Փաշինյանի կառավարությունը 7 ամիս է՝ իշխանություն է, ժողովուրդն իր վրա որևէ էական ազդեցություն չի զգացել. «Մենք» դաշինքն Արաբկիրում էր

«Մենք» կուսակցությունների դաշինքը քարոզարշավը միևնույն ժամանակ և՛ մարզերում և՛ Երևանում է անցկացնում: Շրջում են բակ առ բակ, փողոցից փողոց ու քաղաքացիներին իրենց նախընտրական ծրագիրը ներկայացնում, իրազեկում՝ իրենք քվեաթերթիկում 8-րդ համարն են, ցուցակն էլ «Հանրապետություն» կուսակցության նախագահ Արամ Սարգսյանն է գլխավորում:

Ասում են՝ քաղաքացիներն իրենց հետ զրույցում ամենաշատը տնտեսական ու սոցիալական խնդիրների մասին են բարձրաձայնում: Իրենք գալիս են, որ այդ խնդիրներին լուծում տան՝ «Առաջինը Հայաստա՛նն» է կարգախոսով:

«Պարոն Փաշինյանի կառավարությունը վերջին 7 ամիսների ընթացքում իշխանություն է, և ժողովուրդն իր վրա որևէ էական ազդեցություն չի զգացել: Եղել են, այո՛, կոռուպցիոն լուրջ բացահայտումներ, որոշ մարդիկ, այո՛, ձերբակալվել են, բայց դա չի նշանակում, որ դրանից բարձրացել է մարդկանց կյանքի որակը: Բյուջե փող է գնացել, բայց որևէ շերտում դա չի արտացոլվել: Այսինքն, ո՛չ աշխատավարձ է բարձրացել, ո՛չ կենսաթոշակ, դրանք դեռևս ընդամենը թղթի վրա են»,- ասաց «Մենք» դաշինքի կողմից պատգամավորի թեկնածու առաջադրված Թեհմինա Վարդանյանը:

Նրա խոսքով՝ իրենք անզիջում պայքար կմղեն ստվերի և մենաշնորհի դեմ, որի արդյունքում բյուջեն ոչ թե տարեկան 600 մլն, այլ, իրենց հաշվարկներով, 1 մլրդ դոլարով կավելանա: Թեհմինա Վարդանյանի պնդմամբ՝ իրենք բարձրացնելու են նվազագույն աշխատավարձը և կենսաթոշակը շուրջ 25%-ով, բժիշկների, մանկավարժների, այսինքն՝ հիմնական սոցիալական թիրախավորված խմբերի աշխատավարձերը:

Ասում է՝ «Մենք»-ը մյուս քաղաքական ուժերից տարբերվում է արտաքին քաղաքականության վերաբերյալ իր մոտեցումներով: Շեշտում է՝ թե՛ «Ազատ դեմոկրատներ» և թե՛ «Հանրապետություն» կուսակցություններն ընդգծված արևմտամետ քաղաքական ուժեր են, կրում են եվրոպական արժեքներ, դրա համար էլ դաշինք են կազմել ու ընտրողին այդպես են ներկայանում:

«Որևէ մեկը չի կարող ասել, որ թե՛ «Հանրապետություն» և թե՛ «Ազատ դեմոկրատներ» կուսակցությունները երբևէ շեղվել են այդ գծից: Այն քաղաքականությունը, որ վարում են ներկա իշխանությունները արտաքին քաղաքականության մասով, ըստ էության, նախկին իշխանությունների գիծն են առաջ տանում»,- ասաց պատգամավորի թեկնածուն:

Մեկը թռուցիկներն է բաժանում, մյուսը բարձրախոսով իրենց դաշինքի մասին է պատմում, մեկ ուրիշն էլ կարմիր գծերի նկատմամբ իրենց դաշինքի վերաբերմունքն այսպիսի ակցիայով է արտահայտում: