Իրենց ձեռքով հանեցին, իրենց ձեռքով էլ ընտրեցին. անցած ՏԻՄ ընտրությունների ամենաուշագրավ փաստերը

Հայաստանի 24 համայնքներում երեկ տեղական ինքնակառավարման մարմինների ընտրություններ են կայացել: Ընտրությունները կայացել են բոլոր մարզերում, բացառությամբ Սյունիքի: 20 համայնքում ղեկավար են ընտրել, 4-ում` ավագանի: Ընդ որում` 24-ից  10 համայնքներում ընտրությունները եղել են արտահերթ:

Ընդհանուր առմամբ ընտրություններին մասնակցել է 37 հազարից ավելի մարդ կամ ընտրողների ընդհանուր թվի մոտ 58,5 %-ը։  SHANTNEWS.am-ն ամփոփել է անցած ՏԻՄ ընտրությունների ամենահետաքրքիր փաստերը:

24 համայնքներից ընդամենը երկուսն են քաղաքային` Իջևանում ավագանի են ընտրել, Վարդենիսում` համայնքի ղեկավար: Բայց Վարդենիսի նման փոքր քաղաքային բնակավայրերում ընտրություններն առանձնապես չեն տարբերվում գյուղական ընտրությունների ընդհանուր տրամաբանությունից: Գյուղական ընտրություններն իրենց օրինաչափություններն ու առանձնահատկությունները ունեն: Նախ` ընտրողները միշտ ակտիվ են, հատկապես գյուղապետ ընտրելիս, թեկնածուներն էլ շատ են: Ոնց էլ լինի, ամեն մի գյուղացի մի թեկնածուի հեռու-մոտիկ բարեկամը կլինի:

Ստացվում է՝ ամբողջ գյուղը մասնակցում է ընտրություններին, չմասնակցելն ամոթ է: Իսկ տոկոսը ինչո՞ւ 100-ի չի հասնում, որովհետև բացակայողներ միշտ կան՝  դուրսուներս անող, խոպան գնացող-եկողներ, այնպես որ, եթե թեկնածուները շատ են, ապա ընտրությանը մասնակցողների թվից կարելի է գյուղի նաև ներկա-բացակաների մոտավոր թիվն իմանալ:

Մասնակցության ամենամեծ թիվը` մոտ 80 տոկոս, գրանցվել է Ակնաղբյուր և Օհանավան գյուղերում, որտեղ 5-ից 4-ը գնացել է ընտրության: Շատ ցածր տոկոսներ էլ կան: Օրինակ` Արմավիրի մարզի Հայկավանում մասնակցությունը 30 տոկոս է եղել:

Պատճառն այն է, որ թեկնածուն էր մեկը: Գործող գյուղապետն ինքնաառաջադրվել ու ընտրվել է: Հարազատ-բարեկամներն էլ գնային ընտրության, բավարար էր:  Տավուշի մարզի Գետահովտում ավելի քիչ էր մասնակցությունը՝ ընդամենը 23 տոկոս:  Այստեղ էլ ուրիշ պատճառ կա: Ոչ թե գյուղապետ,  այլ  ավագանի են ընտրել` 7 տեղի համար 7 թեկնածու էր առաջադրվել: Պայքար չկար:

Պակաս հետաքրքիր չէ գյուղական ընտրությունների քաղաքական պատկերը: Քաղաքական ուժերի վարկանիշն ու ազդեցության գործոնը այստեղ շատ էական դեր կարող են  չխաղալ, ավելին, կարող են ընդհանրապես դեր չխաղալ: 20 համայնքից 16-ում համայնքապետի պաշտոնում առաջադրված թեկնածուներից ոչ ոք  որևէ կուսակցության անդամ չէ:  Իսկ ընդհանրապես,   համայնքապետի 65 թեկնածուներից ընդամենը 11-ն է  կուսակցական` 7-ը՝  «Քաղաքացիական պայմանագրից»,  2-ը՝ ՀՅԴ-ից, մեկական էլ ՀՀԿ-ից ու ԲՀԿ-ից: ՔՊ-ական 7 թեկնածուից 5-ը պարտվել է, ընդ որում, նրանցից երեքը պայքարել են մեկ տեղի համար, իսկ մյուս քաղաքական ուժերից հաղթողներ ընդհանրապես չեն եղել:

Ավելի ապաքաղաքականացված է ավագանիների պատկերը:  60 թեկնածուից այստեղ ընդամենը 2-ն է կուսակցական` ներկայացնում են ՀՅԴ-ն:

Եվս մեկ հետաքրքիր փաստ

Ընտրություններին մասնակցել են նաև երեք համայնքների ընդամենը վերջերս հրաժարական տված ղեկավարներ: Ուրցաձորի ու Վարդանաշենի նախկին գյուղապետերը դարձյալ իրենց տեղերում են: Աշնանը գյուղացիների մեծ մասը ճնշեց գյուղապետերին, որ հրաժարական տան, գարունը չեկած, փոշմանեց: Ստացվում է՝ իրենց ձեռքով հանեցին, իրենց ձեռքով  էլ ընտրեցին, իսկ Աշոցքի հանրապետական նախկին ղեկավարը պարտվեց:

Բայց ամենացավալին այս ընտրությունները եղան Արարատի մարզի Վարդաշենի համայնքապետի պաշտոնի  համար երկուսի պայքարում երկրորդը դարձած թեկնածուի համար: Գործող գյուղապետի հավակնորդն ընդամենը մեկ ձայնով պարտվեց: Այստեղ  են ասում,  թե ընտրություններում յուրաքանչյուր ձայնն է կարևոր: