Անհնարին թվացող սիրո հաղթանակ. նոր դորամա «Շանթ»-ի եթերում` «Սերը լուսնի լույսի տակ»

Ընդամենը մի քանի օրից «Շանթ» հեռուստաընկերության եթերում էկրան կբարձրանա ևս մեկ նոր կորեական դորամա: Այն շատերին ծանոթ ու սիրելի է, իսկ անծանոթներին դեռ կհասցնի գրավել: Այդ մասին աշխարհի տարբեր երկրներում ցուցադրությունների վարկանիշն է փաստում:

Առհասարակ կորեական դորամաների ցուցադրությունը շարունակելը նաև մեր հազարավոր հեռուստադիտողների առաջարկն էր, ինչ-որ տեղ՝ նաև պահանջը: Շատերի մոտ նման ցանկությունն ակնհայտորեն առաջացավ «Արևի հետնորդները» դրաման դիտելուց հետո կամ գուցե հենց առաջին իսկ սերիայի ընթացքում: Սրանք ընդամենը խոսքեր չեն, ամեն մի ասված բառ ունի իր փաստերը: Դրանք, օրինակ՝ մինչ օրս չդադարող այն նամակներն ու մեկնաբանություններն են, որոնք ստանում ենք «Արևի հետնորդների» և ընդհանրապես կորեական դորամաների մասին:

Զգացմունքները զսպելու և դրա դեմ պայքարում միշտ պարտվում ես. սրա օրինակն են նաև ֆիլմի հերոսները: Թվում է միշտ չէ, որ ամեն ինչ հեշտ է տրվում, շատ հաճախ առավել ևս սերը: Սա հենց այդ դեպքն է, այդ պատմությունը, արքայազնի և ծառայի սիրո պատմությունը, վերևում և ներքևում գտնվողների այդ թվացյալ խոչընդոտը, թվացյալ, որովհետև իրական սերն այդ պայմանական ու անընդունելի բաժանումները ստվերում է, մերժում ու իսկույն ի չիք դարձնում այն, և վեր է հառնում նորից խեղդվող հեքիաթը:

… Խոստումը պահելը միշտ չէ, որ հեշտ ու հարթ ճանապարհ է ենթադրում: Հատկապես այս դեպքում, երբ նրանց սերը գաղտնիության ու խորհրդավորության քողով է ծածկված, և միակ վկան լուսինն է, որ անխոս հետևում է սիրո պայքարին: Այս առումով ֆիլմի հեղինակներից մեկը մի առիթով ասել է, որ իրենց ուշադրության կենտրոնում եղել է ռոմանտիկ, գեղեցիկ, բայց տխուր սիրավեպի ստեղծումը: Ցանկացել են պատմել մի պատմություն, որի հետ շատ հեշտ է բացահայտվելը, ասել է թե՝ հոգին թարգմանելն ու հաղթահարելը նաև տարբեր խավերի միջև սիրո թվացյալ անհնարինությունն ու լսել միայն սրտի ձայնը, որովհետև սիրտն է, որ հաստատ չի խաբի: Նրանք կսովորեցնեն պայքարել հանուն նպատակի, հանուն սիրո և մերժել վերևում և ներքևում գտնվելու մերժելի հոգեբանությունը:

Ահա այս պարզության, անկեղծության և հաստատ շատերին սրտամոտ պատմության մեջ է թերևս դորամայի հաջողության գաղտնիքը: Հենց այս հատկանիշներն են, ըստ էության, գրավել հեռուստադիտողներին, և այն հասել է առավելագույն վարկանիշին և արժանացել գովասանքի արտադրության, բեմադրության և երաժշտության համար:

Անգամ քննադատները ֆիլմն իր էությամբ անվանել են «Լուսնի լույսի սինդրոմ»: Գեղեցիկ է, չէ՞ հնչում, նույնքան գեղեցիկ է ողջ ֆիլմը՝ իր գույներով ու տեսարաններով, իր պատմությամբ. յուրօրինակ ու այնքան անհնարին թվացող սիրով, որ պիտի դժվարություններ հաղթահարելով դառնա հնարավոր:

Եվ ինչ-որ տեղ նաև հենց այդ դժվարությունների մեջ է գեղեցկությունը, չէ՞ որ այն ինչ ինքդ ես վաստակում փորձությունները պատվով հետևում թողնելուց հետո, գիտես ու գնահատում ես ձեռքբերումդ, առավել ևս վերափոխելու հատկություն ունեցող զգացմունքը՝ սերը:

«Սերը լուսնի լույսի տակ» դորաման միջազգային հեղինակավոր մրցանակաբաշխություններում տարբեր անվանակարգերում առաջատարն է եղել: Դորամայի հիմքում եղած վեպի վաճառքը դրա ցուցադրումից հետո աճել է մինչ 56%, իսկ արտերկրում ունեցած պահանջարկը հանգեցրել է նրան, որ վեպը թարգմանվել է տարբեր լեզուներով: Մեկ այլ փաստ ևս՝ պատկերացնո՞ւմ եք, դրամայի մասին պատմող 336 էջանոց պաշտոնական ֆոտոալբոմը դարձել է բեսթսելլեր:

Ինչպես ասում են, դիտելու հնարավորությունը մեզնից, վայելելը՝ ձեզանից: Եվ ուրեմն, հունիսի 25-ից՝ ժամը 20:40-ից «Շանթ»-ի եթերում լուսնի հետ արդեն դուք էլ հնարավորություն կունենաք հետևել արքայազնի և գեղեցկադեմ ծառայի սիրո խորհրդավոր ու փշոտ ճանապարհին, սիրո պայքարին, պայքար, որ սերը չընդհատվի, պայքար, որ այս հեքիաթում էլ բարին հաղթի չարին, և, ի վերջո, հաղթի սերը լուսնի լույսի տակ: