Ավագանու ընտրությունները թագավորին ցույց տվեցին մերկ վիճակում, նրանք էլ հակագրոհի անցան. Լևոն Շիրինյան

«Հայաստանի Քրիստոնեա-դեմոկրատական շարժում» միության հիմնադիր, քաղաքագետ Լևոն Շիրինյանը SHANTNEWS.am-ի հետ զրույցում անդրադարձավ հարցին` արդյո՞ք արդարացված է մտահոգությունը, թե արտախորհրդարանական ուժերը պատրաստ չեն լինի ընտրությանը, եթե վարչապետի հայտարարածի պես` արտահերթ խորհրդարանական ընտրություններն անցկացվեն դեկտեմբերին:

«Այս ընտրությունների գործընթացը էժանացրին դեռ Սերժ Սարգսյանի օրոք, այն վերածվել է խաղամոլի մրցույթի, ոչ մի ձևով հիմնավորված չէ, գաղափարական ուղենիշներ, չափորոշիչներ շատ լավ կկիրառվեն, եթե էդ էժանությունը չլինի: Ընտրությունը եթե մարտին, ապրիլին լինի, մենք, օրինակ՝ դասական ձևով կկազմակերպենք, բոլոր իմաստներով, իսկ եթե լինի դեկտեմբերին, շատ սուղ ժամանակներում, քանի որ նպատակ ենք դրել, պիտի աշխատենք, տարբերությունը շատ չէ, բայց դե, գիտեք, աշխատում ենք, մենք հո օլիգարխ չենք՝ այդ ամենը գծենք, շրջանառենք»,- ասաց նա:

Դիտարկմանը, թե մեկնաբանում են, որ խաղի հավասար կանոններ պիտի գործեն թե՛ խորհրդարանական, թե՛ արտախորհրդարանական ուժերի համար, Շիրինյանն արձագանքեց, որ ձևակերպումը պետք է փոխել, նշեց, որ օրենսդրությունը պետք է աշխատի 100 տոկոսով, հավասար կիրառվի բոլորի նկատմամբ, ու կունենանք իրավական պետություն:

«Գողական աշխարհի բարքերից է գալիս այս ամենը. օրենք պիտի լինի ու վերջ, այդքան բան»,- նշեց Շիրինյանը:

Քաղաքագետը տեսակետ հայտնեց, որ ՀՀԿ-ՀՅԴ-ԲՀԿ կոալիցիայի ժամանակն է, նրանք այժմ սակարկում են:

«Ինձ թվում է` դիմադրում են, որ սակարկեն. ունեցվածքի հարց ունեն, անցյալի, կենսագրության հարց ունեն և շատ-շատ բաներ: Ավագանու ընտրությունները ցույց տվեցին, որ այս երեք կուսակցություն ունեն 0 ազդեցություն քաղաքական կյանքի վրա, հիմա պիտի սակարկեն, որ հանգիստ թողնեն միջավայրը, իրենք պիտի լուռ հեռանան: ՀՅԴ-ն 1-2 տոկոս ունի, դա ի՞նչ է նշանակում կամ «Բարգավաճ»-ի տոկոսներն այդքան ռեսուրսի պայմաններում. քանի՞ հարյուր հազար անդամ ունեին, թիվ էին ասում, ո՞ւր են այդ թվերը:

Այս ընտրությունները, քանի որ պետությունը օրենքի շրջանակներում վերահսկեց, չմիջամտեց, թագավորին ցույց տվեցին մերկ վիճակում, նրանք էլ ընկան սարսափի մեջ, հակագրոհի անցան: Հիմա ես ենթադրում եմ, որ նպատակը Ֆրանկոֆոնիայի այդ համաժողովը փչացնելն էր, որ իշխանությունը կզգուշանա հանուն դրա, կգնա կոմպրոմիսների, ինչը, որ տեսանք, չեղավ, և ճիշտ արեցին, դրանց հետ կոմպրոմիս չի կարելի, երկիրը պետք է ապաօլիգարխացվի, քրեական տարրը վերջնական իշխանությունից դուրս պետք է շպրտվի` փողկապո՞վ են, թե՞ ոչ, կապ չունի»,- ասաց նա:

Հարցին` իրավիճակի հանգուցալուծումն ինչպե՞ս է պատկերացնում, Շիրինյանը պատասխանեց, որ հանգուցալուծումը կա. ԱԱԾ-ն կաշխատի, ՀՀԿ-ն ու մյուսները կհանձնվեն: Նա հարց ուղղեց նախկին պաշտոնյաներին` որտեղի՞ց նրանց այդ հարստությունը, չէ՞ որ եկամտի միակ աղբյուրը «ռոճիկն» է եղել: Քաղաքագետը կարծիք հայտնեց, որ պարզապես գործընթացը պետք է տանել խաղաղ հունով, որ արդյունավետ լինի:

«Այս մարդկանց գիտակցության մեջ ժողովրդի սուվերեն կամք, որ Աստծո կամքից հետո գերագույն կամքն է, գոյություն չունի. գողական աշխարհի բարքեր են, էլի»,- ասաց նա:

«ԱԺ կանոնակարգ-օրենքում փոփոխություններ ու լրացումներ կատարելու մասին» օրենքը, ըստ Շիրինյանի, նշանակում է` ժողովրդի ընտրյալները զրահաբաճկոնով առանձնանում են, որ հետո ինչ ուզեն, քվեարկեն, սակայն բռնվեցին, չեն կարող անել, որովհետև ժողովրդի կամքին հակառակ ոչ ոք չի կարող գնալ:

«Ինձ թվում է` ռուսական բարքերի ազդեցությունն է. խարդախ են, որովհետև ՀՀ անվտանգության հարց են շոշափում, որ օտար միջամտություն առաջացնեն, բայց օտարները հասկանում են, որ հայ ժողովուրդն իրավունք ունի ինքնիշխան և ազատ լինելու: Ոչ մի բան էլ չեն ասելու, գոնե առերևույթ»,- նշեց Շիրինյանը:

Քաղաքագետն ընդգծեց` իբրև իրավիճակի գնահատական պետք է դիտվի մայիսի 2-ի գործադուլն ու ընդվզումը, ինչը նշանակում է, որ ՀՀ նախորդ իշխանությունն իր լեգիտիմությունը կամ օրինականությունը այդ օրը կորցրել է, հետևաբար, հեղափոխության ղեկավարը, որ տվյալ դեպքում վարչապետն է, ցանկացած գործողության իրավունք ունի` ոչ միայն օրենքի, այլև հեղափոխության օրենքի շրջանակներում:

«Ռուսոն ասում է, որ ժողովրդի չհաստատած օրենքը օրենք չէ, իսկ դուք կարո՞ղ եք ասել` ժողովուրդը ե՞րբ է հաստատել այդ օրենքները: Հեղափոխությունն ունի օրենքներ` ի նպաստ Հայաստանի, ոչ օլիգարխիայի»,- ասաց նա: