի անունով երիտասարդ ամերիկացի պարուհու մասին, որը տեղափոխվում է  Բալետի Եվրոպայի լավագույն դպրոցը: Նրա կյանքը շուտով մղձավանջի է վերածվում:

Գլխավոր դերում հանդես է գալիս Դակոտա Ջոնսոնը, իսկ Թիլդա Սուինթոնը մարմնավորում է Բալետի դպրոցի տնօրենին՝ մադամ Բլանին:

«Հռոմ» (Roma)

https://www.youtube.com/watch?v=fp_i7cnOgbQ

Մեքսիկացի օսկարակիր ռեժիսոր Ալֆոնսո Կուարոնը վաղուց արդեն համարվում է  ֆանտաստիկայի ժանրի վարպետներից մեկը, քանի որ նա կարողանում է մեծ լսարանի համար նախատեսված ֆիլմերում պահել հեղինակային ոճը:

Կուարոնի նոր ֆիլմը պատմում է մեքսիկացի աղքատ ընտանիքի մասին, որն ապրել է նախորդ դարի 70-ականներին: Այդ ընտանիքը մասնակից է դառնում դժբախտ դեպքի, որը պատմության մեջ հայտնի է «Քրիստի Կորպուսի կոտորած» անվանումով:

«Բաստեր Սկրագսի Բալլադը» (The Ballad of Buster Scruggs)

Իթան և Ջոել Քոեններն արդեն մեկ անգամ աշխատել են վեստերն ժանրում: Այս անգամ նրանք որոշել են պատմել Վայրի արևմուտքի պատմությունը 6 առանձին պատմություններով և տարբեր կերպարներով:

Հենց սկզբում Քոեն եղբայրները որոշել էին այս նույն թեմայով Netflix-ի համար սերիալ նկարահանել, բայց, ի վերջո, մոնտաժի ընթացքում ռեժիսորները հասկացել են, որ կարելի է 2 ժամանոց ֆիլմ ստանալ: Ֆիլմում նկարահանվել են Ջեյմս Ֆրանկոն, Լիամ Նիսոնը, Բրենդան Գլիսոնը, Զոի Կազանը և այլք:

«Ֆավորիտը» (The Favourite)

https://www.youtube.com/watch?v=DigPOPRlBvY

Հույն ռեժիսոր Յորղոս Լանտիմոսը «Լոբստեր» ու «Սուրբ եղջերուի սպանությունը» ֆիլմերից հետո նորից պատրաստվում է զարմացնել հանդիսատեսին: Նրա նոր ֆիլմի գործողությունները ծավալվում են 18-րդ դարի Անգլիայում, իսկ գլխավոր հերոսուհին Անգլիայի անհավասարակշռված բնավորություն ունեցող Աննա թագուհին է:

Թագուհուն մարմնավորում է Օլիվա Քոլմանը: Ֆիլմում դերեր ունեն նաև Էմմա Սթոունը, Ռեյչլ Վայսը ու Նիքոլաս Հոլթը։

«Սիստրս եղբայները» (The Sisters Brothers)

https://www.youtube.com/watch?v=FHUmTi9Qlk4

Ռեժիսոր Ժակ Օդիարը համարվում է կրիմինալ դրամաների վարպետներից մեկը: Նրա «Մարգարեն» ֆիլմը 2009-ին Կաննի միջազգային կինոփառատոնում արժանացավ «Գրան Պրի»-ի: Այս անգամ ռեժիսորը որոշել է իր կարիերայի ընթացքում առաջին անգամ անգլերենով ֆիլմ նկարահանել:

Գլխավոր դերերում հոլիվուդյան հայտնի աստղեր են՝ Ջեյք Ջելենհոլ, Խոակին Ֆենիքս, Ջոն Սի Ռայլի: Գործողությունները տեղի են ունենում 1951 թվականին, ԱՄՆ-ի Օրեգոն նահանգում, որտեղ այդ ժամանակներում ծաղկում էին ապրում սպանություններն ու քրեական աշխարհը: Ֆիլմը պատմում է  երկու եղբայրների մասին, որոնց թիրախում հայտնվել է հարուստ ոսկի որոնողը:

Ոչ մրցութային ծրագիր

Վենետիկի կինոթառատոնում մրցութային ծրագրից դուրս ցուցադրվելու է հայտնի դերասան Բրեդլի Քուփերի ռեժիսորական դեբյուտը՝ «Աստղ է ծնվել» ֆիլմը:

Ֆիլմում ներկայացվում է քանթրի երաժիշտ Ջեյսոն Մեյնի պատմությունն է, որն իր կարիերայում փառքի հասնելուց հետո շատ արագ մոռացվում է հանդիսատեսի կողմից: Օրերից մի օր երաժիշտը հանդիպում է երիտասարդ ու տաղանդավոր երգչուհի Էլլիին: Սկսվում է բուռն սիրավեպ, երգիչը օգնում է նաև Էլլիին անել առաջին  քայլերը երաժշտական ասպարեզում: Սակայն Էլլիի կարիերայի զարգանալուն զուգահեռ նրանց հարաբերություններն ավելի են վատանում:

Ֆիլմում գլխավոր հերոսներին մարմնավորում են Բրեդլի Քուփերն ու Լեդի Գագան: