Առողջապահության ազգային ինստիտուտում ուռուցքաբանության ամբիոն է բացվել

ՀՀ. ԱՆ. Առողջապահության ազգային ինստիտուտում Ուռուցքաբանության ամբիոն է բացվել։ Ամբիոնի վարիչ է նշանակվել բժիշկ-ուռուցքաբան Վահե Տեր-Մինասյանը։

«Ուռուցքային գոյացությունները, հանդիսանալով առավել հաճախ հանդիպող հիվանդություններից, միաժամանակ ցուցաբերում են հիվանդացության աճի շարունակական պատկեր ամբողջ աշխարհում՝ միջինում ավելացնելով նոր գրանցվող դեպքերի քանակը 1,5-4.0%։

Միաժամանակ ողջ աշխարհում շարունակական բնույթ են կրում այս հիվանդությունների բուժման և կանխարգելման նորագույն մեթոդների մշակումն ու ներդրումը, ինչն իր հերթին պարտադրում է այս ոլորտի մասնագետների շարունակական և անընդմեջ կրթություն և վերապատրաստում։ Բնականաբար, նման անհրաժեշտություն կա նաև ՀՀ-ում, որտեղ մասնագիտական գիտելիքների արդիականացմանը զուգահեռ ունենք բժիշկ-ուռուցքաբանների անհրաժեշտություն։ Մասնավորապես, առողջության պահպանման առաջնային օղակներում ուռուցքաբան մասնագետներին մեծամասամբ փոխարինում են ընտանեկան բժիշկները։ Միաժամանակ, հաշվի առնելով ուռուցքային հիվանդությունների շարունակական աճը, անհրաժեշտություն է առաջանում այս պաթոլոգիայով զբաղվող նոր բժշկական միավորների ստեղծումը, ինչը կարող է իրականություն դառնալ միայն համապատասխան մասնագետների առկայության պարագայում։ Խոսքը տվյալ պարագայում վերաբերում է ինչպես վիրաբուժական, այնպես էլ քիմիաթերապևտիկ և ճառագայթային բուժման մեթոդներին։ Նորաստեղծ ուռուցքաբանության ամբիոնը իր կառուցվածքով և գաղափարախոսությամբ պետք է ծառայի վերը նշված խնդիրների լուծմանը՝ ապահովելով որակյալ բժիշկ-ուռուցքաբանների համակողմանի կրթությունը՝ միջազգային չափանիշներին համապատասխան։

Ամբիոնը դեռ նոր է ձևավորվում, բայց արդեն իսկ ունենք նախնական պայմանավորվածություններ, որ լավագույն օրդինատորները մեզ մոտ կստանան կրթական դրամաշնորհներ, ուսուցման որոշակի հատվածը կանցնեն արտերկրի կենտրոններում, ինչպես նաև հնարավոր է կնքվեն նախնական պայմանագրեր՝ ուսուցումն ավարտելուց հետո աշխատանքի ապահովման հարցով՝ մեր լավագույն կենտրոններում: Անելու ենք ամեն բան՝ ապահովելու համար ժամանակակից գիտելիքներով և մոտիվացված երիտասարդ բժիշկների սերունդ ստեղծելու համար»,- ասված է հաղորդագրության մեջ:

ՀՀ. ԱՆ. Առողջապահության ազգային ինստիտուտի Ուռուցքաբանության ամբիոնում հավաքվել են հայտնի մասնագետներ.

• Ամբիոնի վարիչ Տեր-Մինասյան Վահե՝ բժշկական գիտությունների թեկնածու, Հայ-Ամերիկյան առողջության կենտրոնի վիրաբուժական գինեկոլոգիայի ծառայության ղեկավար
• Քարամյան Ներսես՝ բժշկական գիտությունների դոկտոր, «Իրամեդիքլ գրուպ» ճառագայթային կենտրոնի ռադիացիոն ուռուցքաբան
• Գյոքչյան Հայկուհի՝ բժշկական գիտությունների թեկնածու, «Էրեբունի» ԲԿ, ուռուցքաբանության բաժնի վարիչ, ուռուցքաբանության գծով փոխտնօրեն, Երևան քաղաքի գլխավոր ուռուցքաբան-քիմիաթերապևտ
• Գալստյան Գալուստ՝ բժշկական գիտությունների թեկնածու, «Նաիրի» ԲԿ օնկոօրթոպեդիայի և ոսկրային պաթոլոգիայի ծառայության ղեկավար
• Ակունց Արամ՝ «Սլավմեդ» ԲԿ ընդհանուր և լապարասկոպիկ վիրաբուժության բաժանմունքի վարիչ»։