Հիմա ինչո՞ւ կարևոր չէ Սփյուռքի նախարարությունը, որովհետև Դուք էլ նախարար չե՞ք. Մարուքյանը` Մխիթար Հայրապետյանին

«Լուսավոր Հայաստան» խմբակցության ղեկավար Էդմոն Մարուքյանը Սփյուռքի նախկին նախարար, «Իմ քայլը» խմբակցության անդամ Մխիթար Հայրապետյանին հարց ուղղեց` կապված նախարարությունը կրճատելու որոշման հետ:

«Դուք դիսկոմֆորտ չե՞ք զգում, մոտ 8 ամիս եղել եք Սփյուռքի նախարար, Ձեր հարցազրույցներում, արտերկրյա այցերի ժամանակ շեշտադրել եք, որ կարևոր է նախարարության ու Ձեր` որպես նախարարի, առաքելությունը, հետո գալիս եք խորհրդարան, նախարարությունն ընկնում է կրճատումների տակ: Ո՞նց մենք էս ուղերձը տանք սփյուռքի մեր հայրենակիցներին, հիմա ինչո՞ւ էլ կարևոր չէ նախարարությունը, որովհետև Դուք էլ նախարար չե՞ք»,- հարց ուղղեց նա:

Հայրապետյանը պատասխան հարցով դիմեց Մարուքյանին` հաշվի առնելով, որ նա արձագանքելու հնարավորություն է ունենալու:

«Ո՞վ է ասել, որ կարևոր չէ, մենք բավական ազնիվ ենք եղել մեր ընտրողների առաջ, որովհետև նախընտրական շրջանում դեռ մինչ ընտրությունը` երեք ամիս առաջ, վարչապետ Փաշինյանն իր հրապարակային ելույթներից մեկում խոսեց օպտիմալացման մասին, նշեց, որ նախարարությունների թիվը կրճատվելու է, հարցադրում եղավ Սփյուռքի նախարարության մասով, չբացառեցինք: Երբ կառավարությանը հարցնում ենք` ի՞նչ է հարկավոր, որ արդյունավետ կառավարես պետությունը, կառավարությունն ասում է՝ ահա այսպիսի կառուցվածք, իսկ թե դրա մեջ ինչպես են տեղավորվում ոլորտային գերատեսչությունները, պատասխանատու է կառավարությունը»,- ասաց նա` նշելով, որ այդ քայլի արդյունավետությունը ժամանակը ցույց կտա:

Հայրապետյանն ասաց, որ Սփյուռքի նախարարությունը պահպանելու դեպքում իրեն հարկավոր է տալ սուպերլծակներ, քանի որ, եթե պետք է մնա նույն կարգավիճակով, ինչ եղել է նախկինում` որպես խորհրդանշական ինստիտուտ, ավելի լավ է չլինի:

«Եթե նախարարությունը պետք է լինի բացառապես, որ սփյուռքին մենք հաճոյանանք, ավելի լավ է չլինի, պետք է անկեղծ լինենք Սփյուռքի հետ մեր երկխոսության մեջ»,- ասաց նա` հավելելով, որ Սփյուռքի հետ քաղաքականության գործառույթները, որ ունեցել է նախարարությունը, պահպանվելու են, քանի որ լինելու է առանձին ինստիտուցիոնալ կառույց:

Հայրապետյանը տեղեկացրեց, որ երկու մոդել է քննարկվում` Սփյուռքի կոմիտեի կամ հատուկ հանձնակատարի մեծ գրասենյակի, որտեղ նախարարության լավագույն աշխատակիցներն են ներգրավված լինելու: Նա ընդգծեց` խոսքը ոչ թե լուծարման մասին է, այլ ինստիտուտի փոփոխության:

Մարուքյանը նախ՝ արձագանքեց, որ հարց տվողին հարց տալու ավանդույթ չի եղել, այդուհանդերձ պատասխանեց.

«Ես չասացի, որ ասել եք` Սփյուռքի նախարարությունը կարևոր չէ, բայց կրճատվելու մասին լուրը վատ ուղերձ է, խոսում է այն մասին, որ նախարարությունը կարևոր չէ: Սուպերլծակների մասին` ես Լոս Անջելեսում հանդիպում եմ ունեցել հայ համայնքի հետ, Հայ Առաքելական եկեղեցու թեմի ներկայացուցիչների հետ, նրանք գոհ էին ձեր նախարարությունից, բայց ասեմ հետևյալը, եթե նախարարությունը կրճատում եք, ստեղծում կոմիտե կամ հանձնակատարի գրասենյակ, դա նշանակում է, որ դուք ուղղակի խորհրդարանական վերահսկողության տարածքից դուրս եք բերում նախարարությունը, ուղղակի մենք էլ չենք կարող հարցեր տալ և քաղաքական իմաստով հաշվետվություն պահանջել: Ո՞ւմ է այն ենթարկվելու, դուրս է գալիս, որ մենք նախարարությունը կրճատում ենք, մոտավորապես նույն ֆունկցիաներով բան ենք ստեղծում, որը նախարարություն չէ, սա ևս հաշվի առեք»:

Հայրապետյանը տեղեկացրեց, որ ստեղծվելիք կոմիտեն լինելու է ԱԳՆ ենթակայության տակ, հետևաբար ամեն չորեքշաբթի հնարավորություն են ունենալու հարցերով դիմել ԱԳ նախարարին: Նա տեսակետ հայտնեց, որ քննարկումներ կլինեն: Սփյուռքում առկա մտահոգություններին` բա հիմա ի՞նչ է լինելու, նա պատասխանեց.

«Շատ կարևոր է, որ մենք ապահովենք գործառույթների ժառանգականությունը, երբ գործառույթները շարունակվելու են իրականացվել, մտահոգվելու առիթ չկա, կարևոր է, որ աշխատանքները, որ տարվում են, շարունակվեն իրականացվել»: