Հաշմանդամության կարգի վերափորձաքննություններն անցկացվում են առցանց դիմումների հիման վրա

Բժշկասոցիալական փորձագիտական մարզային նախկին հանձնաժողովները լուծարվել են, դրանց փոխարեն քաղաքացիներին փորձաքննում ու հաշմանդամության կարգ են տալիս աշխատանքի և սոցիալական հարցերի նախարարության շրջիկ հանձնաժողովները: Այս ընթացքում փոփոխվել է նաև քաղաքացիների դիմելիության կարգը, այն պարզեցվել է։

Չի փոխվել բժշկափորձագիտական հանձնաժողովի որոշման հետ ունեցած անհամաձայնությունների բողոքարկման կարգը՝ նախկինի պես կլուծվեն նախարարությանը կից գործող վերափորձաքննական հանձնաժողովի վերջնական եզրակացության հիման վրա:

Բժշկափորձագիտական  մարզային հանձնաժողովները չեն գործում ապրիլի 8-ից: Մարզային 24 հանձնաժողովները լուծարվեցին, որին հաջորդեց վերակազմավորման գործընթաց, իսկ այդ ընթացքում համավարակն ու կարանտինային ռեժիմն էլ ազդեցին, որ քաղաքացիների փորձաքննությունը դադարեցվի։

Փոփոխությունների պատճառով ժամկետային ու նոր փորձաքննություններ են կուտակվել: Մարզային նախկին  մշտական հանձնաժողովի փոխարեն շրջիկ հանձնաժողով է աշխատում:

Հաշմանդամության կարգ ստանալու համար քաղաքացիները բժիշկ մասնագետների մոտ գալիս են միայն հատուկ դեպքերում։

«Փորձաքննում ենք հիմնականում առաջին անգամ բժշկասոցիալական փորձաքննության ենթարկվող հիվանդներին, մինչև 18 տարեկան երեխաներին և 18 տարեկանից բարձր, երբ հաշմանդամության խումբ ենք սահմանում կենսաթոշակային տարիքի մարդկանց համար»,- նշում է Շիրակի և Լոռու մարզերի թիվ 4 ԲՍՓ բաժնի ղեկավար Լուսինե Հաջյանը։

Իսկ այն քաղաքացիները, որոնք գոնե մեկ անգամ անցել են փորձաքննություն և ստացել հաշմանդամության կարգ կամ հաշմանդամ երեխայի կարգավիճակ, փորձաքննության այլևս չեն ներկայանալու:

Քաղաքացիներն իրենց հիվանդության նկարագիրն ու փաստաթղթերը կարող են հանձնաժողովին ուղարկել առցանց  համակարգով, ինչը բավարար է հաշմանդամության կարգավիճակը մեկ տարով երկարաձգելու համար:

«Քաղաքացին հիմա անհրաժեշտություն չունի այցելելու բժշկասոցիալական փորձաքննական տարածքային բաժին․ կարող են էլեկտրոնային եղանակով ներկայացնել պատշաճ ձևով սահմանված դիմումը, որից հետո սահմանված ժամկետում փորձաքննության տվյալ բաժինը փաստաթղթերի փորձաքննություն կանի»,- նոր կարգի մանրամասներն է ներկայացրել ԲՍՓ գրասենյակի կառուցվածքային ստորաբաժանումների գործառույթները համակարգող խորհրդական Իզաբելլա Մուրադյանը։

Իսկ կարգը փոխելու համար քաղաքացին հանձնաժողովին կարող է դիմել վիրահատական ու տևական՝ երեք ամիս անընդմեջ բուժում ստանալուց հետո միայն: Նոր կարգով հանձնաժողովին հեռահար դիմելու, հաշմանդամության կարգը երկարաձգելու հնարավորություն ունեն նաև այն քաղաքացիները, որոնք այդ պահին գտնվում են հանրապետությունից դուրս:

«Եթե քաղաքացին մեկ անգամ փորձաքննվել է իր տարածքային բաժանմունքի կողմից, այդ դեպքում հաջորդ տարի, եթե քաղաքացին նույնիսկ երկրում չի գտնվում, կարող է հեռակա փորձաքննության ներկայանալ՝ ներկայացնելով այն բուժհաստատության փաստաթղթերը, որտեղ գտնվում է բուժման մեջ»,- նշում է Իզաբելլա Մուրադյանը։

Պարզեցված եղանակով ու առցանց դիմումներով հանրապետությունում արդեն փորձաքննվել է մոտ 1000 քաղաքացի: Հանձնաժողովների մասնագիտական խմբի հետ քաղաքացու առնչությունը բացառելով բացառում են այն ռիսկերը, որոնք կային հաշմանդամության կարգի դիմաց գումար պահանջելու, անհիմն կարգից զրկելու դեպքերի ժամանակ:

«Հանձնաժողովականները տվյալ տարածքների բնակիչներ չեն, և հանձնաժողովները  երկարաժամկետ մի տարածքում չեն աշխատելու։ Այդ փոփոխություններն ու պարզեցված ընթացակարգը նույնպես ուղղված են համակարգում կոռուպցիոն ռիսկերի նվազեցմանը»,- ասում է Իզաբելլա Մուրադյանը:

Շրջիկ հանձնաժողովներն առանձնացրել են այն հիվանդությունների ցանկը, որոնցով վերջին տարիներին քաղաքացիների դիմելիությունն ավելացել է:

«Վերջին տարիներին դիմում են հատկապես օնկոլոգիական հիվանդություն ունեցող քաղաքացիները, իսկ վերջերս ավելացել են ինսուլտներով ու հիպերտոնիայով դիմելիության դեպքերը»,- նշում է Լուսինե Հաջյանը:

9-ը աշխատանքային խմբերը, որոնք մարզերում են շրջում, պարբերաբար փոփոխվում են, այդ խմբերում տեղի բժիշկ մասնագետների ներգրվվածությունը հասցված է նվազագույնի, իսկ երեք նեղ մասնագիտական խմբերը, որոնք աշխատում են առանձին, փորձաքննության իրավունք ունեն հոգեբուժական, մանկական և ակնաբանական ախտաբանական վիճակներ ունենալու դեպքերում։