Քաղաքական դրամահավաքը նորամուծություն հայաստանյան ընտրական գործընթացներում

Կուսակցություններն ու դաշինքները քարոզարշավի վերջին նախապատրաստական աշխատանքներ են կատարում:  Կուսակցության անունից, բայց առանձին սեփական անձի համար… այսպիսին է ռեյտինգային թեկնածուների քարոզարշավային ծրագիրը: Այս նպատակով որոշ կուսակցություններ ու վարկանիշային թեկնածուներ անգամ քարոզարշավի աջակցության դրամահավաք են հայտարարել: Սա հայաստանյան քաղաքականության մեջ նորույթ է: Թեկնածուներն ընտրողներին խնդրում են ոչ միայն քվեարկել իրենց օգտին, այլև աջակցել քարոզարշավ անցկացնելու հարցում: Դրամահավաքի աջակցությամբ կամ էլ առանց դրա՝ Գյումրիում արդեն բազմաթիվ շտաբներ են բացվել: Նախընտրական ակտիվությունն ընդգծում է հիմնական քաղաքական մրցակիցներին:

«Օրինաց երկրի» Շիրակի մարզի ռեյտինգային թեկնածուները 13-ն են: Տարածքային ցուցակը նախորդ ընտրություններից տարբերվում է: Բայց ընտրողները ծանոթ անուններ կգտնեն:

«Տարածքային մեր խումբը 13 հոգուց է բաղկացած: Կան, իհարկե, «Օրինաց երկիր» կուսակցության հնաբնակներ, բայց մենք թարմացրել ենք մեր թիմը, ունենք երիտասարդներ»,- SHANTNEWS.am-ին ասել է ՕԵԿ պատգամավորի թեկնածու Հասմիկ Եղիազարյանը:

Երիտասարդ կազմով Շիրակի մարզում նաև «Իմ քայլը» դաշինքն է ներկայանում: Երիտասարդ թեկնածուներն էլ քարոզարշավի ,   նոր մոտեցումներ են ներկայացնում:  Քարոզարշավ անցկացնելու համար դրամահավաք են սկսել:  Սա համարում են ավելի քաղաքակիրթ տարբերակ՝ քարոզարշավն այնքան ճոխ կլինի, որքան ընտրողը կցանկանա:

«Բոլոր քաղաքակիրթ երկրներում ընդունված է, որ ընտրություններին մասնակցելուց առաջ, թեկնածուները կազմակերպում են դրամահավաք, որ այն մարդիկ, ովքեր ցանկություն ունեն սատարելու կամ ուզում են, որ նախընտրական շրջանում թեկնածուն հավուր պատշաճի ներկայանա, իրենք իրենց լուման են ունենում »,- SHANTNEWS.am-ի հետ զրույցում ասել է «Իմ քայլը» դաշինքի պատգամավորի թեկնածու Արա Մելիքջանյանը:

Լուսավոր Հայաստան կուսակցությունը ևս քաղաքական դրամահավաք է հայտարարել: Այդ միջոցներով կուսակցությունն օգնելու է նաև Շիրակի մարզի 11 ռեյտինգային թեկնածուներին պաստառներ, շտաբներ ու հանդիպումներ ունենալ: Իսկ տարածքային ցուցակում կուսակցության անդամներ են նաև անկուսակցականներ:

««Լուսավոր Հայաստան կուսակցության ցուցակի մեջ ընդգրկված են թե՛ կուսակցականներ, թե՛ անկուսակցականներ: Կարևորը արժանիքներն են ու գիտելիքները, որոնք մեր համար ավելի կարևոր են: Հետևաբար ունենք 11, ըստ իս, իդեալական թեկնածուներ»,- SHANTNEWS.am-ին ասել է «Լուսավոր Հայաստան» կուսակցության պատգամավորի թեկնածու Սևակ Հովհաննիսյանը:

«Մենք» դաշինքի Շիրակի մարզի ցուցակներում ավելի շատ «Հանրապետություն» կուսակցության անդամներ են, «Ազատ դեմոկտրատներ»-ի ներկայացվածությունը մարզում փոքր է: Խորհրդարանական արտահերթ ընտրությունները,  ըստ «Մենք»-ի թեկնածուի, տարբերվելու են նաև քարոզարշավի անցկացմամբ: «Մենք» դաշինքի թեկնածու Արթուր Սարուխանյանը SHANTNEWS.am–ին ասել է.

«Մենք նպատակ ունենք, անցկացնել գաղափարական պայքար, ոչ թե ծանոթ-բարեկամի կամ այլ տարբերակներով»:

Կուսակցություններն ու դաշինքներն իրենց թեկնածուների միջև բաժանում են նաև քարոզչական պաստառի համար հատկացված տեղերը: Իսկ երկուշաբթի օրվանից արդեն նախընտրական մրցավազքը սկսվում  է: