Իեն Գիլանը՝ սուպերսթարցիների հետ նույն բեմում․ ինչ են պատմում կազմակերպիչներն ու մասնակիցներն անմոռանալի համերգի մասին

10 տարի առաջ «Շանթ» հեռուստաընկերության «Հայ Սուպերսթար» մրցույթի շրջանակում տեղի ունեցավ մի համերգ, որը դաջվեց ոչ միայն մասնակիցների ու ներկաների, այլևւ հեռուստադիտողների հիշողության մեջ: Մեդիամաքս մեդիա ընկերության տնօրեն Արա Թադևոսյանի առաջարկով՝ հայ երգիչներին լսելու էր եկել «Deep Purple» լեգենդար ռոք-խմբի մեներգիչ Իէն Գիլանը: Համերգից 10 տարի անց «Մեդիամաքս»-ը այդ հիշարժան երեկոյի կազմակերպիչների և մասնակիցների հետ ու վերհիշել այդ գերլարված ու երջանիկ օրը:

«Իմ առաջին սպիտակ մազերն այդ համերգից հետո ի հայտ եկան».Անդրե Սիմոնյան, երաժիշտ, «Հայ Սուպերսթար» նախագծի պրոդյուսեր

Համերգի կրկնությունը «Շանթի» եթերում օրեր առաջ չեմ կարողացել դիտել, քանի որ այս պահին Լոնդոնում եմ: Համաճարակային իրավիճակով պայմանավորված՝ բոլոր թռիչքները հետաձգվել են, ու Հայաստան հետ գալ չեմ կարող: Բայց վերադառնանք 10 տարի առաջվա դեպքերին, երբ նման իրավիճակ ոչ մեկիս մտքով դեռ չէր անցնում (ծիծաղում է,-հեղ.): 10 տարի առաջ համացանցը, սոցիալական ցանցերն այնքան տարածված չէին, որքան հիմա: Հենց նմանատիպ նախագծերն էին մարդկանց համար որակյալ երաժշտություն լսելու այլընտրանք ստեղծում: Այսօրվա պես եմ հիշում այն զանգը, որը ստացա «Շանթի» տնօրենից: Պարոն Եզեկյանն ասաց, որ Արա Թադևոսյանը հետաքրքիր գաղափար է առաջարկել, պետք է քննարկել: Որոշվեց ընտրել մի քանի մասնակցի, ովքեր կերգեն «Deep Purple» խմբի հայտնի երգերը:


«Գիլանի՝ բեմ բարձրանալու պահն աննկարագրելի էր». Սուրեն Առուստամյան

Վերջին փորձի ժամանակ անակնկալ կերպով ներս մտավ Իէն Գիլանը: Այդ պահին, թարսի պես, ես էի երգում (ծիծաղում է,-հեղ.): Բնականաբար, շատ հուզվեցի, չգիտեի` ինչ անել, լարված պահ էր: Դա համերգի օրն էր՝ առավոտյան: Երեկոյան արդեն գլխավոր համերգն ուղղակի անհավատալի էր. մեզնից մի քանի մետր այն կողմ նստած էր մի մարդ, ով դասվում է լեգենդների շարքին, ում լսել էինք միայն հեռուստատեսությամբ: Կարծում եմ` կարողացանք հուզմունքն ու անհանգստությունը մի կողմ թողնել ու վայելել օրը: Վերջին երգի ժամանակ, որը ես էի կատարում, Գիլանը բեմ բարձրացավ, այդ պահն աննկարագրելի էր: Համերգից որոշ ժամանակ անց ինձ զանգեցին ու ասացին, որ «Deep Purple» խումբը Հայաստանում պետք է մենահամերգ ունենա, և Իէն Գիլանն ինձ հրավիրում է համերգին, որ իրենց հետ նվագեմ: Շոկային ու ուրախալի նորություն էր մի մարդու համար, ով դեռ 20 տարեկան երիտասարդ էր ու Գիլանի մեծ երկրպագու:

Համերգը` հնարավորություն

Արդեն հինգ տարի է՝ բնակվում եմ Միացյալ Նահանգներում: Հայաստան գալիս եմ, բայց մշտական դեռ չգիտեմ, թե երբ կվերադառնամ: Այստեղ ունեմ խումբ, որի հետ շատ համերգներ ենք ունենում: Երգերը հիմնականում անգլալեզու են, բայց նաև հայերեն նոր երգեր, հին երգերի նոր մշակումներ ունենք: Մեր լսարանը շատ տարբեր է: Ճիշտ է՝ հիմնականում հայեր են, բայց նաև ռուսներ, մեքսիկացիներ և այլ ազգերի ներկայացուցիչներ կան: Հայաստանում մեկ բեմում հանդես գալուց հետո ընկերացանք Գիլանի հետ: Հիմա նրա օգնականն իմ մտերիմ ընկերն է, և երբ Լոս Անջելեսում համերգ են ունենում, անպայման ինձ հրավիրում է:


«Գիլանի այդ խոսքերն անհնար է մոռանալ». Իվետա Մուկուչյան

Իէն Գիլանին հյուրընկալելը և նրա համար երգելն իսկապես մեծ իրադարձություն էր մեզ համար: Հույզերը կրկնակի են, երբ դու դեռ սկսնակ ես, իսկ մենք նոր էինք սկսում մեր ուղին: Մեծ ձեռքբերում էր Իէն Գիլանի համար երգելը, ընդ որում՝ համերգի ավարտին «Smoke on the Water» երգը միասին երգելու հնարավորություն ունեցանք: Մնայուն հիշողություններ են, որոնք առ այսօր Սուրեն Առուստամյանի հետ վերհիշում ենք: Մեծ պատասխանատվություն էր, շատ երիտասարդ էինք, նույնիսկ չգիտեինք՝ արդյոք երգարվեստը կլինի կյանքի մեր հիմնական ուղին, բայց Իէն Գիլանը մեզ շատ էր ոգևորել, և նրա խոսքերը ստեղծագործական առումով շատերիս օգնել են հետագայում: Իէն Գիլանն իսկապես մեզ մեծ ուժ էր տվել: Երբեք չեմ մոռանա, թե ինչպես Իէն Գիլանը, տեսնելով գոտիս, որի վրա պարկուճներ էին, ասաց, որ ես դրանց կարիքը չունեմ, որովհետև իմ զենքը հենց իմ ձայնն է: Այս խոսքերն անհնար է մոռանալ: Այդ իրադարձությունից արդեն 10 տարի է անցել, շատ երիտասարդ էինք, անփորձ: Նայելով այդ կադրերը՝ գուցե շատերը գոհ չլինեն իրենց արտաքինից, հագուստից և այլ բաներից, սակայն դա մեր կյանքի մի հատվածն է, որի համար պետք է միայն հպարտանանք ու սիրով հիշենք:

«Բեմում մոռացա, որ հիվանդ եմ». Ռաիսա Ավանեսյան

Այդ համերգը, կարծում եմ, Հայաստանի համերգների պատմության մեջ լավագույններից էր: Համերգի օրը ես հիվանդ էի ու բարձր ջերմություն ունեի, բժիշկները խորհուրդ էին տվել չմասնակցել: Բայց մի՞թե ամեն օր Իէն Գիլանի նման հանդիսատես կունենաս. չէի կարող ոչ մի դեպքում այդ համերգը բաց թողնել: Անկեղծ ասած՝ «Deep Purple» խմբի երգերին ծանոթ չէի, բայց գիտակցում էի, թե ով է Գիլանը: Խնդրեցի բժիշկներին միայն այնպես անել, որ չուշաթափվեմ ու կարողանամ ոտքի վրա կանգնել: Երբ բեմ դուրս եկա, մոռացա նույնիսկ, որ հիվանդ եմ. հաջող ելույթ ունեցա:

Հիմա արդեն վեց ամիս է՝ Հայաստանում եմ: Եկել եմ մշտական բնակության համար: Հեշտ չեմ ընդունել այս որոշումը, բայց վստահ եմ՝ Թեհրան հետ չեմ գնա: Հիմա բենդ ունեմ, համերգներով ենք հանդես գալիս: Ունեմ նաև նոր երգ, որը երկու լեզվով է՝ հայերեն և անգլերեն: Տեսահոլովակ կնկարահանեմ ու նոր ոճ կբերեմ հայկական շոու բիզնես:

«Այդպիսի համերգ նախկինում չէր եղել».Հունան Համբարյան

Երբ խոսում եմ այդ համերգի մասին, չեմ կարող չնշել այն մեծ հնարավորության ու պատասխանատվության մասին, որը մեզ տրվեց: Ճիշտ է՝ նախապատրաստական փորձերը երկար էին տևում, բայց հոգնածություն չէինք զգում. չէ՞ որ օրեր հետո Իէն Գիլանի հետ էինք հանդիպելու: Այդպիսի համերգ նախկինում չէր եղել և, կարծում եմ, չի լինի այլևս: Համերգի օրն այնքան էլ լարված չէի, զգում էի, որ եթե լարվեմ, կխանգարի ինձ: Կենտրոնացել էի միայն ելույթիս ու շոուի վրա: Հիշում եմ` Ռայան ասում էր՝ տեսնես ինչպես ելույթ կունենաք, տեսնես ամեն ինչ ինչպես կդասավորվի:

Զրուցեց` Մարիամ Խաչատրյանը/Bravo.am/
Լուսանկարները՝ BRAVO.am-ի