Էլեկտրաէներգիայի թանկացման փո՞րձ, թե՞ լուրջ պատճառաբանություն սակագնի չնվազեցման համար. ՀԾԿՀ-ի նոր որոշումը

ՀՀ հանրային ծառայությունները կարգավորող հանձնաժողովն իր այսօրվա նիստում կայացրել է մի որոշում, որը կարող է հանգեցնել էլեկտրաէներգիայի սակագնի բարձրացման:

Ինչի՞ մասին է խոսքը: Համապատասխան որոշման մեջ նշվում է, որ ՀՀ և ՌԴ կառավարությունների միջև 2015թ. փետրվարի 5-ին կնքված համաձայնագրով ՌԴ կառավարությունը ՀՀ կառավարությանը տրամադրել է 270 միլիոն ԱՄՆ դոլարի չափով վարկ ՀԱԷԿ-ի 2-րդ էներգաբլոկի շահագործման ժամկետի երկարաձգման ծրագրի իրականացման նպատակով, և այն կհանդիսանա ՀՀ կառավարության միջնորդությամբ ստացված արտոնյալ վարկային միջոցների հաշվին իրականացվող ներդրում:

Ըստ ՀԾԿՀ-ի որոշման՝ այդ 270 մլն դոլար վարկի մարումը ապահովվելու է էլեկտրական էներգիայի արտադրության սակագնի հաշվարկում դրանց սպասարկման և մարման ծախսերը ներառելու միջոցով:

«ՀՀ հանրային ծառայությունները կարգավորող հանձնաժողովը սահմանել է, որ «Հայկական ատոմային էլեկտրակայան» ՓԲԸ-ի 2-րդ էներգաբլոկի շահագործման ժամկետի երկարաձգում» ծրագրի իրականացմանն ուղղված ներդրումային ծրագրի շրջանակում ներգրավվելիք միջոցների վերադարձը կապահովվի էլեկտրական էներգիայի (հզորության) արտադրության սակագնի հաշվարկում դրանց սպասարկման և մարման ծախսերը ներառելու միջոցով` ըստ ենթավարկային պայմանագրում ամրագրված պայմանների»,- նշված է որոշման մեջ:

Նման որոշումը կարող ենք դիտարկել մեկ այլ տեսանկյունից էլ, եթե ոչ էլեկտրաէներգիայի սակագնի բարձրացման փորձ:

Դեռևս հունիսի 8-ին տեղի ունեցած կառավարության նիստի ժամանակ վարչապետ Նիկոլ Փաշինյանը ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանից հետաքրքրվեց, թե ինչ ուսումնասիրություններ են կատարվել ոլորտում և սակագնի փոփոխման հարցում ինչ նորություն կա: Ի պատասխան վարչապետի հարցման՝ նախարարն ասաց, որ սակագնի վերանայման հետ կապված կան ռիսկեր և համատարած սակագնի էժանացում անել չեն կարող, հնարավոր է 10 դրամով սակագինը նվազեցնել միայն 110-120 հազար սոցիալապես անապահով ընտանիքների համար:

Նիկոլ Փաշինյանը նկատեց, որ նախարարը չանդրադարձավ ոլորտի այլ ռիսկերին, օրինակ, թե որքան կոռուպցիա, որքան անարդյունավետ ծախս կա համակարգում: Վարչապետը հանձնարարեց ուսումնասիրել նաև այս ռիսկերը և կառավարություն ներկայացնել համապատասխան հաշվետվություն, ինչպես նաև շարունակել քննարկումները ոչ միայն անապահով խավի, այլև ընդհանրապես քաղաքացիների գազի և էլեկտրաէներգիայի սակագների նվազեցման ուղղությամբ:

Դրանից անցել է մոտ 2 շաբաթ, ու հիմա ՀԾԿՀ-ն նման որոշում է կայացնում, որը եթե չհանգեցնի էլեկտրաէներգիայի թանկացմանը, ապա կարող է ծանրակշիռ փաստարկ դառնալ կառավարության համար, որպեսզի հստակ պատճառաբանեն, թե ինչու չեն կարողանում էլեկտրաէներգիայի սակագինը նվազեցնել, որը տեղի ունեցած հեղափոխությունից հետո հանրության համար ամենասպասելի հարցերից մեկն է: