Մարզերն ամփոփում են ամսվա ընթացքում կատարած աշխատանքները

Համաձայն հունիս ամսվա աշխատանքային պլանի՝ ՆԳՆ փրկարար ծառայության Գեղարքունիքի, Սյունիքի և Արարատի մարզային փրկարարական վարչությունների կողմից կազմակերպվել և անց են կացվել մի շարք ուսումնավարժություններ և սեմինարներ:

Մասնավորապես՝ Գեղարքունիքի մարզպետարանիի աշխատակազմում մարզային փրկարարական վարչության կողմից կազմակերպվել և անց է կացվել «Բնակչության պաշտպանության միջոցառումների կազմակերպումը և իրականացումը ուժեղ երկրաշարժի դեպքում» թեմայով շտաբային ուսումնավարժություն:
Ուսումնավարժության անցկացման հիմնական նպատակն էր՝

ստուգել և կատարելագործել մասնակիցների ունակություններն ուժեղ երկրաշարժի դեպքում բնակչության պաշտպանության միջոցառումների վերաբերյալ որոշումների ընդունման գործում,

կատարելագործել կառավարման մարմինների ղեկավար կազմի հմտությունները,

զարգացնել փոխհամագործակցությունը կառավարման մարմինների և կազմակերպությունների միջև:
Սևանի հատուկ ջրափրկարարական ջոկատի կողմից անցկացվել է «Որոնողափրկարարական աշխատանքների իրականացումը Սևանա լճում՝ կառամատույցին բախված ջրային արագընթաց մոտոցիկլի դեպքում» հատուկ տակտիկական ուսումնավարժություն, որի նպատակն էր կատարելագործել ջրափրկարարների հմտությունները ջրում որոնողափրկարարական աշխատանքներ իրականացնելիս:
Կարևորելով հրդեհային անվտանգությանն ուղղված հարցերը՝ մարզային փրկարարական վարչության ենթակա ստորաբաժանումների կողմից «Ճամբարակի թիվ 3 մսուր-մանկապարտեզ» ՀՈԱԿ-ում անցկացվել է «Հրդեհաշիջում և տարհանում մանկապարտեզներում» թեմայով հատուկ տակտիկական ուսումնավարժություն։

Սյունիքի մարզային փրկարարական վարչության ենթակա ստորաբաժանումների կողմից ևս կազմակերպվել և անց են կացվել հատուկ տակտիկական ուսումնավարժանքներ հրդեհաշիջման կազմակերպման հմտությունների բարելավման նպատակով, մասնավորապես՝ «ԱԳԿ սերվիս» և «Օյլեքս» ՍՊԸ-երում, Ագարակ քաղաքի «Մարիշոկ» ռեստորանային և հյուրանոցային համալիրում, «Քաջարանի արհեստագործական պետական ուսումնարան» և «Գորիսի Յու. Բախշյանի անվան թիվ 3 հիմնական դպրոց» ՊՈԱԿ-երում:

Արարատի մարզային փրկարարական վարչության ենթակա ստորաբաժանումների կողմից Արտաշատ համայնքի «Քաղցրաշենի Ալլա Գրիգորյանի անվան մսուր-մանկապարտեզ» ՀՈԱԿ-ում անց է կացվել «Հրդեհաշիջման կազմակերպումն ու իրականացումը նախադպրոցական հաստատություններում» թեմայով հատուկ տակտիկական ուսումնավարժություն:
Ուսումնավարժության նպատակն էր՝

նպաստել հրդեհների ժամանակ ուժերի և միջոցների ղեկավարման ունակությունների կատարելագործմանը,

ստուգել մարտական հաշվարկի պատրաստվածության վիճակը՝ իրենց առջև դրված հրշեջ մարտավարական խնդիրների լուծման ուղղությամբ,

կատարելագործել ՀՓՋ խմբի պետի գործնական ունակությունները բացազատման ժամանակ:
«Արտաշատ քաղաքի թիվ 4 մսուր-մանկապարտեզ» և «Արտաշատ քաղաքի թիվ 8 մանկապարտեզ» ՀՈԱԿ-երում անցկացվել են «Ազդարարում, տարհանում, պատսպարում» թեմայով գործնական պարապմունքներ:

Գործնական պարապմունքների ընթացքում էլեկտրական շչակների միջոցով իրականացվել է ազդարարում, որի արդյունքում կազմակերպվել է աշխատակիցների և երեխաների տարհանում ու պատսպարում։

Միևնույն ժամանակ անցկացվել է նաև «Երկրաշարժի ժամանակ բնակչության վարվելակերպի կանոնները» թեմայով սեմինար-պարապմունք՝ տեսաֆիլմի դիտումով, որի նպատակն էր երեխաներին և անձնակազմին ուսուցանել երկրաշարժի դեպքում վարքականոնների ճիշտ կիրառումը։

Նմանօրինակ միջոցառումների նպատակն է բարձրացնել բնակչության պաշտպանվածությունը՝ փոխանցելով տեղեկություններ, ուղղորդելով և ուսուցանելով վարքականոններ, որոնք հնարավորություն կտան վերջիններիս քայլեր ձեռնարկել և լինել հնարավորինս պաշտպանված։