Փաստաբանը կոչ է անում հուլիսի 1-ից չվճարել կարմիր գծերի համար

Փողոցային երթևեկության խնդիրներին ու տուգանքների մեխանիզմներին է այսօր անդրադարձել վարորդների իրավունքների պաշտպան, փաստաբան Արտակ Խաչատրյանը: Փաստաբանը նախ տեղեկացրել է, որ հաշվառման քննական բաժանմունքներում այլևս մեծ հերթեր չեն լինում և կարիք չկա վաղ առավոտնից գնալ և արհեստական հերթեր գոյացնել: Փաստաբանը խոսել է նաև տեսանկարահանման արդյունքում սահմանված տուգանքների և կարմիր գծերի մասին:

Նախ՝ լավ լուր վարորդական իրավունքի քննություններ հանձնողների համար: Վարորդների պաշտպան-փաստաբանի խոսքերով՝  քննությունները հեշտացրել են, խոսքը մասնավորապես գործնական քննության մասին է, որը նախկինում միշտ դժգոհությունների տեղիք է տվել:

Մյուս նորությունն այն է, որ տեսանկարահանող սարքերի միջոցով արձանագրված տուգանքներն են քչացել: Պարզվում է, որ միշտ է տեսախցիկով արձանագրվածը  հիմք հանդիսանում տուգանք սահմանելու համար: Տուգանքների որոշումների նախագծերը կազմել են «Սեքյուրիթի դրիմ» ընկերության աշխատակիցները և շատ դեպքերում այդ որոշումները եղել են ոչ օբյեկտիվ ու մնացել են անարձագանք:

«Մեծ քանակությամբ ակտերը, որ գալիս են ՃՈ, համոզված ենք, որ այնտեղ չեն էլ կարող հետևել ու հսկել որակին, այսինքն՝ վստահության հիման վրա շարունակում են տուգանել: Փաստացի երթևեկության կարգուկանոնը թելադրում է «Սեքյուրիթի դրիմ» ընկերությունը»,- նշել է փաստաբանը:

Ավելի լուրջ է կարմիր գծերի հետ կապված վիճակը: Փաստաբանը պնդում է, որ կարմիր գծերը միայն պետք է լինեն քաղաքապետարանի կողմից հատկացված ու հատուկ սարքերով կահավորված տարածքներում: Քանի դեռ այդ ամենը չկա, կարմիր գծերն ու համապատասխան տուգանքները Արտակ Խաչատրյանը համարում է ապօրինություն:

«Հաջորդ ամսի 1-ից, եթե քաղաքապետարանը շարունակի աշխատել  նույն կերպ, կոչ ենք անում չվճարել կարմիր գծերի համար, նաև բողոքարկել»,- ասել է փաստաբանը:

Ահա ապօրինության օրինակներից մեկը: Կայանված մեքենան մութ ժամի դուրս է գալիս կարմիր գծերի հատվածից առանց լույսերը միացնելու: Այս դեպքում պետք է գործի նախազգուշացման համակարգը, ինչը չի գործում, սակայն երեք հազար դրամ տուգանքը սահմանվում է:
Ինչ վերաբերում է ճանապարհային տեսուչներին, ապա հիմա նրանց աշխատանքից շատերը գոհ են կամ գոնե շատ դժգոհ չեն, չնայած, որ ոմանց մոտ դա վերահսկողության բացակայության տպավորություն է ստեղծում:

«Պարտաճանաչ, օրինապահ քաղաքացիները ինքնակառավարվող սիստեմի են անցել: Ավելի շատ կարիք կա թիրախավորելու պոտենցիալ իրավախախտներին, որոնք միշտ, բոլոր հասարակություններում էլ լինում են»,- նշել է Արտակ Խաչատրյանը: