Ադրբեջանում ևս ոչ ոք չի հավատում, որ Իլհամ Ալիևի որդին ծառայում է. քաղաքագետ

ՀՀ վարչապետ Նիկոլ Փաշինյանին Բաքուն մեղադրել է իր ներքին գործերին միջամտելու մեջ: Ադրբեջանի նախագահի խոսնակի շուրթերով սպառնալիք է հնչել. եթե Փաշինյանը «շարունակի միջամտել» Ադրբեջանի ներքին գործերին, ապա նույնը կանի նաև Ադրբեջանը, որի հետևանքով «Փաշինյանի բռնապետությունը կտապալվի»: Քաղաքագետ Գագիկ Համբարյանը SHANTNEWS.am-ի հետ զրույցում սա համարեց տեղեկատվական պատերազմի մի դրվագ:

«Սկսենք նրանից, որ Իլհամ Ալիևը «Հեյդարչիկի ծառայությունը ադրբեջանական բանակում» օպերացիան, PR-ը արեց այն բանից հետո, երբ որոշ ժամանակ առաջ բանակ զորակոչվեց Նիկոլ Փաշինյանի որդին: Դրանով նա սեփական հասարակությանը փորձում է համոզել, որ իր որդին ևս ծառայում է ադրբեջանական բանակում, ինչպես հայ պաշտոնյաների, հատկապես` վարչապետի որդին, այնպես որ սա հապճեպ կազմակերպած օպերացիա էր, առավել ևս, հաշվի առնելով այն հանգամանքը, որ բազմաթիվ անկախ աղբյուրներ, ոչ միայն` ադրբեջանական, այլև օտարերկրյա, փաստում են, որ «Հեյդարչիկ Ալիևը» կամ կրտսեր Հեյդարը առողջական լուրջ խնդիրներ ունի, որի մասին ժամանակին նույնիսկ բարձրաձայնել էր Իսրայելի զբոսաշրջության նախարարը` նշելով, որ Ալիևները վեց միլիոն դոլարանոց վիլլա են գնել Հայֆա քաղաքում, որտեղ իր բարդ բուժումն անցնում է Իլհամ և Մեհրիբան Ալիևների զավակը»,- ասաց նա:

Ինչ վերաբերում է Նիկոլ Փաշինյանի մեկնաբանությանը, թե «ադրբեջանցիները պետք է պահանջեն, որ Ալիևի որդին ևս ծառայի առաջնագծում», դա, ըստ Համբարյանի, ընդամենը մեկնաբանություն էր, և ամենևին Ադրբեջանի ներքին գործերին խառնվելու միջոց չէր, իսկ ադրբեջանցիների ջղաձգությունը և հիստերիկ պատասխանը սպասելի էր: Քաղաքագետի խոսքով` այն, ինչ վերաբերում է Ալիևին, ադրբեջանական ԶԼՄ-ները շատ ցավոտ են ընդունում, նույն Ալիևի պաշտոնյաներն էլ, ինչ վերաբերում է իրենց անմիջական «պատրոն»-ին` ի դեմս Իլհամ Ալիևի, փորձում են այնպիսի մեկնաբանություններ տալ, որ Հռոմի Պապից ավելի կաթոլիկ երևան: Քաղաքագետի կարծիքով` սրանով էր պայմանավորված, որ ադրբեջանական որոշ չինովնիկներ շատ ցինիկ և նյարդային մեկնաբանություն էին տվել Նիկոլ Փաշինյանի հայտարարությանը, սակայն նույն Ադրբեջանում ևս ոչ ոք չի հավատում, որ Իլհամ Ալիևի որդին ծառայում է բանակում: Կրտսեր Ալիևի ծառայության ներկայացումն, ըստ քաղաքագետի, էժանագին բեմականացում էր, քանի որ պարզ դարձավ` նա ծառայում է Բաքվում:

Հարցին` ինչպե՞ս կարելի է հասկանալ՝ «եթե Ադրբեջանը սկսի միջամտել Հայաստանի ներքին գործերին, ապա Փաշինյանի իշխանությունը կտապալվի» արտահայտությունը, արդյո՞ք Բաքվի ձեռքում կան լծակներ, թե՞ սա պատերազմի սպառնալիք է, Համբարյանը պատասխանեց.

«Իմ կարծիքով` այլ լծակներ, քան պատերազմի բացահայտ սպառնալիքը, նա չունի, քանի որ այդտեղ նույն համատեքստում նաև նշվել է, որ Ադրբեջանը միտումնավոր չի սկսում ռազմական գործողությունները, քանի որ պաշտոնական Բաքվին ձեռնտու է Հայաստանի այն քաոսային իրավիճակը, որ ստեղծվել է թավշյա հեղափոխությունից հետո: Այս ամենին էլ մենք պետք է վերաբերվենք որպես քարոզչության, այս հայտարարությանը ևս: Պետք չէ շատ սևեռվել պաշտոնական Բաքվի այդ վայրահաչությունների վրա, ընդամենը պետք է, եթե պատասխան է լինելու, ասել` եթե այդքան հնարավորություն ունեք, արդեն 24 տարի է` ամեն տարի հայտարարում եք «շուտով Արցախը կլինի մերը», դե օգտվեք Հայաստանի քաոսային վիճակից: Սա ընդամենը վայրահաչություն է, ոչ ավելի, բայց ես պնդում եմ, որ նույնիսկ այս վայրահաչություններին պետք է պատասխանել, քանի որ Բաքվից հնչող հայտարարություններն անպատասխան թողնելը այլ կերպ է ընդունվում նրանց կողմից, և ավելի շատ ընդունվում է որպես թուլություն, որն այդպես չէ, պաշտոնական Երևանը հեգնական տոնով պետք է պատասխանի Բաքվի այսպիսի շատ լուրջ սպառնալիքներին»։