Գյումրիի մոր ու մանկան ավստրիական հիվանդանոցում կներդրվի պերինատալ ախտորոշման փորձնական ծրագիր

Ռուսաստանաբնակ հայ բժիշկները Հայաստանում պերինատալ ախտորոշման փորձնական ծրագիր են սկսում: Նախաձեռնությունը «Վիվա» բարեգործական հիմնադրամինն է: Նախատեսվում է հայ բժիշկների վերապատրաստում Մոսկվայում և հղիների նախածննդյան հետազոտությունների անցկացում բացառապես անվճար: Սա հնարավորություն կտա հղիության վաղ շրջանում հայտնաբերել պտղի զարգացման արատներն ու գենետիկ շեղումները: Փորձնական ծրագրում է ընդգրկվել Գյումրիի մոր ու մանկան ավստրիական հիվանդանոցը:

Այս հետազոտությունների պետպատվերի համակարգը Հայաստանում ներդրվել է անցած տարի: Անվճար հետազոտություններ կարող են անցնել միայն ռիսկի խմբի հղիները: Ռիսկի խմբում ընդգրկվելու համար մի շարք գործոններ են հաշվի առնվում:

«Անցած տարվանից պետությունը պետպատվերի շրջանակում հնարավորություն է տալիս ռիսկի խմբում ընդգրկված հղիներին կատարել նաև լրացուցիչ դժվարամատչելի հետազոտություններ նման արատների ռիսկը հայտնաբերելու համար: Այսինքն՝ պետպատվերով հետազոտություն են անցնում ռիսկի խմբի հղիները, իսկ մնացածները, ովքեր ընդգրկված չեն ռիսկի խմբում, իրենց ցանկությամբ կարող են անցնել վճարովի հետազոտություններ»,– Shantnews-ին ասել է Գյումրիի մոր և մանկան ավստրիական հիվանդանոցի տնօրեն Ժորժիկ Սերոբյանը:

Ինչպես պերինատալ ախտորոշումը հասանելի դարձնել Շիրակի մարզի բոլոր բնակավայրերի բնակիչների համար: Փորձնական ծրագիրը ռուսաստանաբնակ հայ բժիշկներն են ներկայացնում: Կարինե Օթարյանը Մոսկվայի 68-րդ կլինիկական հիվանդանոցի պերինատալ առողջության ծառայության ղեկավարն է: Փորձնական ծրագրով հիվանդանոցի երկու բժիշկներ  նրա ղեկավարությամբ Մոսկվայում աշխատելու և վերապատրաստվելու են: Իսկ ստացած փորձը Գյումրիում են կիրառելու:

«Մեր նպատակն է, որ բոլոր հղիները աշխարհում և հատկապես Հայաստանում անցնեն բարձր որակով ուլտրաձայնային հետազոտություն, որպեսզի մաքսիմալ շուտ ստանան ինֆորմացիա պտղի առողջության մասին: Դա պետք է լինի պետական ծրագիր: Պլանավորում ենք, որ բժիշկները պետք է գան Մոսկվա, աշխատելու ընթացքում սովորեն, հետո վերադառնան Հայաստան ու ներդնեն իրենց ջանքերը, որ ծրագիրը աշխատի Հայաստանում»,– Shantnews-ին ասել է բժշկական գիտությունների թեկնածու Կարինե Օթարյանը:

Ախտորոշումը հնարավորություն կտա հղիության վաղ շրջանում հայտնաբերել պտղի գենետիկ շեղումները և զարգացման արատները: Շիրակի մարզում նման դեպքերը շատ չեն, բայց վաղ հայտնաբերումն է կարևոր հղիության ընդհատման համար, եթե զարգացման արատը կյանքի հետ անհամատեղելի է:

Ինչքան կնոջ տարիքը մեծ է, այնքան պտղի զարգացման արատների հավանականությունն է մեծ: 35-ից բարձր տարիքի հղիները համարվում են ռիսկային, բայց Կարինե Օթարյանը նշում է՝ տարիքն այլևս ամենաորոշիչ գործոնը չէ: Ժամանակակից հետազոտությունները փոխել են բժիշկների մոտեցումները:

«Մենք հիմա 21-րդ դարում ենք, ու գոյություն ունի ինդիվիդուալ ռիսկ հասկացությունը: Ամեն կին ունի իր ինդիվիդուալ ռիսկը, որն ընդգրկում է և՛ իր տարիքը, և՛ արյան ցուցանիշները, և՛ անամնեզը: Դրա համար հիմա մենք չենք նայում տարիքին, որովհետև կինը 22 տարեկանում կարող է ունենալ Դաունի սինդրոմով երեխա, այնպես, ինչպես 42 տարեկանում կարող է ունենալ առողջ երեխա»։

Փորձնական ծրագրի ներդրումը հնարավորություն է տալու, որ ավելի մեծ թվով հղիներ հետազոտվեն, սրանով իսկ կնվազի տարբեր արատներով ծնվող երեխաների թիվը: Փորձնական ծրագրի արդյունքները ներկայացնելու են առողջապահության նախարարությանը՝ ակնկալիքով, որ այն հետագայում պետական ծրագիր կդառնա:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX  և Opticom ցանցային օպերատորների կապուղիներով։ Ինչպես նաև Shant Digital Tv հավելվածով ամբողջ աշխարհում։