Երևի զգացին, որ անիմաստ է պայքարել և լքում են նավը. Արամ Մանուկյան

ՀՀ վարչապետ, «Քաղաքացիական պայմանագիր» կուսակցության ղեկավար Նիկոլ Փաշինյանը և «Բարգավաճ Հայաստան» կուսակցության առաջնորդ Գագիկ Ծառուկյանը երեկ հուշագիր ստորագրեցին, որով ԲՀԿ-ն պարտավորվում է Փաշինյանի հրաժարականի դեպքում վարչապետի թեկնածու չառաջադրել և որևէ թեկնածուի չաջակցել:

Այսօր ՀՀԿ խմբակցության անդամ և անկախ որոշ պատգամավորներ հայտարարությամբ հանդես եկան, որով հայտնեցին, որ պաշտպանում են վարչապետի` արտահերթ ընտրությունները դեկտեմբերին անցկացնելու դիրքորոշումը: ՀԱԿ կուսակցության փոխնախագահ Արամ Մանուկյանը, SHANTNEWS.am-ի հետ զրույցում անդրադառնալով ներքաղաքական վիճակին, խոսելով ՀՀԿ-ական տարբեր պատգամավորների` վարչապետին աջակցելու մասին հայտարարությունների մասին, հետևյալ գնահատականը տվեց.

«Ժողովուրդը շատ լավ տերմին է գտել, «Ֆեյսբուքը» պայթում է այդ բառից, «քաջալերվել են» և անցել ժողովրդի կողմը: Երևի զգացին, որ անիմաստ է պայքարել և լքում են նավը, գիտեք, բոլոր անցնողներն էլ ինչ-որ չափով խոցելի մարդիկ են, խոցելի մարդիկ են միշտ փոփոխությունների գնում, բայց մեծ հաշվով պրոցեսը համարում եմ դրական, որովհետև շահում է ժողովուրդը, հանգստությունը, կանխատեսելիությունը:

Այդ առումով ես գոհ եմ ընդհանուր երևույթից: Այդ մարդկանց չեմ գնահատում, բայց իրենց արարքը օգնում է հեղափոխությունը մինչև վերջ իրականացնել և արտահերթ ընտրություններ անցկացնել: Դա ինձ համար կարևոր է, հիմնական խնդիրը արտահերթ ընտրությունների անցկացումն է»:

Դիտարկմանը, թե հաշվի առնելով, որ մեկ օրում կարծեք իրավիճակ ու հռետորաբանություն փոխվեց, ի՞նչ որոշիչ գործոններ կարող էին դեր խաղալ այս հարցում, Մանուկյանը պատասխանեց, որ այս ընթացքում երկու որոշիչ օրեր են եղել՝ մեկը սեպտեմբերի 23-ն էր, երբ իշխող քաղաքական ուժը 81 տոկոս քվե ստացավ և դա խորհելու տեղիք տվեց մյուսներին, իսկ երկրորդը հոկտեմբերի 2-ին մեկ ժամում 50 հազար հավաքված մարդու գործոնն էր: Սրանք, ըստ Մանուկյանի, շատ լուրջ գործոններ են, որոնք մտածել են տալիս մարդկանց, առավել ևս` այն մարդկանց, որոնք բիզնեսներ ունեն, սեփականություն, կրիմինալի մեջ են թաղված:

«Նրանք խոցելի են, խոցելի մարդկանց հեշտ է մտքափոխ անել, բանակ փոխելու կամ դիրքեր փոխելու առաջարկ անել, իրենք ընդունում են: Մի պահ էլ կա, երբ տեսնում են` վճռորոշ են դառնում այդ փոփոխությունները, արդեն վազք է սկսվում` ով ավելի շուտ կլքի նավը, բայց կրկնում եմ` այս պահին այդ մարդկանց` գողերի, հանցագործների ճակատագիրը, ոնց որ միշտ, ինձ չի հետաքրքրել, այլ հետաքրքրում է երկրի կայունությունը, կանխատեսելիությունը:

Մեր երկիրը վտանգներով լեցուն է, արտաքին վտանգներով լեցուն ենք, մեզ կայունություն ու խաղաղություն է պետք, դրան գումարած` եթե ժողովրդավարության հույս է առաջացել, կարևորը դա է: Ես մտածում եմ ոչ թե այս պահի, այլ առավել երկար ժամանակի համար, երկրի կայունության համար, որն ինձ համար մեծագույն արժեք է: Մնացածները փոքր-փոքր էլեմենտներ են»,- ասաց նա:

Հարցին` անակնկալներ կլինե՞ն, կարո՞ղ է ՀՀԿ-ն վերջին պահին վարչապետի թեկնածու առաջադրել, ՀԱԿ փոխնախագահը նշեց, որ բացառում է դա:

«Իրենք արդեն ջարդված են, իսկապես, լրիվ ջարդված են, նույնիսկ այդ մի քանի պաշտպանողների ելույթներում էլ թևաթափ վիճակ է, ակնհայտ է, որ արդեն իրենք հանձնվել են, լրիվ ընկրկել են, տեղի են տվել: Որևէ բարդություն չկա խնդիրը մինչև վերջ հանգիստ լուծելու. խնդիր ասվածը արտահերթ խորհրդարանական ընտրություններն են, երկրի հանգիստ վիճակը, դա է ինձ համար արժեքը, ինչի համար երկար պայքարել ենք: Դա հույս կբերի, որ և մարտի մեկը կբացահայտվի ամբողջությամբ, և ներդրումներ կլինեն, և յոթ միլիարդ դոլարանոց պարտքը կփակվի, դրանից հետո նոր կարելի է անցնել երկրի առջև կանգնած լրջագույն խնդիրների լուծմանը»,- նշեց Մանուկյանը:

Հետաքրքրվեցինք` հնարավո՞ր է ՀԱԿ-ը կայանալիք խորհրդարանական ընտրություններին դաշինքով մասնակցի, կուսակցության փոխնախագահը դժվարացավ պատասխանել, ասաց, որ նման քննարկում չունեն, դեռ չեն անցել այդ փուլին, և իրենց համար կարևորն ընտրությունների որոշում կայացնելն է:

Արամ Մանուկյանին հիշեցրինք` դեկտեմբերին արտահերթ ընտրություններն անցկացնելու որոշմանը դեմ արտահայտվելիս որպես փաստարկ նշում էին, որ արտախորհրդարանական քաղաքական ուժերը չեն հասցնի պատրաստվել, կլինեն անհավասար պայմաններ, ապա հետաքրքրվեցինք` իրենք կհասցնե՞ն նախապատրաստվել:

«Մեզ համար երևի թե ամենաանհարմարն է, որովհետև ո՛չ հեռուստատեսություն ունենք, ո՛չ խորհրդարանական ամբիոն, խոսափող, բայց կապ չունի: Քանի որ մեր ուզածն այն է, որ խորհրդարանական ընտրությունները շուտ լինեն, դա մեզ համար արժեք է, մենք դրանով գոհ ենք: Ես չեմ դժգոհում, որ կարող է դժվարություններ լինեն, խնդիր չկա, մենք կմասնակցենք, որովհետև ազատ ընտրություններին չմասնակցելը չի հասկացվի: Մենք կմասնակցենք անշուշտ»,- պատասխանեց նա: