Ադրբեջանական կողմը դեռ հույս ունի ուժով լուծել խնդիրը. Սերժ Սարգսյան

2014 թվականից սկսած՝ Ադրբեջանը գրեթե ամեն օր խախտում է 1994 թվականին հաստատված հրադադարը։ Իսկ 2016 թվականին, անհաջողության մատնվելով բանակցություններում, լայնամասշտաբ հարձակում սկսեց Արցախի դեմ։ Բաքվի ագրեսիվ քաղաքականությունն այսպես է բնորոշել ՀՀ երրորդ նախագահ, ՀՀԿ վարչապետի թեկնածու Սերժ Սարգսյանը ռուսական «Իզվեստիային» տված հարցազրույցում։

«Ադրբեջանը … լայնամասշտաբ ագրեսիա սկսեց Լեռնային Ղարաբաղի Հանրապետության դեմ՝ կիրառելով մեծ քանակի ավիացիա, զրահատեխնիկա, խոշոր տրամաչափի հրետանի, հրթիռային համակարգեր, հրանետ համակարգեր՝ մեծ մասը, ի դեպ, գնված Ռուսաստանից»,– նշել է Սերժ Սարգսյանը։

Երրորդ նախագահի խոսքերով՝ ադրբեջանական կողմին այնուամենայնիվ չհաջողվեց որևէ լուրջ խնդիր լուծել, և 5-րդ օրը կողմերը Ռուսաստանի միջնորդությամբ հանդիպեցին ու որոշեցին վերադառնալ բանակցություններին։

«Դրանից հետո մի քանի գագաթնաժողով եղավ, որտեղ կողմերը պայմանավորվեցին հրադադարի խախտումների հետաքննության մեխանիզմի ստեղծման ԵԱՀԿ գործող նախագահի անձնական ներկայացուցչի լիազորությունների ու աշխատակազմի ընդլայնման վերաբերյալ։ Բայց վերադառնալով Բաքու՝ ադրբեջանական կողմը հրաժարվեց իրականացնել այդ պայմանավորվածությունները»,– նշել է Սարգսյանը։

Երրորդ նախագահը հիշեցրել է, որ ԵԱՀԿ Մինսկի խումբն առաջարկել էր հիմնախնդիրը լուծել երեք սկզբունքների հիման վրա.

• ուժի և ուժի սպառնալիքի չկիրառում,
• ժողովուրդների ինքնորոշում և հավասար իրավունքներ,
• տարածքային ամբողջականություն։

Սարգսյանի խոսքերով՝ սա այն չէ, ինչի մասին երազում էր հայկական կողմը, սակայն սա փոխզիջումային տարբերակ է, ինչի պատճառով էլ հայկական կողմը համաձայնել է շարունակել բանակցությունները։ Սակայն երբ 2011 թվականին Կազանում մոտ էր ստորագրման պահը, Բաքուն լրացուցիչ պահանջներ է ներկայացրել, և ստորագրումը չի կայացել։

«Ադրբեջանի ղեկավարության մոտ խաբկանք կա, որ կարող է փոխզիջում լինել միայն Հայաստանի ու Արցախի կողմից։ Եվ միայն այդ պատճառով չի փոխվում ստատուս-քվոն։ Բայց այստեղ կարևոր է նաև հանդիպակաց փոխզիջումը։ Ադրբեջանական կողմը դեռ հուսով է ուժով լուծել խնդիրը»,– նշել է Սարգսյանը։

Սակայն, երրորդ նախագահի խոսքերով, 1990-ականների ու 2016-ի փորձը ցույց է տվել, որ դա անհնար է։ Կլինեն մեծ թվով զոհեր ու կորուստներ, բայց վաղ թե ուշ պետք է գալ լուծման. սակայն որքան շուտ, այնքան լավ։

«Իսկ Արցախի ապագան ազատ կյանքն է։ Այո, դա փոքր երկիր է, բայց դա դեռ հիմք չէ ասելու՝ դուք իրավունք չունեք ազատ ապրելու։ Մարդիկ այնտեղ ապրել են հազարամյակներով, կշարունակեն ապրել նաև հետագայում»,– նշել է Սարգսյանը։

Նրա խոսքերով՝ համանախագահները՝ Ռուսաստանը, Ֆրանսիան ու ԱՄՆ-ն, շատ բան են անում հիմնախնդրի կարգավորման համար։ Համանախագահ երկրների նախագահների մակարդակով արվել է 5 հայտարարություն, և դրանք բոլորն ասում են, որ հիմնախնդիրը կարող է լուծվել վերը նշված երեք սկզբունքների հիման վրա. դրանք իրարից անբաժանելի են։