Փաստաբանն ահազանգում է, որ դատարանն առանց հիմնավոր ապացույցների մեղադրյալին կալանքի տակ է պահում

Փաստաբան Ինգա Ավագյանն այսօր լրագրողների հետ հանդիպմանն անդրադարձել է անցած տարի տեղի ունեցած սպանության դեպքին: Արսեն և Աշոտ Աբրահամյաններին, ովքեր հարազատ եղբայրներ են, նախաքննության մարմինը մեղադրանք է առաջադրել ՀՀ Քրեական օրենսգրքի 104-րդ հոդվածի 2-րդ մասի 7-րդ կետով՝ նախնական համաձայնությամբ՝ սպանություն:

Հետագայում մեղադրանքը փոփոխվել է, և Աշոտ Աբրահամյանին մեղադրանք է առաջադրվել ՀՀ Քրեական օրենսգրքի 104-րդ հոդվածի 1-ին մասով, իսկ Արսենը ճանաչվել է անմեղսունակ:

Մինչդեռ գործի նախաքննության ընթացքում հիմնավորվել է, որ սպանություն կատարող անձը հենց Արսեն Աբրահամյանն է, որն էլ ի սկզբանե ընդունել է մեղքը, իսկ Աշոտ Աբրահամյանը որևէ կերպ սպանության հետ կապ չունի, ինչը հաստատվել է գործի քննության ընթացքում ձեռք բերված բազմաթիվ ապացույցներով, այդ թվում՝ նաև ներքին դիտման արդյունքում:

Փաստաբանը կարծում է, որ այս գործով դատարանը անօրինական գործողություններ է իրականացնում:

«Իմ ահազանգը կապված է այսօրվա մեր դատաիրավական համակարգում արդարության սկզբունքի հիման վրա: 2018թ. հունիսի 8-ին Գեղամավանում սպանվել է Հուսիկ Զաքարյանը: Նախաքննության ժամանակ քննիչի կողմից մեղադրանքը փոփոխվել և կրկին մեղադրանք էր առաջադրվել: Նախաքննության մարմինը կազմել է անհիմն մեղադրանք, որի բառացիորեն ձևակերպմամբ հասկանալի է, որ դրանում մեղադրանք առկա չէ: Երբ մենք վերլուծում ենք առաջադրված մեղադրանքը, բացակայում են հանցակազմի տարրերը: Աշոտ Աբրահամյանը պետք է ընդուներ ամբուլատոր հսկողություն հոգեբույժի կողմից: Այսօր 8 ամիս է, ինչ նա գտնվում է կալանքում: Ինձ համար անհասկանալի է, թե որ իրավաբանը կարող է սրան ճիշտ գնահատական տալ»,- ասել է փաստաբանը:

Ինգա Ավագյանը նշել է, որ անվստահություն ունի դատարանի հանդեպ.

«Դատարանը իր որոշման մեջ նշում է, որ հնարավոր է, որ Աշոտ Աբրահամյանը սպանության հետ առնչություն չունի, և օրենքն ասում է, որ եթե չկա հանցակազմ, չի կարող լինել հանցագործություն: Նախաքննության մարմինն անդրադարձել է մահացողի կնոջ ցուցմունքին, որ նա տեսել է Աշոտ Աբրահամյանին քայլելիս, բայց նա իրենց հարևանն է, և դա լրիվ նորմալ է: Մենք այս պահին փորձում ենք հիմնավորել, որ մենք ճիշտ ենք: Այսօր Աշոտին ազատազրկման է սահմանված մինչև տասնհինգ տարի ժամկետով»:

Փաստաբանը կարծում է, որ եթե անձը ճանաչվել է անմեղսունակ, ապա պաշտպանական կողմը անհասկանալի է, թե ինչի է սպասում, որ անպայման մեկին կալանավորեն: Ինգա Ավագյանը մտավախություն ունի, որ այսօր դատարանը սպանության դեպքում պետք է անպայման անձին դատապարտի անգամ առանց հիմնավոր ապացույցների առկայության:

Նա վստահ է, որ Աբրահամյանները անմեղ են: Ինգա Ավագյանը հայտնել է, որ հարկ եղած դեպքում գործը կհասնի ՄԻԵԴ:

Նա հորդորել է գլխավոր դատախազին ուսումնասիրել այս գործը: Տվյալ գործով դատական նիստը նշանակված է հունվարի 30-ին: