Առաջարկվում է օրենսգրքից հանել մանդատների առնվազն 40% ստացած կուսակցությունների ընտրական բոնուսը. ԱԺ-ում քննարկել են ԸՕ փոփոխությունները

Այսօր կայացել է Ազգային ժողովի տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի հերթական նիստը: Նիստի օրակարգում 6 հարց էր ընդգրկված:

Դրանցից մեկով երկրորդ ընթերցմամբ հավանություն է տրվել «Ընկերությունների կողմից վճարվող բնապահպանական հարկի նպատակային օգտագործման մասին» օրենքում փոփոխություններ և լրացում կատարելու մասին նախագծին:

Տարածքային կառավարման և ենթակառուցվածքների նախարար Սուրեն Պապիկյանն էլ ներկայացրել է «Հայաստանի ընտրական օրենսգիրք» սահմանադրական օրենքում կուսակցությունների, տեղական ինքնակառավարման օրենքում փոփոխություններ և լրացումներ կատարելու մասին նախագծերը:

Պետաիրավական հանձնաժողովի կողմից ստացվել է շուրջ 44 առաջարկություն, որից 42-ն ընդունվել է:

Նախագիծը ներկայացնելիս Սերգեյ Բագրատյանը առաջարկ ներկայացրեց՝ ընտրություններում քաղաքացիների մասնակցության թիվը մեծացնելու համար գտնել մեխանիզմ:

«Ցավոք, ինչպես շատ երկրներում, այնպես էլ Հայաստանում, մասնակցության տոկոսը միշտ չէ , որ արդարացնում է մեր սպասելիքները: Մշակենք այնպիսի մեխանիզմ, որ մասնակցությունը լինի ոչ թե պարտադիր, բայց առնվազն ցանկալի, այն իմաստով, որ եթե չի մասնակցում քվեարկությանը, չկարողանա օգտվել որոշակի սոցիալական ծրագրերից: Այսինքն, եթե ինքը իր պարտավորությունը պետության հանդեպ չի կատարում և ապահովում արդար ընտրություն, նաև իրավունք չունի պահանջել, որ պետությունը իր նկատմամբ իր պարտավորությունը կատարի: Պետք է այնպիսի մեխանիզմ մշակել, որ Սահմանադրությանը հակառակ չլինի, որովհետև դա իրավունք է մասնակցությունը և պետք է դա չդիտարկենք որպես իրավունքի սահմանափակում, բայց քննարկենք նոր հնարավորություն, քանի որ շահարկվում է, որ մասնակցությունը ցածր է եղել և չի արտահայտում ժողովրդի կարծիքը»,- ասաց Սերգեյ Բագրատյանը:

Առաջարկին ի պատասխան՝ նախարարը ասաց, որ քաղաքացու իրավունքը գերակա խնդիր է և որ այս դեպքում խնդիրն ավելի շատ կապված է ցուցակների հետ, քան ընտրություններին մասնակցելու քաղաքացու ցանկության:

Ցուցակներում ներառված քաղաքացիներից շատերը երկրում չեն և նույնիսկ ՀՀ քաղաքացի չեն, բայց նրանց անունները դեռ ցուցակներում են:  Այս խնդրի կարգավորման ուղղությամբ պատկան մարմիններն արդեն աշխատանք տանում են:

«Մենք կունենանք 80-90 տոկոս մասնակցություն, որովհետև իրական մարդիկ կգնան ընտրության և իրական մարդիկ կօգտվեն ընտրությունները բոյկոտելու իրավունքից»,- պատասխանեց նախարարը:

Մանրամասները՝ տեսանյութում: