Մի շենք, մի ավտոկանգառ և ուրիշ ոչինչ. ի՞նչ է տեսել վարչապետը Մեղրու ազատ տնտեսական գոտի այցի ժամանակ

ԱԺ «Բարգավաճ Հայաստան» խմբակցության անդամ Միքայել Մելքումյանը նշեց, որ Մեղրիում արտագնա նիստ են անցկացրել, և հիմնական քննարկման հարցը Մեղրու ազատ տնտեսական գոտու խնդիրն է եղել: Այդ հանդիպման ժամանակ, ըստ Մելքումյանի, արձանագրեցին երեք խնդիր: Պատգամավորն ասաց, որ Մեղրու տնտեսական գոտին շահագործման է հանձնվել 2017 թ. վերջերին, ապա հիշեցրեց՝ դա ԵԱՏՄ քվոտայով տրամադրված միակ ազատ տնտեսական գոտին է:

Մելքումյանն ասաց՝ խնդիրներից մեկն այն է, որ շինարարի հետ չեն կարողանում վերջնական շահագործման ակտ ունենալ, բացի դրանից՝ սահմանապահ կառույցների հետ ընթացակարգային հարց կա, իսկ երրորդը հարակից հողերի ձեռքբերման խնդիրն է:

Հարցին արձագանքեց ՀՀ վարչապետ Նիկոլ Փաշինյանը:

«Պարո´ն Մելքումյան, Ձեր թված պատճառները գլխիվայր կշրջեի և կսկսեի հարակից հողերի հարցից: Ես այց կատարեցի Մեղրի, նաև ազատ տնտեսական գոտի այցելեցի, պարզվեց, որ այն, ըստ էության, հողատարածք չունի, ինչո՞ւ, քանի որ այն ժամանակ, երբ բարձրաստիճան որոշ պաշտոնյաներ տեղեկացել էին, որ այդտեղ լինելու է ազատ տնտեսական գոտի, շատ արագ կողքի հողերը սեփականել էին: Այդտեղ կա ազատ տնտեսական գոտի, մի շենք, մի ավտոկանգառ և ուրիշ ոչինչ, այսինքն՝ փաստացի տարածք չկա գործունեություն ծավալելու»,- ասաց նա:

Վարչապետը հայտնեց, որ այդ փաստից հետո սկսվեց հետաքննություն, հարուցվեց քրեական գործ, դրանով ձեռք բերված ապացույցների հիման վրա ընթացակարգ է սկսվել այդ հողերի ապօրինի սեփականաշնորհումները հետ շրջելու համար, որպեսզի ազատ տնտեսական գոտին իրոք ազատ տնտեսական գոտի դառնալու հնարավորություն ունենա: Փաշինյանը նշեց, որ այդ հարցը դատարանի օրակարգում է, թեպետ կառավարությունը և քննչական մարմինը ամեն ինչ արել են, որ հարցը արագ լուծում ստանա, դատական ընթացակարգերով պիտի անցնի:

«Սահմանապահ ուղեկալի հետ աշխատանքների կազմակերպման մասին նշեմ, որ դա հայ-իրանական միջկառավարական հանձնաժողովի քննարկման առարկա է, ՀՀ կառավարության համապատասխան աշխատանքային խումբը քննարկում է այն: ՄԵղրու անցակետի արդիականացման շատ խոշոր ծրագիր կա: Եթե դա Ձեզ հետաքրքրի, ես կարող եմ նախագիծը վիդեոտարբերակով տրամադրել: Մեր հաշվարկներով՝ այն հնարավոր կլինի իրականացնել 2023 թ., մինչ այդ հողերը կվերադարձնենք»,- նշեց վարչապետը:

Ինչ վերաբերում է շինարարների հետ կապված հարցերին՝ Փաշինյանն ասաց, որ գնի հետ կապված հակասություններ կան, շինարարը կարծում է՝ ավելի շատ գումար պիտի ստանա, իսկ նախագծով այլ գումար է եղել: Վարչապետը խոստացավ՝ այդ հակասությունն էլ լուծում կստանա մինչև հողերի վերադարձը:

«Եթե հիշողությունս ինձ չի դավաճանում՝ մի տնտեսվարող Մեղրիի ազատ տնտեսական գոտում գործունեություն ծավալելու արտոնություն է ստացել, բայց եկեք, այնուամենայնիվ, իրավիճակը գլոբալ իրողություններից կտրված չնայենք: Իրանի Իսլամական Հանրապետության շուրջ աշխարհաքաղաքական որոշակի կոնյունկտուրա գոյություն ունի: Նրանք, ովքեր հետաքրքրված են կամ կարող են հետաքրքրված լինել այստեղ գործունեություն ծավալելով՝ իրենց առաջին հայացքը ուղղված է դեպի Իրանի շուկա: Երբ այս տեսակետից ռիսկեր են տեսնում, այդ ռիսկերն ու անորոշությունները նեգատիվ ազդեցություն են ունենում գործընթացի վրա: Դա էլ պետք է հաշվի առնել»,- ասաց Փաշինյանը: