Ընտանեկան տարաձայնություններ սպանված ոստիկանի հոր և կնոջ միջև

ՊՊԾ գնդի գրավման գործով դատական նիստի ժամանակ այսօր՝ դեկտեմբերի 12-ին, դատավոր Մեսրոպ Մակյանի որոշմամբ՝ գնդի գրավման ժամանակ սպանված ոստիկան Յուրի Տեփանոսյանի իրավահաջորդ ներգրավված նրա հայրը՝ Վահրամ Տեփանոսյանը,  հեռացվեց վարույթից: Որպես իրավահաջորդ ներգրավվեց նրա այրին՝ Արփինե Թումասյանը, ով դեռ քրեական գործի սկզբից ուներ այդ կարգավիճակը: Բանն այնն է, որ  մի քանի դատական նիստ առաջ նրա սկեսրայրը՝ Վահրամ Տեփանոսյանը, հայտարարել էր, որ ինքն է ցանկանում ներգրավվել որպես իրավահաջորդ: Դատարանը նրան ներգրավել էր գործի վարույթ: Սակայն հետո պարզվեց, որ  ընտանիքում որոշակի անհամաձայնություն է եղել: Դատավոր Մեսրոպ Մակյանն արձանագրեց, որ դատարանը չէր կարող տեղյակ լինել այդ տարաձայնության մասին:

Դատարանն արձանագրելով, որ մի ընտանիքից են, և չի կարող տարաձայնություն լինել, որոշել էր հեռացնել վարույթից տիկին Թումասյանին, ներգրավել Վահրամ Տեփանոսյանին: Սակայն փաստաբանը հարց է բարձրացրել, որ Արփինե Թումասյանի համաձայնությունը չի եղել Տեփանոսյանի ներգրավման հարցի շուրջ:

Արփինե Թումասյանը հայտարարեց. «Որպես երեք երեխաների մայր՝ իրավունք ունեմ լինել Յուրի Տեփանոսյանի իրավահաջորդը և պնդում եմ մոտեցումս»: Պարզվեց, որ ընտանիքում Յուրի Տեփանոսյանի մահվան հանգամանքների շուրջ է տարաձայնություն եղել: Արփինե Թումասյանը համոզված է, որ ոստիկանին սպանել են ՊՊԾ գունդը գրավածները, իսկ հայրը համոզված է, որ տղային սպանել են ոստիկանները: Վահրամ Տեփանոսյանը լրագրողների հետ զրույցում նշեց, որ պատրաստ է 30-ից ավելի ապացույց ներկայացնել:

«Վիճեցինք, հիմա իրար հետ չենք խոսում: Թոռներիս տիրություն եմ անում, հարսիս ցավն էլ տանեմ, նա հզոր աղջիկ է»,- ասաց Վահրամ Տեփանոսյանը:

Դատարանը հեռացավ խորհրդակցական սենյակ, մոտ 20 րոպե անց հրապարակեց որոշումը՝ Վահրամ Տեփանոսյանը դատարանում այլևս իր որդու իրավահաջորդը չէ: Տեփանոսյանի  իրավահաջորդը  դատարանում կրկին նրա այրին է՝ Արփինե Թումասյանը, ով այժմ ոստիկանության լեյտենանտ է:

Հիշեցնենք, որ Յուրի Տեփանոսյանի վրա կրակել էին, երբ նա նստած է եղել ծառայողական մեքենայում: Նրա սպանության համար մեղադրվում է «Սասնա ծռեր» խմբի անդամ Սմբատ Բարսեղյանը: