Ռոբերտ Քոչարյանը կարող է ոչ այնքան իշխանությանը վնասել, որքան ՀՀ-ին. փորձագետ

Միջազգային և անվտանգության հարցերի հայկական ինստիտուտի փորձագետ Ռուբեն Մեհրաբյանի գնահատմամբ` ՀՀ երկրորդ նախագահ Ռոբերտ Քոչարյանն այսօր որպես քաղաքական գործոն գոյություն չունի: Այս մասին նա նշեց SHANTNEWS.am-ի հետ զրույցում:

«Ռոբերտ Քոչարյանը, քանի մեկուսացված չէ հասարակությունից, կարող է վնաս հասցնել, ընդ որում` ոչ այնքան իշխանությանը, որքան Հայաստանի Հանրապետությանը»,- ասաց նա:

Հարցին` կարո՞ղ է նա դառնալ համախմբող գործոն, Մեհրաբյանն արձագանքեց, որ նա կարող է համախմբել նրանց, որոնք «քաղաքական գործոն չեն»:

Անդրադառնալով պարբերաբար քննարկվող տեսակետին, թե երկրորդ նախագահի շուրջը կարող է համախմբվել նաև Հանրապետական կուսակցությունը, փորձագետը շեշտեց` կարող են համախմբվել հանրապետականի որոշ սեգմենտներ, որովհետև հանրապետականը ներկայում, որպես միասնական գործոն, այլևս գոյություն չունի:

«Հանրապետականի առանձին սփոյլեր-սեգմենտներ, այո՛, կարող են նաև միավորվել Ռոբերտ Քոչարյանի շուրջ, բայց քաղաքական գործոնի կարող է չձգեն, իսկ նրա` հասարակությունից մեկուսացմամբ այս ամենը ուղղակի հօդս կցնդի»,- նշեց նա:

Հարցին` համապետական ընտրություններին մասնակցելու պարագայում, հատկապես` եթե միացող այլ ուժեր էլ լինեն, ի՞նչ շանսեր կարող է ունենալ երկրորդ նախագահը, Մեհրաբյանը պատասխանեց, որ այդ իմաստով շատ բան կախված է լինելու կառավարության հակաքայլերից, հակաքայլերի արդյունավետությունից ու նաև քաղաքական հաջողություններից: Ամեն դեպքում, փորձագետը բացառում է, որ երկրորդ նախագահը հանրային աջակցություն կստանա, քանի որ կարծում է, որ հասարակական ընկալումները Քոչարյանի և նրան սատարող խմբակների նկատմամբ ընդգծված նեգատիվ են:

Խոսելով դրսի ուժերի, մասնավորապես` Ռուսաստանի սատարմամբ ինչ-ինչ հաջողությունների հասնելու նրա հնարավորությունների մասին, Մեհրաբյանը նշեց.

«Նա կփորձի դա վերածել արտաքին քաղաքական ճնշման գործիքի, բայց չեմ կարծում, որ հաջողի, որովհետև Ռուսաստանը ներկայում ավելի շատ շահագրգռված է աշխատել Հայաստանի առկա իրողությունների հետ, մանավանդ` հաշվի առնելով, որ Ռուսաստանը հիմա այնքան խնդիրներ ունի, որ Հայաստանն իր համար առաջնահերթություն չէ այս պահին, և փառք Աստծո: Ավելին ասեմ, մենք պիտի ձգտենք հասնել նրան, որ Ռուսաստանը մեզ վրա առանձնապես չսևեռվի, Հայաստանը դիտարկի որպես երրորդական, չորրորդական, տասներորդական ուղղություն. ինչքան մեզնից հեռու մնա, այնքան լավ»:

Փորձագետը կարևորեց քաղաքական դաշտի կարգավորումը` համապետական ընտրությունները հնարավորինս արագ կազմակերպելով:

«Ներկայիս պառլամենտը շուտափույթ պետք է ցրվի, որքան հնարավոր է շուտ, օրենքով չարգելված ցանկացած եղանակով, իսկ եթե օրենքն էլ դա չի նախատեսում, ապա լրացում կատարել և անել դա»,- ասաց նա:

Երևանի ավագանու ընտրությունը, ըստ Մեհրաբյանի, համապետական ընտրություններից առաջ ստուգատես էր քաղաքական ուժերի համար: Փորձագետի կարծիքով` արտահերթ խորհրդարանական ընտրություններին մասնակցող ուժերի պայքարում իշխող կուսակցության հաջողության հարցում շատ բաներ կախված է լինելու նախ նրանից, որ կառավարությունն իր ընթացքի տեմպը չկորցնի, նաև քաղաքական հաջողություններից:

«Սա ինչ-որ տեղ հեծանիվ քշելու պես բան է, երբ ուզում ես հավասարակշռություն պահպանել, պետք է արագ ընթանաս, եթե կանգնես` կընկնես»,- ասաց նա: