Ծաղիկներ, գրքեր ու դեղորայք. կորոնավիրուսը մեր գործընկերոջն էլ չշրջանցեց. Սագօ Արեանի և նրա ընտանիքի պատմությունը

Սա Սագօի ընտանիքի և առօրյայի՝ այս օրերի թերևս ամենաբնորոշ պատկերն է: Ծաղիկներ, գրքեր ու դեղորայք` մի տեսակ սիմվոլիզմ կա այս ամենում: Հատկապես հիմա, երբ շատ է տարածված «կորոնավիրուսից հետո էլ կա կյանք» արտահայտությունը: Ծաղիկները հենց այդ կյանքի խորհուրդն ունեն, որոնք, ի դեպ, այգու ցանկապատի արանքից Սագօի կինը՝ Անուշն է ստացել ընկերուհիներից՝ դեղերի հետ: Գործընկերոջս ընտանիքում կորոնավիրուսը հայտնվեց անկանխատեսելի և անսպասելի: Անսպասելի ոչ թե նրա համար, որ իրենք էլ կարծում էին վարակը չկա կամ իրենց կշրջանցի, այլ նրա համար, որ հակահամաճարակային բոլոր կանոնները փորձում էին պահպանել: Այս դեպքում վստահ է, որ որևէ մեկի անփութության արդյունքում են հիվանդացել:

Գանգատները առաջինը տեղամասային բժշկին են ներկայացրել՝ նրանից խորհուրդ լսելու և իրենց հետագա անելիքների մասին պատկերացում կազմելու ակնկալիքով: Բժիշկը խորհուրդ է տվել ջերմիջեցնող և ցավազրկող խմել ու սպասել, քանի դեռ ջերմությունը բարձր չէ: Գնալով ահագնացող ցավերը, սակայն, սպասել չեն տվել: Սագօն ինքն է իր ոտքով գնացել թոքերի համակարգչային տոմոգրաֆիայի: Պարզվել է՝ միակողմանի թոքաբորբ ունի: Մասնավոր բժշկական կենտրոնից խորհուրդ են տվել թեստավորում անցնել: Ախտանշանները կորոնավիրուսի հարուցած հիվանդությանն են նման եղել: Լսել է հորդորներն ու «Նորք» ինֆեկցիոն հիվանդանոց շտապել:

«Մի կողմից ցավերն էին, մյուս կողմից՝ ինֆեկցիոն հիվանդանոցի դաժան պատկերները»,- պատմում է գործընկերս:

Սագօն ու ընտանիքի անդամները հիվանդանոցում չհայտնվեցին՝ չնայած թեստ հանձնելուց երկու օր անց կորոնավիրուսը հաստատվեց: Այդ ժամանակ արդեն ախտանշաններ են եղել նաև կնոջ ու երկու որդիների մոտ: Ջերմել են, ունեցել գլխացավեր, կորցրել հոտի և համի զգացողությունը: Այս ամենով հանդերձ, բարեբախտաբար, վարակի հետևանքներն այնքան ծանր չեղան, որքան շատերի հետ է պատահում: Ի սկզբանե տանն են եղել և մինչ օրս էլ շարունակում են բուժումները տանը ստանալ, թեպետ կորոնավիրուսի պարագայում բուժում ասվածը հարաբերական է:

Սագօն այս ընթացքում մաշկի վրա զգաց նաև այն, ինչ լրագրող լինելով՝ լսել էր ուրիշներից․ պոլիկլինիկաների բժիշկների ոչ այնքան արագ արձագանքն ու որոշ դեպքերում անարձագանք մնացած ահազանգերը շտապ օգնություն:

Ամեն դեպքում, վարակը ու դրա բերած վտանգը կյանքի նկատմամբ այս ընթացքում մտածելու ու անցածը գնահատելու շատ առիթներ է տվել: Անցյալի, ներկայի ու ապագայի մասին պատկերացումները վերարժևորվել են ու նոր կարևորություն ստացել:

Աշխատանքն այս օրերին, իհարկե՝ հեռավար, Սագօի համար նաև դեղամիջոց էր, դեղամիջոց սթրեսի ու խուճապային տրամադրությունների դեմ: Արդյունքը շատերդ արդեն տեսել եք՝ կորոնավիրուսով վարակված գործընկերս շարունակել է այս ընթացքում աշխարհի տարբեր երկրներում կորոնավիրուսային իրավիճակի վերաբերյալ հարցազրույցներ վարել հեռավար: