Մեկ-մեկ թվում է, թե սեռական փոքրամասնությունների դեմ պայքարի քարոզչությունը իքս պահից դառնում է նրանց քարոզչություն. Փաշինյան

ՀՀ կառավարության հոկտեմբերի 25-ի նիստում ՀՀ աշխատանքի և սոցիալական հարցերի նախարարի պաշտոնակատարի առաջին տեղակալ Արսեն Մանուկյանը ներկայացրեց «Երեխայի իրավունքների մասին» Հայաստանի Հանրապետության օրենքում լրացում կատարելու մասին օրենքի նախագիծը: Այն Ազգային ժողովի պատգամավորներ Վահրամ Բաղդասարյանի, Էդուարդ Շարմազանովի, Ջեմմա Բաղդասարյանի, Կարինե Աճեմյանի և Միհրան Հակոբյանի օրենսդրական նախաձեռնությունն է: Մանուկյանը Կառավարությանն առաջարկեց բացասական եզրակացություն տալ նախագծին: Նա ասաց, որ օրենքի նախագծով արգելվում է երեխաների ֆիզիկական, մտավոր, հոգևոր լիարժեք զարգացմանը սպառնացող տեղեկատվություն տարածելը կամ քարոզչությունը, նաև բացատրվում է, թե ինչ նկատի ունեն քարոզչություն ասելով:

«Ներկայացված փոփոխությունը կրկնում է արդեն իսկ գործող օրենքի դրույթներից մեկը, այսինքն` երեխաների իրավունքների այդ երաշխիքը գործող օրենսդրությամբ կա, հետևաբար, կրկնությունն անիմաստ է, նաև հակասում է «Իրավական ակտերի մասին» օրենքի կետերից մեկին: Այստեղ օգտագործվում են հասկացություններ, որոնք ունեն ոչ միանշանակ ընկալում և հետագայում կիրառման իմաստով կարող են խնդրահարույց լինել. «ոչ ավանդական սեռական հարաբերություններ», «ավանդական սեռական հարաբերություններ», նման հասկացության կիրառումը լինելու է վիճահարույց, հանգեցնելու է ոչ միանշանակ և ոչ միատեսակ կիրառման: Օրենքի նախագիծը չի անցել հանրային քննարկում, չի ներկայացվել ՄԻՊ գրասենյակ, չունենք նրանց դիրքորոշումն այս հարցի վերաբերյալ»,- ասաց նա:

Փոխնախարարն առաջարկեց գործող օրենքը թողնել անփոփոխ, նախագծին բացասական եզրակացություն ներկայացնել:

ՀՀ վարչապետի պաշտոնակատար Նիկոլ Փաշինյանն արձագանքեց` եթե, ըստ էության, այդպիսի կարգավորում մեր օրենքը ունի, այստեղ մեկ հարց է ծագում. պրակտիկայում արդյո՞ք այդ օրենքը կիրառվում է:

«Այսօր համացանցում կա կատարյալ ազատություն, երեխաները ևս օգտվում են համացանցից, ամեն ինչին, ըստ էության, հասանելիություն կա, եթե նույնիսկ ամենախիստ ձևակերպումներով օրենքն ընդունենք, քարոզչություն ասելով նկատի ունեն` մեկը գնում է մի երեխայի ականջին բան ասում կամ հրապարակային, նույնը ինտերնետի մասին է, սահմանափակման հնարավորություն չկա, էլ չասած, որ անանուն օգտատիրոջ կողմից է տեղադրվում, նույնականացում հնարավոր չէ, գործնականում այսպիսի գործիքակազմով հնարավո՞ր է լուծել խնդիրը»,- ասաց նա:

Արսեն Մանուկյանն արձագանքեց, որ համացանցն իրոք անվերահսկելի տարածք է, նաև խնդիր կա «Հեռուստատեսության և ռադիոյի մասին» օրենքի, հեռուստատեսությամբ և ռադիոյով այս քարոզչությունը տարածելու հետ կապված, ուստի աշխատանքներ շատ կան, բայց այս ձևակերպումներն այդ խնդիրը չեն լուծում, ավելի արդյունավետ գործիքակազմ է պետք ունենալ այդ խնդիրը լուծելու համար:

Փաշինյանն ընդգծեց, որ սա ոչ միայն Հայաստանում է խնդիր, այդ խնդիրն, ընդհանուր առմամբ, ամբողջ աշխարհում կա, և ոչ մի տեղ դրա լուծումը դեռ գտնված չէ:

«Դժվար է պատկերացնել` ինչպես կգտնվի այդ լուծումը, այսօր կարելի է մտնել ինտերնետ և ստանալ մանրամասն խորհրդատվություն` ինչպես բանկ թալանել»,- ասաց նա, ապա հավելեց` դիմելով ՀՀ ֆինանսների նախարարի պաշտոնակատար Ատոմ Ջանջուղազյանին. «Պարոն Ջանջուղազյանը միանգամից մտահոգվեց»:

Վարչապետի պաշտոնակատարի խոսքով` պետք է խոստովանել, որ նույնիսկ, եթե ամենախիստ ձևակերպումներով, բառապաշարով փոփոխություն ընդունեն, խնդիրը մնալու է, քանի դեռ կոնկրետ լուծումներ չունի:

«Ուզում եմ մի շեշտադրում անել. ես սխա՞լ եմ ընկալում, երբ մեկ-մեկ ինձ թվում է, թե, օրինակ, սեռական փոքրամասնությունների դեմ պայքարի քարոզչությունը իքս պահից դառնում է սեռական փոքրամասնությունների քարոզչություն: Չկա այսպիսի կոմպոնենտ, մեկ էլ տեսնում ես սկսեցին խոսել այդ մասին, պայքարում են, պայքարում են: Էդ երեխաները, որ լուրերով լսեն` ում որ չենք ուզում քարոզել, չե՞ն ասելու` էս ինչի՞ դեմ են մարդիկ սենց հետևողականորեն պայքարում»,- հարց ուղղեց նա:

Փաշինյանը կոչ արեց` այսուհետ, եթե ուզում են քարոզչություն չանել, այս հարցերը պիտի քվեարկեն խիստ գաղտնիության ռեժիմով, օրենքի ընդունումն էլ, կիրառումն էլ նույն ռեժիմով լինի, մանավանդ, որ անհասկանալի է, թե ինչպես են հանկարծ այսպիսի խնդիրներն այսօրվա Հայաստանում հրատապ դառնում: