Աղաջանովների ընտանիքը պահանջում է Մհեր Ենոքյանին դատաբժշկական փորձաքննության ենթարկել

Աղաջանովների ընտանիքը պահանջում է, որ իրենց որդու՝ Իոսիֆ Աղաջանովի սպանության համար նախ՝ մահապատժի, այնուհետև ցմահ ազատազրկման դատապարտված Մհեր Ենոքյանին դատաբժշկական փորձաքննության ենթարկեն: Այս մասին այսօր՝ հունվարի 24-ին կայացած ասուլիսի ժամանակ, հայտարարեց Աղաջանովների դուստրը՝ Ելենա Աղաջանովան՝ նշելով, որ բժշկի աչքի համար ակնհայտ է, որ Մհեր Ենոքյանը վտանգավոր է մարդկանց համար:

«Նա փսիխոպատ է, և ես համոզված եմ, որ դա կապացուցվի փորձաքննությամբ, քանի որ դա երևում է և՛ նրա խոսքից, և՛ հրապարակած նկարներից: Զարուհի Մեջլումյանը, որ նրա կինն է, կարծում ենք՝ նա էլ է հերթական զոհը Մհեր Ենոքյանի»,- ասաց Ելենա Աղաջանովան:

Ելենա Աղաջանովան տեղեկացրեց, որ առ այսօր չունեն որևէ պատասխան կառավարություն հանձնած նամակից, որով հանդիպում էին պահանջում վարչապետի հետ: Աղաջանովների ընտանիքը դիմել է նաև արդարադատության նախարարություն՝ Մհեր Ենոքյանի ներման գործընթացի մասին տեղեկություն ստանալու համար, սակայն ստացել է ոչինչ չասող պատասխան, որտեղ հղում անելով «Անձնական տվյալների պաշտպանության», «Ներման մասին» օրենքներին, նշվում է, որ այդ տեղեկությունը չեն կարող տրամադրել: Արցախի նախկին ՄԻՊ, փաստաբան Ռուբեն Մելիքյանն այստեղ լուրջ խնդիր է տեսնում:

«Սա Աղաջանովների ընտանիքի հետ առնչություն ունի, իհարկե, բայց ավելի լայն խնդիր է: Չի կարող մեր պետությունը հետ մնալ այն իրավական զարգացումներից, որ թե՛ եվրոպական, թե՛ ավելի լայն իրավապաշտպանական համակարգում առկա է և այնպիսի պնդումներ անի, որ պետությունը ոչ միայն չի կարող, այլև իրավունք էլ չունի զոհի ընտանիքին տեղեկացնել ներման գործընթացի մանրամասները: Ես իմ արտերկրի գործընկերների հետ նույնպես խոսել եմ, և նրանք զարմանում են՝ նշելով, որ ներման գործընթացում պարտադիր պետք է հաշվի առնվի տուժող կողմի կարծիքը»,- ասաց Ռուբեն Մելիքյանը:

Արցախի նախկին ՄԻՊ-ը որպես օրինակ մեջբերեց Հոկտեմբերի 27-ի ոճրագործության համար ցմահ դատապարտված Նաիրի Հունանյանին: Որքանո՞վ ճիշտ կլինի, որ Հոկտեմբերի 27-ի զոհերի հարազատները դրսում պատահաբար տեսնեն Նաիրի Հունանյանին, որը կպատասխանի, որ դուք պարտավոր չէիք, իրավունք էլ չունեիք իմանալու, պետությունը ինձ ներում է շնորհել:

Ռուբեն Մելիքյանը նաև նշեց, որ եթե Մհեր Ենոքյանին ներում շնորհվի, ապա ինքը օժանդակելու է, որ դիմեն Եվրոպական դատարան: Ռուբեն Մելիքյանը նաև տեղեկացրեց, որ օրենքը նախատեսում է, որ պատժի կրումից 20 տարի անց ցմահ ազատազրկված անձը կարող է դիմել ներման կամ վաղաժամկետ ազատման համար, սակայն Մհեր Ենոքյանի դեպքում ներումը հնարավոր չէ, քանի որ նա 2 անգամ դատապարտվել է փախուստ կատարելու համար:

«Մեր ընտանիքը համարում է, որ գործի մեջ ամեն ինչ պարզ է: Մենք ներկա ենք եղել դատական բոլոր նիստերին և ոչ մի կասկած չունենք, որ սպանության կազմակերպիչը հենց Մհեր Ենոքյանն է, բայց եթե համապատասխան մարմինները գտնեն, որ պետք է գործը վերաբացվի, մեր որոշելիքը չէ, թող վերաբացեն»,- ասաց սպանված Իոսիֆ Աղաջանովի հայրը՝ Միխայիլ Աղաջանովը:

Աղաջանովների ընտանիքը կարծում է, որ եթե Մհեր Ենոքյանը ներվի, ապա հասարակության առողջ մասը, զգալի մասը բացասական վերաբերմունք կարող է  ունենալ ներկայիս իրավակարգերի հանդեպ:

 «Վերջին 10 տարիների ընթացքում գնում է մարդասպանի գովազդը, հերոսացումը, որը շարունակվում է մինչ օրս: Ամեն կերպ հանրությանը փորձում են հասցնել այն ինֆորմացիան, որ նա անմեղ է: Մեր ընտանիքի մասին էլ շատ բաներ լսեցինք, օրինակ, որ կապված ենք նարկոբիզնեսի հետ, մեր փողերով ու ծանոթներով 20 տարի անմեղ մարդուն բանտում ենք պահում, լուրջ ազդեցություն ունենք բոլոր 3 նախագահների վրա, որ ունենք հրեական արյուն և արմատներ և այդ ամենի օգնությամբ ազդել ենք Լևոն Տեր-Պետրոսյանի կնոջ վրա, և նա կարգադրել է, որ անմեղ մարդուն մահապատժի դատապարտեն և այլն: Այս ամենը սուտ է՝ զրպարտություն, ինչի համար դատի ենք տալու Զարուհի Մեջլումյանին և պահանջելու ենք պատիվ»,- ասաց Ելենա Աղաջանովան: