ՀՀ-ում Ճապոնիայի դեսպանը Գյումրիում մասնակցել է Ճապոնիայի կառավարության ֆինանսավորմամբ իրականացված ծրագրերի ամփոփմանը

Ճապոնիայի կառավարությունը Հայաստանում ֆինանսավորում է սոցիալական և կրթական ծրագրեր: 2019-2020 թվականներին  «Կարիտաս Ավստրիայի» հետ Ճապոնիայի կառավարությունը Գյումրիում և Տաշիրում տարեցների խնամքի ցերեկային կենտրոններ է վերանորոգել ու կահավորել, իսկ Շիրակի թեմի սոցիալ-կրթական կենտրոնում գործազուրկների համար ստեղծվել են մասնագիտական հմտությունների ձեռք բերման հնարավորություններ:

«Ճապոնիայի և Հայաստանի համար շատ կարևոր արժեքներ կան,օրինակ տարեցներին հարգելն ու նրանց մեծ սիրով շրջապատելը։Մենք պարտավոր ենք մեր մեծերին,մեր տատիկներին ու պապիկներին փայփայենք,սիրենք և մշտապես նրանց կողքին լինենք »,- ասել է ՀՀ-ում Ճապոնիայի արտակարգ և լիազոր դեսպան Ջուն Յամադան:

Ցերեկային խնամքի կենտրոնի մասնագետները հոգ են տանում նաև տարեցների առողջության պահպանման մասին։ Ծրագրի շրջանակներում ձեռք բերված բժշկական սարքավորումները կօգնեն արդյունավետ դարձնել առողջական խնդիրներ ունեցող տարեց մարդկանց թերապևտիկ բուժօգնության կազմակերպումը:

Ճապոնիայի կառավարության դրամաշնորհային ծրագրով Գյումրիի  սոցիալ-կրթական կենտրոնում վերանորոգվել , ժամանակակից տեխնիկայով ու արքավորումներով են կահավորվել դիմահարդարման, վարսահարդարման, մատնահարդարման , թխվածքների պատրաստման, ձևավորման ու խոհարարության արհեստանոցները:

Աշխատաշուկայում մրցունակ լինելու համար կարևոր են հմտություններն ու արհեստավարժությունը, ինչպես նաև աշխատանքային փորձը, որը մասամբ դասընթացները լրացնում են:

« Ճապոնիան բարձր է գնահատում ենթակառուցվածքների բարելավումը, տնտեսական աճի և տարածաշրջանային զարգացման համար: Ուստի աջակցության այս ծրագիրը շարունակական քայլերից մեկն է, աշխարհը զարգացման ավելի կայուն ուղու վրա դնելու համար:Մասնագիտական ուսուցումը երկրի սոցիալական և տնտեսական առաջընթացի գրավականն է:»,- նշել է Ջուն Յամադան:

2019-2020 թվականների ընթացքում սոցիալ-կրթական կենտրոնում կազմակերպված դասընթացները վերապատրաստվելու հնարավորություն են տվել բազմաթիվ գործազուրկների: Շահառուները սոցիալապես անապահով ընտանիքներից են նաև Արցախի բնակավայրերում՝ տուն ու տեղ կորցրած մարդիկ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom, HAY-NET  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։