Տարածության վրա կենդանիներին կառավարելու մասին զրույցները մինչև վերջերս ֆանտաստիկայի ժանրից էին: Եթե միջատների պարագայում դա քիչ թե շատ հնարավոր էր, ապա կաթնասունների դեպքում մասնագետները դա անհավանական էին համարվում: Օրերս, սակայն, կորեացի գիտնականների խումբը հակառակն ապացուցեց:
Nature Neuroscience հրատարակության տեղեկություններով՝ կորեացի նյարդակենսաբանները կարողացել են տարածության վրա կառավարել առնետներին: Գիտնականները օպտիկական մանրաթելից պատրաստված շատ փոքր չափերի տվիչներ են տեղադրել առնետների ուղեղի այն հատվածում, որը պատասխանատու է կենդանու շարժումների համար: Տվիչը լույսազգայուն է և, ըստ էության, կառավարումը տեղի է ունեցել լույսի ճառագայթների միջոցով: Մինչ տվիչների տեղադրումը գիտնականները սկանավորել են կրծողների ուղեղը, որպեսզի ճշտեն, թե նեյրոնների որ խումբն է ակտիվանում, երբ կենդանին նկատում է նոր օբյեկտ: Այնուհետ տվիչները միացվել են հենց այդ ակտիվացած գոտիներին, և ուղեղը ենթարկվել է լուսային ճառագայթման: Կենդանիների մոտ նոր հայտնաբերված օբյեկտին հետևելու գործողությունները և ընդհանուր ուղեղի ակտիվությունը պահպանվել է մինչև լուսային ճառագայթման դադարեցումը: Տվիչները տեղադրվել են միայն արու առնետների վրա: Այնուհետ մի քանի արուների հետ հատուկ փորձարարական սարքի մեջ տեղադրվել է մեկ էգ առնետ, կերակուրով լի կերակրաման և արհեստական շարժական գնդաձև մարմին: Երբ լույսի ճառագայթը ուղղվել է առնետների վրա, նրանց ուշադրությունը կլանել է միայն շարժվող գնդաձև մարմինը, իսկ ահա էգ առնետն ու կերակրամանը մնացել են անտեսված:
