Մեր գործընկերները պետք է հաշվի նստեն Հայաստանի ազգային և պետական շահերի հետ. Փաշինյան

ԱԺ պատգամավոր Շիրակ Թորոսյանը նոյեմբերի 1-ին խորհրդարանում ՀՀ վարչապետի թեկնածու Նիկոլ Փաշինյանից հետաքրքրվեց` հայ-թուրքական հարաբերություններում նոր նախաձեռնություն հնարավո՞ր է, թե՞ ոչ: Նա նաև անդրադարձավ սահմանն անցած թուրք պատանուն հայրենիք վերադարձնելու ժեստին:

Փաշինյանը չհամաձայնեց հնչած մտքին, որ այդ պատանուն վերադարձնելով` բարեկամական ժեստ են արել Թուրքիային:

«Այդ քայլը համապատասխանում է մեր էությանը, պետական և ազգային էությանը: Մենք երբեք չենք գնա այնպիսի աբսուրդի, որ մոլորված պատանուն ներկայացնենք որպես միջազգային ահաբեկիչ: Կան վերլուծաբաններ, նաև միջազգային, որ ասում են` տրամաբանական է, որ այս պայմաններում ԱՄՆ-ն փորձի Հայաստանի հետ բանակցություններ վարել, որ նրանք Իրանի հետ հարաբերություններում որոշակի սահմանափակումներ մտցնեն, բայց նրանք հարց չեն տալիս` իսկ ինչո՞ւ այդ նույն երկրները պետք է նույն կամ նմանատիպ քաղաքականություն չվարեն Թուրքիայի նկատմամբ: Ինչո՞ւ են բոլորը հարմարվել այդ իրավիճակին, որ Թուրքիան պետք է Հայաստանի հետ սահմանը փակի, և անսովոր է, որ Հայաստանը պետք է Իրանի հետ սահմանը չփակի, այսինքն` նրանք այնքան ինքնուրույն են, որ կարող են ազգային շահերի վրա հենվել, իսկ Հայաստանը այդպիսի երկիր չէ՞»,- ասաց Փաշինյանը` հավելելով, որ չարաչար սխալվում են այդ կերպ մտածողները:

Նա խոսեց Հայաստանում գործող մի դիվանագետի մասին, որը զեկույց է գրում իր երկրի արտաքին գերատեսչության մասին, ասում` Հայաստանում քաղաքականությունը վերլուծելիս հասկանում են, որ Հայաստանն ուզում է դառնալ տարածաշրջանային և միջազգային գործոն:

«Ասում են` էդ ո՞նց կլինի: Այդպես է, այդպես շարունակելու է լինել, որովհետև հայ ժողովուրդն իր իրականացրած քաղաքական աննախադեպ իրադարձություններով վաստակել է այդպիսին լինելու իրավունքը: ՀՀ կառավարությունը և ողջ քաղաքական էլիտան այդպես էլ ընկալում է Հայաստանի այսօրվա միջազգային քաղաքականությունը: Հայաստանի Հանրապետությունն ունի այդպիսի ուղեգիծ, մենք համարում ենք, որ ինչպես շատ երկրներ, մենք նույնպես ունենք ազգային և պետական շահեր, և մեր գործընկերները այդ շահերի հետ պետք է հաշվի նստեն»,- ասաց նա:

Փաշինյանը զուգահեռներ տարավ ԼՂ խնդրի կարգավորման վերաբերյալ իրեն ուղղվող հարցի հետ. երբ իրեն հարցնում են` իսկ դուք ԼՂ հարցում փոխզիջման պատրա՞ստ եք, թե՞ ոչ, ինքն ասում է` դուք այդ նույն հարցը Ադրբեջանին տվե՞լ եք, թե՞ ոչ: